ފަނޑިޔާރު މަހާޒް ޖޭއެސްސީ އަށް ހާޒިރުވާން އަންގައިފި
ސުޕްރީމްކޯޓުގެ 3 ފަނޑިޔާރުން ސަސްޕެންޑްކޮށްފައި ވަނީ ނިމިދިޔަ ފެބްރުއަރީ މަހުގެ ފަހުކޮޅު
ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު
ޖުޑީޝަލް ސަރވިސް ކޮމިޝަން (ޖޭއެސްސީ) އިން ސަސްޕެންޑްކޮށްފައިވާ ފަނޑިޔާރު މަހާޒް އަލީ ޒާހިރު އެ ކޮމިޝަނަށް ހާޒިރުވުމަށް އަންގައިފިއެވެ.
ރާއްޖެއެމްވީ އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި މަހާޒު ޖޭއެސްސީ އަށް ހާޒިރުވުމަށް އެ ކޮމިޝަނުން އަންގާފައި ވަނީ ބުރާސްފަތި ދުވަހު އެވެ. ޖޭއެސްސީން މަހާޒް އަށް އަންގާފައި ވަނީ 9 މާރޗް 2025 ވާ އާދިއްތަ ދުވަހު އެ ކޮމިޝަންގެ ބިލްޑިން (ހ.ސަކީނާ މަންޒިލް - ގްރައުންޑް ފްލޯރ) އަށް ހާޒިރުވުމަށެވެ. މަހާޒު ޖޭއެސްސީ އަށް ހާޒިރުވާން އަންގާފައި ވަނީ އެ ދުވަހުގެ މެންދުރު 01:00 ގައެވެ.
މި ނޫހަށް ކަށަވަރުވެފައިވާ ގޮތުގައި، މަހާޒު ޖޭއެސްސީ އަށް ހާޒިރުވުމަށް އަންގާފައިވާ ޗިޓުގައި ބުނެފައިވާ ގޮތުން އޭނާ ހާޒިރުކުރަނީ 2024 ވަނަ އަހަރު ހިނގައިދިޔަ މައްސަަލަ އަކާއި ގުޅިގެންނެވެ. އެގޮތުން އޭނާ ޖޭއެސްސީ އަށް ހާޒިރު ކުރަނީ 4 ޑިސެމްބަރ 2024 ވަނަ ދުވަހު، މައްސައެއްގައި ފުލުހުންގެ ބެލުމުގެ ދަށަށް ގެންދިޔަ، ގއ. ދާންދޫ އަސަރީގެ ޑރ.އިސްމާއިލް ލަތީފްގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކޮށްފައިވާ މައްސަލަ އާއި ގުޅުން ހުރި ތުހުމަތުތަކާއި ގުޅިގެންނެވެ.
އެނގިފައިވާ ގޮތުން، އެ މައްސަލަ އާއި ގުޅިގެން ފަނޑިޔާރު މަހާޒު ކްރިމިނަލް ކޯޓުގެ ފަނޑިޔާރުންނަށް ގުޅާ މި މައްސަލަ އަށް ނުފޫޒު ފޯރުވާފައިވާ ކަމަށް ބުނެ ޖޭއެސްސީ އަށް އަމިއްލަ ފަރާތަކުން މައްސަލަ އެއް ހުށަހަޅާފައިވާ ކަމަށް ޖޭއެސްސީން ވަނީ މަހާޒު އަށް އަންގާފައެވެ.
މީގެ އިތުރުން މި މައްސަލަ ބަލަމުން ދަނީ ކޮމިޝަންގެ އަމިއްލަ އިސްނެގުމާއި އެކުގައި ކަމަށް ވެސް ރާއްޖެއެމްވީ އަށް ވަނީ މައުލޫމާތު ލިބިފައެވެ.
ދުސްތޫރީ މައްސަލަ އެއް ސުޕްރީމް ކޯޓުަގައި ހިނގަމުން ދަނިކޮށް ޖޭއެސްސީން މަހާޒް ހިމެނޭހެން ސުޕްރީމްކޯޓުގެ 3 ފަނޑިޔާރުން އެއްފަހަރާ ކުއްލި ގޮތަކަށް ސަސްޕެންޑްކޮށްފައި ވަނީ ނިމިދިޔަ ފެބްރުއަރީ މަހުގެ ފަހުކޮޅެވެ. ފަނޑިޔާރު އަޒްމިރަލްދާ އާއި ހުސްނުއްސުއޫދު ވެސް ޖޭއެސްސީން ވަނީ ސަސްޕެންޑްކޮށްފައެވެ. ފަނޑިޔާރުންނަށް ސަރުކާރުން ނުފޫޒު ފޯރުވާ ކަމަށް ފާހަގަކޮށް އަދި ރައީސް މުއިއްޒު ގާނޫނު އަސާސީ އާ ޚިލާފު ވެފައިވާ ކަަމަށް ވިދާޅުވެ ހުސްނުއްސުޢޫދު މަޤާމުން އިސްތިއުފާ ދެއްވާފައިވާ އިރު ފަނޑިޔާރުންނަށް ނުފޫޒު ފޯރުވާ ކަމަށް ވިދާޅުވެ ފަނޑިޔާރު އަޒްމިރަލްދާ ވަނީ ނޫސްބަޔާނެއް ނެރުއްވާފައެވެ.
ޖޭއެސްސީން ބަލަމުންދާ މައްސަލަ އާއި ގުޅިގެން މަހާޒް އަށް އަމިއްލަ އަށް ނުވަތަ ވަކީލެއްގެ އެހީގައި ދިފާއު ހުށަހެޅުމާއި ހެކިން ހުށަހެޅުމަށް ވަނީ ފުރުސަތު ލިބިދީފައެވެ.
ޖޭއެސްސީގެ އެންގުމާއި އެއްގޮތަށް ފަނޑިޔާރު މަހާޒް ހާޒިރު ނުވެއްޖެ ނަމަ ހުށަހެޅި މައްސަލަ ކުރިއަށް ގެންދިއުމަށް ބޭނުން ނުވާ ކަމަށް ބެލުމަށް ފަހު މައްސަލަ އާއި މެދު ގޮތެއް ނިންމުމުގެ އިޚްތިޔާރު ޖޭއެސްސީ އަށް ލިބިގެންވެއެވެ. އަދި ފިޔަވަޅު އެޅުމުގެ ފުރުސަތު ވެސް އެ ކޮމިޝަނަށް ވަނީ ލިބިދީފައެވެ.
