ފްލެޓު ލިބުނު ގިނަ ބަޔަކު އުނިކުރި މައްސަލާގައި ގިނަ ބަޔަކު މިނިސްޓްރީއަށް، އާއްމުންގެ ސުވާލުތަކަށް ޖަވާބެއް ނުދެވޭ
ޝަކުވާ ހުށަހަޅަން ފުރުސަތު ދިންއިރު، ސާބިތުކޮށްދޭން ފުރުސަތު ދީފައިނުވޭ
ފްލެޓް ލިސްޓު ނެރުނު ގޮތާއި މެދު ހިތްހަމަނުޖެހުން ފާޅުކުރުމަށް ހައުސިން މިނިސްޓްރީ އަށް އާއްމުން އެއްވެ އަޑު އުފުލަނީ
ގެދޮރުވެރިޔާ ސްކީމުގެ ދަށުން ފްލެޓު ލިބުނު ގިނަ ބަޔަކު އުނިކުރުމުން ނުރުހުން ފާޅުކޮށް، އެތައް ބަޔަކު މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރއަށް އެއްވެ ނުރުހުންފާޅުކޮށްފިއެވެ.
ހޯމަ ދުވަހުގެ ހެނދުނު ގިނަ އަަދަދެއްގެ އާއްމު ރައްޔިތުން ވަނީ މިނިސްޓްރީއަށް އެއްވެފައެވެ.
ފްލެޓުގެ މައްސަލާގައި ސަރުކާރުން އަމަލުކޮށްފައިވަނީ ރަނގަޅަށް ނޫން ކަމަށާއި، ކުރިން ޝަރުތު ހަމަވި ގިނަ ބަޔަކު ޝަރުތު ހަމަނުވާ ކަމަށް ކަނޑައަޅައި، ލިސްޓް އާއްމުކޮށްފައިވަނީ ކޮން އުސޫލަކުންކަން ސާފުކޮށް ދިނުމަށް އެމީހުން ވަނީ ގޮވާލާފައެވެ.
މިމައްސަލައާ ގުޅިގެން އެއްވި މީހުން ބުނެފައިވަނީ ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ޖަވާބުދާރީވާންޖެހޭ ކަމަށާއި، ބައްދަލުކޮށް ދިނުމަށް އެދުނު ނަމަވެސް ފުރުސަތު ދީފައިނުވާ ކަމަށެވެ. އަދި ޝަކުވާ ހުށަހެޅުމަށް އެއް މަސްދީފައިވާއިރު، ޝަރުތު ހަމަވާކަން ސާބިތުކޮށްދިނުމަށް އެއްވެސް ލިޔެކިއުމެއް ހުށަނޭޅޭގޮތް ހަދާފައިވާ ކަމަށާއި، މިއުސޫލު ދެކޮޅު ނުޖެހޭ ކަމަށް އެމީހުން ބުނެފައިވެއެވެ.
މީގެ އިތުރުން ބައެއް މީހުން ޝަރުތު ހަމަނުވާ ކަމަށް ކަނޑައަޅާފައިވަނީ ދަރިންގެ ބައިން ޕޮއިންޓު މަދު ކުރުމަށްފަހު ކަމަށާއި، އެއުސޫލު ވެސް ސާފުކޮށްދިނުމަށް އެދިފައިވެއެވެ.
މިއީ ރޯދަ މަހާ ދިމާކޮށް ދިން އިތުރު މާޔޫސް ކަމެއް. އަޅުގަނޑުމެން މަޑުކުރިން 12:30 ވަންދެން. އެކަމަކު އެދެވޭ ޖަވާބެއް ވެސް ނުދެވޭ މިނިސްޓްރީގެ ބޭފުޅުންނަށް. އަޅުގަނޑުމެން މި ބުނަނީ ޖަވާބުދާރީވާން ފުރުސަތު ދޭށޭ އެކަން ސާބިތުކޮށްދެވޭ ގޮތަށް. އެބޭފުޅުން އެބަ ބުނޭ 15 އަހަރު އަހަރުމެން މާލޭގައި ދިރިނުޅޭ. ކުރިން ހުށަހެޅި ލިޔުންތައް ވެސް ބާތިލް. ދެން މިފަހަރު ޖަވާބުދާރީވާން ވެސް ލިޔެލަންވީ 15 އަހަރަށް ވުރެ ގިނަ ދުވަހު މާލޭގައި ދިރިއުޅުނީމޭ. އެގޮތަށް ކަންތައް ކުރަން އެބޭފުޅުން އެ ވިދާޅުވަނީ. އެހެންވީމަ ކިހިނެތް މިއުސޫލު ހަމަޖެހޭނީ. އަޅުގަނޑުމެން ކުރާ ސުވާލުތަކަށް ވެސް ޖަވާބެއް ނުދެވޭ އެބޭފުޅުންނަށް.ފްލެޓު މައްސަލާގައި ކަންބޮޑުވުންފާޅު ކުރި އާއްމުންގެ މީހެއް
ސޯޝަލް މިޑީއާގައި އާއްމުވެފައިވާ ވީޑިއޯތަކުން ފެންނަ ގޮތުގައި ދަރުބާރުގޭގައި ގާއިމްކޮށްފައިވާ ވަގުތީ ހައުސިން މިނިސްޓްރީގެ ރިސެޕްޝަން އޭރިޔާގައި ގިނަ ބަޔަކު މަޑުކޮށްގެން ތިބެއެވެ. އެތަނުގައި ފުލުހުން ވެސް ތިބިއިރު، މިނިސްޓްރީގެ ސިޔާސީ ބޭފުޅެއް، އެމީހުންނަށް ޖަވާބުދެމުން ގެންދާ މަންޒަރު ފެނެއެވެ. އަދި އާއްމު ރައްޔިތުންގެ ޝަކުވާތަކަށް ބެލުމުގެ މަސައްކަތް ކުރަމުންދާ ކަމަށް ވެސް އެބޭފުޅާ ވިދާޅުވެފައިވެއެވެ.
މިދިޔަ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމުގެ ދަށުން ފްލެޓު ލިބޭނެ ކަމަށް އިއުލާނުކުރި ލިސްޓުގައި ހިމެނުނު މީހުންގެ ތެރެއިން ފްލެޓު ލިބޭނީ 1,820 މީހުންނަށެވެ. އަދި 3119 މީހުންނަށް ފްލެޓު ނުލިބޭކަން ހާމަކޮށް ލިސްޓް 27 ފެބްރުއަރީ 2025 ގައި ވަނީ އާއްމުކޮށްފައެވެ.
ކުރީ ސަރުކާރުން ދޫކޮށްފައިވާ ފްލެޓުތައް ދޫނުކޮށް މިސަރުކާރުން ހިފަހައްޓަމުންދާއިރު، ފްލެޓުތަކުގެ މައްސަލާގައި އާއްމު ރައްޔިތުން މުޒާހަރާ ކުރަމުންދާތާ އަހަރަކަށް ވުރެ ވަނީ ގިނަ ދުވަސްވެފައެވެ. އިންސާފުވެރިކަމާއެކު ފްލެޓު ދޫކުރާނެ ކަމަށާއި، ރީ-އިވެލުއޭޝަންގެ މަސައްކަތްތައް ކުރިއަށް ގެންދަނީ ކަމަށް ބުނެ ފްލެޓު ލިސްޓު ހިފެހެއްޓި ނަމަވެސް ފްލެޓު ލިބޭ މީހުންގެ ދިރިއުޅުމުގެ ހާލަތު ވެސް ބަލާފައިނުވެއެވެ. އަދި މިސަރުކާރުން ވަނީ ދެ ކޮޓަރި 8,000 ރުފޔާއަށް, ތިން ކޮޓަރި 10,500 ރުފިޔާއަށް ކުލި ވެސް ބޮޑު ކޮށްފައެވެ. ކުރީ ސަރުކާރުން ކުރި އިއުލާނުގައި އޮތީ ދެ ކޮޓަރި އެޕާޓަމަންޓަކަށް 5,000 ރުފިޔާ އަދި މެއިންޓެނަންސް ފީއަށް 1000 ރުފިޔާއެވެ. އަދި ތިން ކޮޓަރި އެޕާޓްމަންޓަކަށް 7,000 ރުފޔާ އަދި މެއިންޓެނަންސް ފީއަށް 1,000 ރުފިޔާއެވެ.
