ފާޑުކިޔުން ބޮޑުވުމުން ސޯޝަލް މީޑިއާ ގައި ކުރާ ކާބޯތަކެތީގެ ޕޯސްޓްތައް އިޝްތިހާރުގެ ގޮތުގައި ނުބެލެވޭނެ ކަމަށް ބުނެފި
ރެސްޓޯރެންޓް ފަދަ ތަންތަނުގައި ބޭނުން ކުރާ މެނޫ އަދި ކާބޯތަކެތީގެ ޚިދުމަތް އަދި ވަކި ކާބޯއެއްޗެއް ލިބެން ހުރި ކަމަށް ބުނެ، އާމްދަނީ ހޯދުމަށް ގޭގޭގައި ކާބޯތަކެތި ތައްޔާރު ކުރާ ފަރާތްތަކުން ނުވަތަ މިނޫންވެސް މިފަދަ އެހެން ފަރާތަކުން ވާޗުއަލް ޕްލެޓްފޯމް ނުވަތަ ސޯޝަލް މީޑިއާ މެދުވެރިކޮށް ކުރާ ކާބޯތަކެތީގެ ޕޯސްޓްތައް އިޝްތިހާރުގެ ގޮތުގައި ހުއްދަ ނަގާކަށް ނުޖެހޭ ކަމަށް މިހާރު ވަނީ ބުނެފައި.
ބާގަރ
ކާބޯތަކެތި އިޝްތިހާރު ކުރުމާ ބެހޭ ގަވައިދަށް އާންމުންގެ ފާޑުކިޔުން ބޮޑުވުމުން ސޯޝަލް މީޑިއާ ގައި ކުރާ ކާބޯތަކެތީގެ ޕޯސްޓްތައް އިޝްތިހާރުގެ ގޮތުގައި ނުބެލެވޭނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ބުނެފިއެވެ.
1 މާރިޗްގެ ތާރީޚުގައި އެމްއެފްޑިއޭ އިން ނެރުނު ނޫސް ބަޔާނެއްގައި ބުނީ، ގަވައިދުގައި އެ އޮތޯރިޓީ އަށް ހުށަހަޅައިގެން ހުއްދަ ހޯދަން ބަޔާން ކޮށްފައިވަނީ ކާބޯތަކެތި ނުވަތަ ކާބޯތަކެތި އުފެއްދުމަށް ބޭނުން ކުރާ ބާވަތެއް ނުވަތަ އެއްޗެއްގެ މަގުބޫލު ކަން އިތުރުކުރުމުގެ މަގްސަދުގައި ހިންގާ ހަރަކާތަށް ކަމަށެވެ.
"ރެސްޓޯރެންޓް ފަދަ ތަންތަނުގައި ބޭނުން ކުރާ މެނޫ އަދި ކާބޯތަކެތީގެ ޚިދުމަތް އަދި ވަކި ކާބޯއެއްޗެއް ލިބެން ހުރި ކަމަށް ބުނެ، އާމްދަނީ ހޯދުމަށް ގޭގޭގައި ކާބޯތަކެތި ތައްޔާރު ކުރާ ފަރާތްތަކުން ނުވަތަ މިނޫންވެސް މިފަދަ އެހެން ފަރާތަކުން ވާޗުއަލް ޕްލެޓްފޯމް ނުވަތަ ސޯޝަލް މީޑިއާ މެދުވެރިކޮށް ކުރާ ކާބޯތަކެތީގެ ޕޯސްޓްތައް އިޝްތިހާރުގެ ގޮތުގައި ހުއްދަ ނަގާކަށް ނުޖެހޭނެ؛" ކަމަށް ބަޔާނުގައި ވެއެވެ.
އެހެން ނަމަވެސް މިގޮތައް ކޮށްފައިވާ ޕޯސްޓްގައި ހިމެނޭ ކާބޯތަކެއްޗަކީ ދެވަނަ އެއް ނެތް ނުވަތަ އެހެން ކާބޯއެއްޗަކާ އަޅާ ކިޔުން ފަދަ އިބާރާތެއް ނުވަތަ ފޮޓޯ އެއް ބޭނުން ކުރާ ނަމަ ހުއްދަ ނުނަގާ ބޭނުން ކުރުމަކީ މަނާ ކަމެއް ކަމަށްވެސް ބުނެފައިވެއެވެ.
އެމްއެފްޑީއޭ އިން ގަވައިދު މާނަކޮށްދީ ބަޔާނެއް ނެރުނު އިރު، "އެއްވެސް ބާވަތެއްގެ ކާބޯ އެއްޗެއް އިޝްތިހާރު ކުރުމަށް އެދޭ ފަރާތްތަކުން އެ އިޝްތިހާރެއް އޮތޯރިޓީ އަށް ހުށަހަޅާ އޮތޯރިޓީގެ ހުއްދަ ލިޔުމުން ހޯދައިގެން މެނުވީ އިޝްތިހާރެއްގެ ގޮތުގައި ބޭނުން ކޮށްގެން ނުވާނެ؛" ކަމަށް ގަވައިދުގެ 3 ވަނަ މާއްދާގެ (ހ) ގައި ބުނެފައިވެއެވެ.
މީގެ އިތުރުން ގަވައިދުގައި ބުނެފައިވަނީ، ކާބޯތަކެތި ނުވަތަ ކާބޯތަކެތި އުދެއްދުމަށް ބޭނުން ކުރާ ކާބޯތަކެތީގެ ބާވަތްތައް ގަނެ ވިއްކުމަށްޓަކައި ނުވަތަ ބޭނުން ކުރުމަށްޓަކައި ސީދާ ގޮތެއްގައި ނުވަތަ ނުސީދާ ގޮތެއްގައި ވިޔަފާރި ކުރުމުގެ މަގްސަދުގައި އާންމުކޮށް ރައްޔިތުންނަށް މުއާސަލާތު ކުރުމަކީ ކާބޯތަކެތި އިޝްތިހާރު ކުރުން ކަމުގައެވެ.
ގަވައިދު ބުނާ ގޮތުން މުއާސަލާތް ކުރުމަކީ އެއްވެސް ބާވަތެއްގެ އޯޑިއޯ ނުވަތަ ނުވަތަ ވިޝުއަލް ނުވަތަ ވީޑިއޯ ނުވަތަ އެނޫންވެސް ވަސީލަތެއް ބޭނުން ކޮށްގެން ޕްރިންޓް ނުވަތަ އިލެކްޓްރޯނިކް މީޑިއާ ނުވަތަ އިންޓަރނެޓް ނުވަތަ އެނޫންވެސް މީޑިއަމް އެއް މެދުވެރިކޮށް ވަކި ބާވަތެއްގެ ނުވަތަ އެއްޗެއްގެ މަގްބޫލުކަން އިތުރު ކުރުމަށް ހިންގާ ހަރަކާތް ކަމަށެވެ.
ކާބޯތަކެތި އިޝްތިހާރު ކުރުން މާނަ ކޮށްފައިވާ ގޮތަށް އެއްވެސް އިސްތިސްނާއެއް ގަވައިދުގައި ދީފައި ނުވުމާއެކު އޮޅުން ބޮޅުން އުފެދި ގިނަ ބައެއްގެ ފާޑުކިޔުން ގަވައިދަށް ވަނީ އަމާޒު ވެފައެވެ.
މިހާރު ގަވައިދު އޮތް ގޮތުން ކާބޯތަކެތީގެ އެއްވެސް ބާވަތެއް އިޝްތިހާރު ކުރެވޭނީ ފުޑް އެންޑް ޑްރަގް އޮތޯރިޓީގެ ހުއްދަ ލިބިގެން ކަމަށް ވުމާއެކު ކޮންމެ ހުއްދަ އަކަށް ފީ އެއް ދައްކަން ޖެހޭނެއެވެ. އަދި އިޝްތިހާރަކަށް ބަދަލެއް ގެންނަ ކޮންމެ ފަހަރަކުވެސް ހުއްދަ ހޯދަން ޖެހޭނެއެވެ.
