އެމްބީއޭ ޗެމްޕިއަންޝިޕް ޓީރެކްސް އިން ކާމިޔާބު ކުރިއިރު، ޔޫއެން ފްރެންޑްސް އިން ޝީލްޑް ކާމިޔާބު ކޮށްފި

މޯލްޑިވްސް ބާސްކެޓު ބޯޅަ އެސޯސިއޭޝަން (އެމްބީއޭ) އިން އިންތިޒާމު ކޮށްގެން ކުރިއަށް ގެންދިޔަ، އެމްބީއޭ ޗެމްޕިއަންޝިޕްގެ ޗެމްޕިއަންކަން ޓީރެކްސް ބާސްކެޓުބޯޅަ ކުލަބުން ހޯދައިފި އެވެ.

މިއަހަރު ކުރިއަށް ގެންދިޔަ 29 ވަނަ އެމްބީއޭ ޗެމްޕިއަންޝިޕްގެ ފައިނަލްގައި ޓީރެކްސް ބައްދަލު ކޮށްފައި ވަނީ ކިންގްސް ބާސްކެޓު ބޯޅަ ކުލަބާ އެވެ. ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗު ޓީރެކްސް އިން ކާމިޔާބު ކުރީ 62-54 އިންނެވެ.

ފައިނަލް މެޗުގެ ފުރަތަމަ ދެ ކުއާޓަރު ވެސް ޓީރެކްސް އިން ނިންމާލީ ލީޑުގައި އޮވެގެންނެވެ. ފުރަތަމަ ކުއާޓަރު ނިމުނުއިރު އެ ޓީމު ލީޑުގައި އޮތީ 16-11 އިންނެވެ. އަދި ދެ ވަނަ ކުއާޓަރު ނިމުނުއިރު އެ ޓީމު ލީޑުގައި އޮތީ 17-14 އިންނެވެ.

މެޗުގެ ތިން ވަނަ ކުއާޓަރާއި، ހަތަރު ވަނަ ކުއާޓަރު ނިމުނީ އެއްވަރުގެ ނަތީޖާ އަކުންނެވެ. އެގޮތުން ތިން ވަނަ ކުއާޓަރު 11-11 އިން އެއްވަރުވީއިރު، ހަތަރު ވަނަ ކުއާޓަރު ނިމުނީ 18-18 އިންނެވެ. މެޗުގައި ޓީރެކްސް ކުރި ހޯދީ ފުރަތަމަ ދެ ކުއާޓަރުގައި އެ ޓީމުން ނެގި ލީޑުންނެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޗެމްޕިއަން ޓީރެކްސްގެ އިސްމާއީލް ވިލްދާން ޔޫސުފް އެވެ. ފައިނަލް މެޗުގައި ޓީރެކްސް އިން އެންމެ ރަނގަޅަށް ސްކޯ ކުރީ ވެސް އޭނާ އެވެ.

މީގެ އިތުރުން އެމްބީއޭ ޗެމްޕިއަންޝިޕްގެ ޝީލްޑު ކާމިޔާބު ކޮށްފައި ވަނީ ޔޫއެން ފްރެންޑްސް އިންނެވެ. އެއީ ފައިނަލް މެޗުގައި ސްޓިންގާސް ބީސީގެ މައްޗަށް ކުރި ހޯދައިގެންނެވެ. އެ މެޗު ޔޫއެން ފްރެންޑްސް އިން ކާމިޔާބު ކޮށްފައި ވަނީ 99-92 އިންނެވެ.

މި މެޗުގެ ހަތަރު ކުއާޓަރުގެ ކުޅުން ނިމުނުއިރު ދެ ޓީމު އޮތީ އެއްވަރުވެފަ އެވެ. އެހެންވެ ނަތީޖާ ނެރުމަށް ވަނީ އިތުރު ވަގުތު ކުޅެފަ އެވެ.