"ޤާނޫނަށް އިސްލާހު ގެނެސްގެން ސުޕްރީމް ކޯޓުގެ ފަނޑިޔާރުން މަދެއް ނުކުރެވޭނެ، ޤާނޫނު އަސާސީން އެ ޖާގައެއް ނުދޭ"
ސުޕްރީމް ކޯޓުގެ އަދަދު ކުޑަކުރުމަށް މި ސަރުކާރުން މަސައްކަތް ކުރަމުން ދަނީ އުސޫލާއި ޚިލާފަށް
އެމްޑީޕީގެ ޗެއަރޕަރސަން ފައްޔާޒް އިސްމާއިލް، އެ ޕާޓީގެ ޤައުމީ މަޖިލީހުގެ ބައްދަލުވުމުގައި ވާހަކަދައްކަވަނީ - 25 ފެބްރުއަރީ 2025
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ޤާނޫނަށް އިޞްލާޙު ގެނައުމަކުން، އެ ކޯޓުގައި ތިއްބެވި ފަނޑިޔާރުން މަޤާމުން ވަކިކުރުމުގެ ޤާނޫނީ ހަމައެއް ނެތް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒް އެފަދައިން ވިދާޅުވީ ބުދަ ދުވަހު އެމްޑީޕީގެ ޤައުމީ މަޖިލީހުގެ ބައްދަލުވުމުގައި ވާހަކަދައްކަވަމުންނެވެ.
ސުޕްރީމްކޯޓުގެ މެމްބަރަކު ވަކި ކުރެވޭނީ ސުލޫކީ މައްސަލައަކާއި ގުޅިގެން ވަކި އުސޫލްތަކެއްގެ ތެރެއިން ކަމަށް ފައްޔާޒް ވިދާޅުވިއެވެ. ސުޕްރީމްކޯޓުގެ އަދަދަށް ބަދަލު ގެނައުމުގެ ފުރުސަތު ޤާނޫނުން ލިބިދީފައި ނެތް ނަމަވެސް މީގެ ކުރިން ވެސް ޕީޕީއެމްގެ ސަރުކާރުން ސުޕްރީމްކޯޓުގެ ފަނޑިޔާރުންގެ އަދަދު 5 އަށް ކުޑަކުރިކަން ފައްޔާޒް ފާހަގަކުރެއްވިއެވެ. ނަމަވެސް އެމްޑީޕީން ވާނީ އެކަން ފަހުން ކުރިން އޮތް ގޮތަށް 7 ފަނޑިޔާރުންގެ ބެންޗަކަށް ބަދަލުކޮށްފައި ކަމަށް ވެސް ފައްޔާޒް ވިދާޅުވިއެވެ.
ފައްޔާޒް ވިދާޅުވީ ފަނޑިޔާރުންގެ އަދަދު މަދުކުރުމަށް މަސައްކަތް ކުރަމުން ދަނީ ސަރުކާރުން ބޭނުންވާ ކަންކަމަށް އެއްބަސް ނުވާ ފަނޑިޔާރުން މަޤާމުން ވަކިކުރުމަށް ކަމަށެވެ. އެއީ ތިން ބާރު ވަކިވެފައިވާ ޑިމޮކްރަސީގެ އުސޫލާއި މުޅިން ޚިލާފު ކަމެއް ކަމަށް ފައްޔާޒް ވަނީ ވިދާޅުވެފައެވެ. މިނިވަން މުއައްސަސާތަކާއި އިދާރާތަކަށް އަތްބާނާ ނުފޫޒު ފޯރުވަމުން ގޮސް އެންމެ ފަހުން ސުޕްރީމް ކޯޓަށް ވެސް ސަރުކާރުގެ ނުފޫޒު ފޯރާ މަންޒަފު މިއަދު ފެނިގެންދާ ކަމަށް ފައްޔާޒް ވަނީ ވިދާޅުވެފައެވެ.
މިއަދު އެބަ ބައްދަލުކުރައްވާ. މިރޭ ދަންވަރުގެ ވަގުތެއްގާ ވެސް އެ ބޭފުޅުންނާއި އެއްބަސް ނުވާ ފަރާތްތައް ވަކިވެގެން ދާނެ ކަމަށް އަޅުގަނޑުމެންނަށް މި ގަބޫލުކުރެވެނީ. އަޅުގަނޑުމެން މި ހޯދާފަ އޮތް ޑިމޮކްރަސީގެ މަހްފޫމަކީ ތިން ބާރު ވަކިކުރުން. އެންމެ ފަހަށް އޮތް ސުޕްރީމް ކޯޓުގެ ބާރުވެސް ކަނޑުވާލަނީ.މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕަރސަން ފައްޔާޒް އިސްމާއިލް
މިހާރު ސުޕްރީމްކޯޓުގެ ބެންޗާއި ކުޅެމުން ދަނީ މަޖިލީހުގެ ތަޅު އަޅުވާފަ އޮތް އޮތުން ބަދަލުވެދާނެތީ ކަމަށް ފައްޔާޒް ވަނީ ވިދާޅުވެފައެވެ. މިއީ ފަނޑިޔާރުންނަށް ދޭ މެސެޖެއް ކަމަށް ފައްޔާޒް ވިދާޅުވިއެއެވެ. ފައްޔާޒް ވަނީ އަންހެން ފަނޑިޔާރުން ވަކިކުރުމުގެ ވާހަކަ ކުއްލިއަކަށް ފެންމަތިވެފައިވާ ކަމަށާ އެއީ ވެސް ކަންބޮޑުވެވަޑައިގަންނަވާ ކަމެއް ކަމަށް ވިދާޅުވެފައެވެ.
ފައްޔާޒް ވަނީ ސުޕްރީމް ކޯޓުގެ އަދަދު ކުޑަކުރުމަށް މި ސަރުކާރުން މަސައްކަތް ކުރަމުން ދަނީ އުސޫލާއި ޚިލާފަށްކަން ފާހަގަކުރައްވާ އެކަމާއި މެދު ކަންބޮޑުވުން ފާޅުކުރައްވާފައެވެ. ޤާނޫނުތަކާއި ޤާނޫނު އަސާސީ އެކުލަވާލާފައި ވަނީ ރައްޔިތުންގެ ހައްގުތައް ނިގުޅައި ނުގަނެވޭނެ ގޮތަށް ބާރު ލިބޭ ގޮތަށް ކަމަށް ވީ ނަމަވެސް މިހާރު ސަރުކާރުން އަމަލުކުރަމުން ދަނީ އެއާއި މުޅިން ޚިލާފަށް ކަމަށް ވެސް ފައްޔާޒް ވިދާޅުވިއެވެ.
