ފްލިކް ބޭނުންވާ ކުޅުން ބާސެލޯނާ އިން ފެނޭ!

ބާސެލޯނާގެ ފަރާތުން އޭނާ އެންމެ ބޭނުންވާ ކުޅުން މިހާރު ފެންނަމުން އަންނަ ކަމަށް، އެ ޓީމަށް އިރުޝާދު ދެމުން އަންނަ ޖަރުމަނުގެ ހަންސީ ފްލިކް ބުނެފި އެވެ.

އޭނާ މިހެން ބުނީ ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ބާސެލޯނާ ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުން މޮޅުވެ، ބާސެލޯނާ އިން ވަނީ އެއް ވަނައިގައި ލީޑު ނަގައިފަ އެވެ.

ފްލިކް ބުނީ ސޮސިއެޑާޑާ ދެކޮޅަށް ބާސެލޯނާގެ ކުޅުންތެރިން ދެއްކީ އޭނާ އެންމެ ބޭނުންވާ ވައްޓަފާޅީގެ ކުޅުމެއް ކަަމަށެވެ. ފްލިކް ބުނީ ބާސެލޯނާ އިން ރަނގަޅު ޕާސްތަކެއް ޖަހާ ކަމަށާއި، އެއާ ވިދިގެން އެޓޭކުގައި ވެސް ރަނގަޅު މަސައްކަތްތަކެއް ކުރާ ކަމަށެވެ. ޚާއްސަކޮށް ބާސެލޯނާގެ ކޮންްމެ ކުޅުންތެރިޔަކު ވެސް ހުންނަނީ ލަނޑު ޖަހަން ބޭނުންވެފައި ކަަމަށް އޭނާ ބުންޏެވެ.

ސޮސިއެޑާޑު މެޗަކީ ވަރަށް ރަނގަޅަށް ދިޔަ މެޗެއްކަން ފާހަގަ ކުރަމުން ފްލިކް ބުނީ، އެއީ ކުރިއަށް ދިޔުމުގައި ރަނގަޅެއް ކަމަށެވެ. އެ މެޗުގައި ބާސެލޯނާ އިން ގިނަ ފުރުސަތުތަކެއް ތަނަވަސްކުރި ކަމަށާއި، މެޗުން މޮޅުވުން އުފާވާ ކަމަށް އޭނާ ބުންޏެވެ. އެއަށް ވުރެ ބޮޑަށް މެޗުން ތިން ޕޮއިންޓު ލިބި ތާވަލްގެ ކުރިއަށް ޖެހިލެވުމުކީ ވެސް ހިތްހަމަ ޖެހުމެއް ކަމަށް ފްލިކް ވަނީ ބުނެފަ އެވެ.

މީގެ އިތުރުން ފްލިކް ބުނީ ބާސެލޯނާ އިން ކުރަން ޖެހޭ މަސައްކަތް ކުރިއަށް އޮތީ ކަމަށާއި، އެއީ ދަތުރު ކުރަން އޮތް ދިގު މަގެއް ކަމަށެވެ. ސަމާލުކަން ދޭންވީ ކަންކަން ދެނެގަންނަ ކަމަށާއި، އެކަންކަމަށް ތައްޔާރުވެ ކުރިއަށް ހުރި މެޗުތަކުން ވެސް ތިން ޕޮއިންޓު ކަށަވަރު ކުރުމަކީ މުހިންމު ކަމެއްގެ ގޮތުގައި ފްލިކް ވަނީ ފާހަގަ ކޮށްފަ އެވެ.

ސޮސިއެޑާޑު އަތުން ހޯދި މޮޅާއެެކު ބާސެލޯނާ އިން ވަނީ ލީގު ތާވަލްގެ އެއް ވަނައިގައި ޕޮއިންޓެއްގެ ލީޑު ނަގައިފަ އެވެ. މިހާތަނަށް ލީގުގައި ކުޅެފައިވާ 26 މެޗުން ބާސެލޯނާ އަށް ލިބެނީ 57 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް އެތުލެޓިކޯ މެޑްރިޑަށް 56 ޕޮއިންޓު ލިބޭއިރު، ތިން ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 54 ޕޮއިންޓެވެ.