ކުރިން 5 ރުފިޔާއަށް ވިއްކި ކާށި، އެސްޓީއޯ އިން 20 ރުފިޔާއަށް ކިލޯއެއް ވިއްކަން ފަށައިފި
4 މާރިޗު 2025 | އަންގާރަ 16:01އެސްޓީއޯއިން ކާށި ވިއްކަމުންދަނީ ބޮލަކަށް 3 ކާއްޓެވެ. އަދި ކިއުގައި ޖެހިގެން ގިނަ އަދަދެއްގެ ބަޔަކު ކާށި ގަންނަމުންދާއިރު ކާއްޓެއްގެ އަގު 5 ރުފިޔާއިން ކިލޯއެއް 20 ރުފިޔާއަށް ބޮޑުކުރި ސަބަބެއްވެސް ހާމައެއް ނުކުރެއެވެ.
ބާޒާރުގައި މީހަކު ކާށި ވިއްކަނީ. އެސްޓީއޯއިން ރޯދައިގެ ކުރިން 5 ރުފިޔާއަށް ވިއްކި ކާށި މިހާރު ވިއްކަނީ ކިލޯ ކިރައިގެން - ފައިލް
އަވަސް ހައްލު ގެންނަން އުޅުނު އެސްޓީއޯއިން އެންމެ ފަހުން ކާށިކިލޯއެއް 20 ރުފިޔާއަށް ވިއްކަން ނިންމައިފިއެވެ.
އެސްޓީއޯއިން އެންމެ ފުރަތަމަ ކާށި ގެންނަން ނިންމާ ފެބްރުއަރީ މަހުގެ 15 އިން ފެށިގެން 5 ރުފިޔާއަށް ކާއްޓެއް ވިއްކަން ނިންމިއެވެ. އެއިރު އެސްޓީއޯއިން ބުނީ މިއަހަރުގެ ރަމަޟާން މަހަށް ބޭނުންވާ މުދާ ފަސޭހަކަމާއެކު ލިބޭނެ ގޮތް ހަމަޖެއްސުމަށް އެސްޓީއޯއިން ވަނީ ކުރީ އަހަރުތަކެކޭ އެއްފަދައިން މިފަހަރުވެސް ތައްޔާރުވެފައި ކަމަށެވެ. އަދި މީގެ ކުރިން ލިބިފައިވާ ތަޖުރިބާތަކުގެ އަލީގައި، މިއަހަރު ޚާއްޞަ ސަމާލުކަމެއް ދީގެން ވަނީ އާންމު ފަރުދުންނާއި ވިޔަފާރިވެރިންނަށް ފަހި ގޮތްތަކެއް ހޯދައިދިނުމަށް ރޭވިފައި ކަމަށް އެސްޓީއޯއިން އެއިރު ބުންޏެވެ.
އަދި މާކެޓްގެ އަގުތަކަށް އަންނަ ބަދަލުތައް ގަވާއިދުން ބަލަމުންގެންގޮސް، އަގު މައްޗަށްދާ ތަކެތި ފާހަގަކޮށް، އެކަމަށް އަވަސް ހައްލެއް ގެނެވޭނެކަމަށް ބުނެފައިވެއެވެ. އަދި އެއިރު މާކެޓްގައި ކާށީގެ އަގު ހުރީ 10 ރުފިޔާއާއި 25 ރުފިޔާއާ ދެމެދުގައި ކަމަށާއި، އެސްޓީއޯއިން އެތެރެކުރި ފުރަތަމަ ބެޗްގެ ކާށި މިހާރު ވަނީ އިންޑިއާއިން ރާއްޖެއަށް ގެނެވިފައި ކަމަށް އެސްޓީއޯއިން ބުންޏެވެ. އަދި މި ކާށި 15 ފެބުރުއަރީން ފެށިގެން އެސްޓީއޯ ޕީޕަލްސް ޗޮއިސް މެދުވެރިކޮށް ވިއްކާނެ ކަމަށާއި، އެސްޓީއޯއިން މިފަހަރު ކާށި ވިއްކުމަށް ކަނޑައަޅާފައިވާ އަގަކީ 5 ރުފިޔާ ކަމަށް ބުނެފައިވެއެވެ.
ނަމަވެސް އެސްޓީއޯއިން މެދުކެނޑުމެއް ނެތި ކާށި ފޯރުކޮށްނުދެވި ހުއްޓާ މާލޭގެ މާރުކޭޓުތަކުގައި ކާށީގެ އަގުތައް އިންތިހާއަށް އުފުލިގެންދިޔައެވެ. އަދި 40 ރުފިޔާއަށް ކާއްޓެއްގެ އަގު ބޮޑުވުމުން އެސްޓީއޯއިން ވަނީ އަނެއްކާވެސް ކާށި ވިއްކާކަމަށް އިއުލާންކޮށްފައެވެ. އެގޮތުން މިފަހަރު އެސްޓީއޯއިން ބުނެފައިވަނި ކާށި ކިލޯއެއް ވިއްކާނީ 20 ރުފިޔާއަށް ކަމަށެވެ. އެއީ އާންމު ރޭޓުން ބަލާނަމަ ބޮޑު 1 ކާއްޓެވެ. ނުވަތަ ކުޑަ ދެ ކާއްޓެވެ.
މީގެ އިތުރުން އެސްޓީއޯއިން ކާށި ވިއްކަމުންދަނީ ބޮލަކަށް 3 ކާއްޓެވެ. އަދި ކިއުގައި ޖެހިގެން ގިނަ އަދަދެއްގެ ބަޔަކު ކާށި ގަންނަމުންދާއިރު ކާއްޓެއްގެ އަގު 5 ރުފިޔާއިން ކިލޯއެއް 20 ރުފިޔާއަށް ބޮޑުކުރި ސަބަބެއްވެސް ހާމައެއް ނުކުރެއެވެ.
މީގެ އިތުރުން ލޮނުމެދުވެސް މެދުކެނޑުމެއް ނެތި ލިބޭނެކަމަށް ބުނި ނަމަވެސް ލޮނުމެދު ވެސް މިހާރު ބާޒާރުގައި ވިއްކަމުންދަނީ ބޮލަކަށް ކިލޯއެކެވެ. މިއާއެކު ރައްޔިތުންގެ ނުރުހުން ސަރުކާރަށް އަމާޒުވެ މި ރޯދަމަހަށް އެސްޓީއޯ މިކަމަށް ތައްޔާރުވެފައި ނެތްކަމަށް ބުނެ އަންނަނީ ފާޑުކިޔަމުންނެވެ.
