ރާތް ކާޑާ އެކު ބާސެލޯނާ އިން ރިއެކްޓު ކުރީ ވަރަށް ރަނގަޅަށް: ފްލިކް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ބެންފީކާއާ ދެކޮޅަށް ކުޅުނު މެޗުގެ ކުރީ ކޮޅު، ބާސެލޯނާގެ ޕައު ސުބާސީ އަށް ދެއްކި ރަތް ކާޑާ އެކު، އެ ޓީމުގެ ކުޅުންތެރިން ރިއެކްޓު ކުރީ ވަރަށް ރަނގަޅަށް ކަމަށް، ބާސެލޯނާ އަށް އިރުޝާދު ދެމުން އަންނަ ހަންސީ ފްލިކް ބުނެފި އެވެ.

ބެންފީކާގެ އަމިއްލަ ދަނޑުގައި ކުޅުނު މެޗު ފަށައިގެން 22 ވަނަ މިނެޓުގައި ޕައު ސުބާސީ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އެއީ ބާސެލޯނާގެ ގޯލު އޭރިޔާ ކައިރިން ބެންފީކާގެ ކުޅުންތެރިޔަކަށް އޭނާ ކުރި ފައުލަކާ ގުޅިގެންނެވެ.

އޭގެ ސަބަބުން މެޗުގެ ބޮޑު ބައި ބާސެލޯނާ އިން ފުރިހަމަ ކުރަން ޖެހުނީ އެއް ކުޅުންތެރިޔަކު މަދުކޮށެވެ. ނަމަވެސް، އެއާ އެކު ވެސް ބާސެލޯނާ އިން ވަނީ މެޗުގައި ރަނގަޅަށް ކުޅެ، ދެ ވަނަ ހާފުގައި ލަނޑު ޖަހައިގެން މެޗުން މޮޅުވެފަ އެވެ.

އެ މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، ސުބާސީ ކުށްވެރި ކުރަން އޭނާ ބޭނުން ނުވާ ކަމަށެވެ. ފްލިކް ބުނީ އެއީ ފުޓުބޯޅައިގައި ކަންތައް ދިމާވާނެ ގޮތެއް ކަމަށާއި، ފުޓުބޯޅައިގައި ގޯސް ނުހެދޭ މީހަކު ނުހުންނާނެ ކަމަށެވެ.

އޭގެ ބަދަލުގައި އެންމެ މުހިންމީ، ރަތް ކާޑާ އެކު ބާސެލޯނާ އިން ރިއެކްޓު ކުރި ގޮތް ކަމަށް އޭނާ ފާހަގަ ކުރި އެވެ. އޭގެ ބަދަލެއްގެ ގޮތުގައި ބާސެލޯނާ އިން ވަރަށް ރަނގަޅަށް ރިއެކްޓު ކުރި ކަމަށާއި، މެޗުން ލިބުނު މޮޅާ މެދު ވަރަށް ބޮޑަށް ހިތްހަމަ ޖެހިފައި ހުރި ކަމަށް އޭނާ ބުންޏެވެ.

ޚާއްސަކޮށް އެއް ކުޅުންތެރިޔަކު މަދުކޮށް ކުޅެން ޖެހުނު ނަމަވެސް، ބާސެލޯނާ އިން މެޗުގައި ވަރަށް ފުރިހަމަ އަށް ޑިފެންސް ކުރި ކަމަށް އޭނާ ބުންޏެވެ. ޓީމުގެ ކުޅުންތެރިން އެކުވެގެން ކުރި މަސައްކަތުގެ ނަތީޖާ އަކީ، އެ ޙާލަތު ރަނގަޅަށް މެނޭޖުކޮށް، މެޗުން މޮޅުވުން ކަމަށް ފްލިކް ބުންޏެވެ. ޚާއްސަކޮށް 10 ކުޅުންތެރިންނާ އެކު ކުޅެން ޖެހުނީ ފަސޭހަ ކަމެއް ނޫން ކަމަށް ވެސް އޭނާ ބުންޏެވެ.

ދެ ވަނަ ލެގުގެ މެޗު ކުރިއަށް އޮތްކަން ފާހަގަކޮށް ފްލިކް ބުނީ، އެ މެޗަށް ވެސް ބާސެލޯނާ ނިކުންނާނީ ޓީމުގައި މިހާރު އޮތް އިތުބާރު ދަމަހައްޓައިގެން ކަމަށެވެ. އެކަމަށް ގަދަ އަޅާ މަސައްކަތް ކުރާނެ ކަމަށާއި، ކުޅުންތެރިންގެ ފަރާތުން ހިތްވަރު ލިބޭ ކަމުގައި ފްލިކް ބުންޏެވެ.

ބާސެލޯނާގެ ދަނޑުގައި މި ދެ ޓީމު ބައްދަލު ކުރާ ދެ ވަނަ ލެގު އޮތީ މާޗު މަހުގެ 11 ވަނަ ދުވަހުގެ ރޭ އެވެ.