މިއާމީ މޮޅުވީއިރު، ވިދާލީ ސުއަރޭޒް

މޭޖާ ލީގު ސޮކާ (އެމެރިކާ ލީގު) ގައި ހައުސްޓަން ޑައިނަމޯއާ ދެކޮޅަށް ކުޅުނު މެޗުން މޮޅުވެ، އިންޓަރ މިއާމީން މި ސީޒަންގެ ލީގުގެ ފުރަތަމަ މޮޅު ހޯދައިފި އެވެ.

މި ސީޒަންގެ ލީގުގައި އިންޓަރ މިއާމީގެ ފުރަތަމަ މެޗުގައި އެ ޓީމު ނިކުތީ ނިއު ޔޯކް ސިޓީއާ ދެކޮޅަށެވެ. އެ މެޗު ނިމުނީ އެއްވަރުވެގެންނެވެ.

ލީގުގެ ދެ ވަނަ މެޗުގައި ހޯމަ ދުވަހުގެ ފަތިހު ޑައިނަމޯއާ ދެކޮޅަށް ކުޅުނު މެޗު މިއާމީން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި މިއާމީން ތިން ލަނޑު ޖެހިއިރު، ފަހު ލަނޑު ޖެހީ ދެ ވަނަ ހާފުގަ އެވެ. އަދި މި ހާފުގައި ޑައިނަމޯ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން ހަ ވަނަ މިނެޓުގައި މިއާމީ އަށް ލީޑު ނަގައިދިނީ ޓެލަސްކޯ ސެގޯވިއާ އެވެ. އޭގެ ފަހުން ފުރަތަމަ ހާފުގެ 37 ވަނަ މިނެޓުގައި މިއާމީގެ ދެ ވަނަ ލަނޑު ޖެހީ ޓަޑެއޯ އަލެންޑޭ އެވެ. އަދި ފުރަތަމަ ހާފުގެ އިތުރު ވަގުތުގައި ސެގޯވިއޯ ވަނީ މިއާމީގެ ތިން ވަނަ ލަނޑު ޖަހައިފަ އެވެ.

މި ތިން ލަނޑު ޖަހަން ވެސް ފުރުސަތު ތަނަވަސްކޮށްދިނީ މިއާމީ އަށް ކުޅެމުން އަންނަ އުރުގުއޭގެ ލުއިސް ސުއަރޭޒް އެވެ. އަދި މެޗުގައި މިއާމީގެ ހަތަރު ވަނަ ލަނޑު ޖެހީ ވެސް ސުއަރޭޒް އެވެ. މެޗުގައި ޑައިނަމޯގެ ހަމައެކަނި ލަނޑު ޖެހީ ނިކޮލަސް ލޮޑެއިރޯ އެވެ.

މޮޅާއެކު މިއާމީ އޮތީ ތާވަލްގެ ހަ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ދެ މެޗުން ހަތަރު ޕޮއިންޓާ އެކު އެވެ.