ރައްޔިތުންގެ މަޖިލީހަށް މެމްބަރަކު އިންތިޚާބުވާ ޕާޓީ ބަދަލުކުރުމުން، ނުވަތަ އެ ޕާޓީން ވަކިވުމުން މެމްބަރުންގެ ގޮނޑި ގެއްލޭ ގޮތަށް ޤާނޫނުއަސާސީ އަށް އިސްލާހު ގެނައި މައްސަލައިގައި ޖަވާބުދާރީވުމަށް އެޓަރނީ ޖެނެރަލްގެ އޮފީހަށް ސުޕްރީމް ކޯޓުން ދިން މުއްދަތުގައި، އެ ކޯޓަށް ޖަވާބުދާރީ ވެވަޑައިގަންނަވާފައި ވާނެ ކަމަށް ބަންޑާރަނައިބު، އަހުމަދު އުޝާމް ވިދާޅުވެއްޖެއެވެ.

މަޖިލިސް މެމްބަރުން އިންތިޚާބުވާ ސިޔާސީ ޕާޓީ ބަދަލުކުރުމުން ނުވަތަ ޕާޓީން ވަކިވުމުން އެ މެމްބަރެއްގެ ގޮނޑި ގެއްލުވާލުމުގެ ފުރުސަތު ޕާޓީ އަށް ލިބޭ ގޮތަށް ޤާނޫނުއަސާސީ ބަދަލު ކުރި މައްސަލައިގައި ޖަވާބުދާރީ ވާން އެޓަރނީ ޖެނެރަލްގެ އޮފީހަށް ލިބުނު މުއްދަތުގައި ޖަވާބުދާރީ ވެފައި ނުވާ ކަމަށް އެ މައްސަލަ ސުޕްރީމް ކޯޓަށް ހުށަހެޅުއްވި ޤާނޫނީ ވަކީލް އަދި ރައްޔިތުންގެ މަޖިލީހުގެ ކުރީގެ މެމްބަރު އަލީ ހުސައިން ވަނީ ފާހަގަކުރައްވާފައެވެ.

އަދި ސުޕްރީމް ކޯޓުން ދިން މުއްދަތުގައި މައްސަލަ އަށް ޖަވާބުދާރީ ނުވުމަކީ އެއީ ކޯޓުގެ ހުރުމަތް ކެނޑުން ކަމަށް ފާހަގަކޮށް އެކަމާއި މެދު ފިޔަވަޅު އަޅާ ދިނުމަށް އޭނާ ވަނީ ސުޕްރީމް ކޯޓުގައި އެދިވަޑައިގަންނަވާފައެވެ. އެގޮތުން އަލީ ހުސެއިން ސުޕްރީމް ކޯޓަށް ފޮނުއްވި ސިޓީގައި އެދިވަޑައިގަންނަވާފައި ވަނީ މި މައްސަލަ އާއި ގުޅިގެން ބަންޑާރަނައިބާއި މެދު ފިޔަވަޅު އަޅުއްވާ ދެއްވުމަށެވެ.

މީގެ އިތުރުން ދިވެހިރާއްޖޭގެ ސުޕްރީމް ކޯޓުގެ ގަވާއިދުގެ 124 ވަނަ މާއްދާގެ (ޅ) ގައި ބަޔާންކުރާ ގޮތުން، ޝަރީއަތުގެ މަޖިލީހުގައި ފަނޑިޔާރުން ކުރާ އަމުރުތަކަށް ކިޔަމަން ވުމަކީ އެ އަމުރު ރައްދުވާ ފަރާތުގެ މައްޗަށް ލާޒިމް ކުރާ ކަމެއްކަން އެ ސިޓީގައި އަލީ ވަނީ ފާހަގަކުރައްވާފައެވެ. ހަމައެހެންމެ އެ މާއްދާގައި ބުނާގޮތުން، ފަނޑިޔާރުން ކުރާ އަމުރުތަކަށް ކިޔަމަން ނުވުމަކީ ކޯޓުގެ ހުރުމަތް ކެނޑުމުގެ އަމަލެއް ކަމަށް ބެލެވޭނެ ކަމަށް ވެސް އަލީ ހުސެއިންގެ އެ ސިޓީގައި ވަނީ ބުނެފައެވެ.

މި ކަމާއި ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބުދެއްވަމުން އުޝާމް ވިދާޅުވީ ސުޕްރީމް ކޯޓަށް މި މައްސަލަ ހުށަހެޅި ފަރާތުން (އަލީ ހުސައިން) މި މައްސަލައިގެ މުއްދަތު ގުނަނީ ރަނގަޅަށް ނޫން ކަމަށެވެ. ބަންދު ދުވަސްތައް ނުހިމަނާ ޖަވާބުދާރީވުމަށް ތިން ދުވަހުގެ މުއްދަތެއް ދިނުމަށް އޭޖީ އޮފީހުން ސުޕްރީމް ކޯޓުގައި އެދިފައިވާނެ ކަމަށާއި ސުޕްރީމް ކޯޓުން އެ މުއްދަތު ދީފައިވާ ކަމަށް އުޝާމް ވިދާޅުވިއެވެ. އުޝާމް ޤަބޫލުކުރައްވާ ގޮތުން އެ މުއްދަތު ހަމަ ވަނީ މާރޗް 6ވާ ބުރާސްފަތި ދުވަހަށެވެ. އެހެންކަމުން ސުޕްރީމް ކޯޓަށް ޖަވާބުދާރީ ވެފައި ވަނީ ކޮން އިރަކުތޯ ސާފުކުރުމަށް ރާއްޖެއެމްވީން ސުވާލުކުރުމުން، އެ ސުވާލަށް އުޝާމް ޖަވާބުދެއްވާފަ އެއް ނުވެއެވެ.

އުޝާމް މިހެން ވިދާޅުވި ނަމަވެސް ޖަވާބުދާރީ ވާން ސުޕްރީމް ކޯޓުން ދިން މުއްދަތު ހަމަވަނީ 28 ފެބްރުއަރީ އަށް ކަމަށް އަލީ ހުސައިން އާއި މި މައްސަލައިގައި ހިމެނޭ އެހެނިހެން ޤާނޫނީ ވަކީލުން ވަނީ ވިދާޅުވެފައެވެ.

އަލީ ހުސެއިން ސުޕްރީމް ކޯޓަށް ހުށަހަޅުއްވާފައިވާ މައްސަލައިގައި ބުނެފައި ވަނީ ގާނޫނުއަސާސީގެ 73 ވަނަ މާއްދާއަށް 20 ވަނަ މަޖިލީހުން ގެނައި ބަދަލާއި އެކު، ގާނޫނުއަސާސީގެ ހަތަރު ވަނަ މާއްދާގެ ދަށުން ދިވެހި ދައުލަތުގެ އެންމެހައި ބާރުތައް ދިވެހިރައްޔިތުންގެ ކިބައިގައި ދެމި އޮތުމުގެ އަސާސާއި ޚިލާފުވެފައިވާ ކަމަށެވެ. އަދި ގާނޫނުއަސާސީއާ އެއްގޮތްވާ ގޮތުގެ މަތީން ދިވެހި ދައުލަތުގެއެންމެހައި ބާރުތައް ހިންގަންވާނޭކަމަށް ގާނޫނުއަސާސީގެ އަށް ވަނަ މާއްދާގައި އޮންނަ އަސާސާއި ވެސް އެ އިސްލާހު ޚިލާފުކަމަށް އޭނާ ފާހަގަކުރައްވައެވެ.