މުސާރަަތައް ކުޑަ ނުކުރެވޭނެ ކަމަށް ރައީސަށް ލަފާދޭން މަޖިލީހުން ފާސްކޮށްފި
24 ފެބުރުއަރީ 2025 | ހޯމަ 08:40ޤާނޫނަށް ބަދަލު ނުގެނެސް މުސާރަތައް ކުޑަ ނުކުރެވޭ
ރައްޔިތޔުންގެ މަޖިލީހުގެ ޖަލްސާ އެއްގެ ތެރެއިން
ރައްޔިތުންގެ މަޖިލީހާއި ޝަރުއީ ދާއިރާގެ އިތުރުން މިނިވަން މުއައްސަސާތަކުގެ އިސް ވެރިންގެ މުސާރަަތައް ކުޑަ ނުކުރެވޭނެ ކަމަށް ރައީސްއަށް ލަފާ ދިނުމަށް މަޖިލީހުން ފާސްކޮށްފިއެވެ.
ހޯމަ ދުވަހުގެ ޖަލްސާގައި އެ ގޮތަށް ފާސްކޮށްފައި ވަނީ މާލިއްޔަތު ކޮމިޓީން މި މައްސަލަ ބަލާ ފާސްކޮށްފައިވާ ގޮތަށް އިތުރު ބަދަލެއް ގެނައުމަކާއި ނުލައެވެ. މާލިއްޔަތު ކޮމިޓީން މައްސަލަ ނިންމި ގޮތުގެ ރިޕޯޓް ފާސްކޮށްފައި ވަނީ އެ ވަގުުތު މަޖިލީހުގައި ތިބި ސަރުކާރު ހިންގާ ޕީއެންސީ އަށް ނިސްބަތްވާ 44 މެންބަރުންގެ އިއްތިފާގުންނެވެ.
މި ވޯޓުގައި އިދިކޮޅު އެމްޑީޕީގެ މެމްބަރުން ބައިވެރިވެފައެއް ނުވެއެވެ.
ރައްޔިތުންގެ މަޖިލީހާއި ޝަރުއީ ދާއިރާގެ އިތުރުން މިނިވަން މުއައްސަސާތަކުގެ އިސް ވެރިންގެ މުސާރަަތައް ކުޑަކުރުމަކީ ސަރުކާރުގެ މާލީ އިސްލާހީ އެޖެންޑާގައި ހިމެނޭ ކަމެކެވެ. އެ އެޖެންޑާގެ ދަށުން އެ ފިޔަވަޅުތައް އަޅަން ނިންމާފައި ވަނީ 2 އަހަރުގެ މުއްދަތަށެވެ.
ރައީސް ޑރ.މުހައްމަދު މުއިއްޒު ކުރިން ވިދާޅުވީ މި ބަދަލުތައް 2025 ވަނަ އަހަރުގެ ބަޖެޓާއި އެކު ގެންނަވާނެ ކަމަށެވެ. އެހެންނަމަވެސް މުސާރަ ކުޑަކުރުމުގެ އިސްލާހު މަޖިލީހަށް ހުށަހަޅުއްވާފައި ވަނީ ވެސް މި ހިނގާ ފެބްރުއަރީ މަހުގެ ތެރޭގައެވެ.
އެކަމާއި ގުޅޭ ގޮތުން މަޖިލީހަށް ފޮނުވި މައްސަލައިގައި ހުށަހަޅާފައި ވަނީ ރައްޔިތުންގެ މަޖިލީހުގެ މެންބަރުންގެ މުސާރައިން 10 އިންސައްތަ އުނިކުރުމަށާއި، ޝަރުއީ ދާއިރާގެ އިސްވެރިންގެ މުސާރައިން 10 އިންސައްތަ އަދި މިނިވަން މުއައްސަސާތަކުގެ އިސްވެރިންނާއި އަސާސީ މުސާރައިގެ ގޮތުގައި 12,000ރ. އަށް ވުރެ މަތިން ލިބޭ މަގާމުތަކުގެ އަސާސީ މުސާރައިގެ 10 އިންސައްތަ އުނިކުރުމަށެވެ.
އެހެންނަމަވެސް ޤާނޫނަށް ބަދަލު ނުގެނެސް އެކަން ނުކުރެވޭ ކަމަށް ފާހަގަކޮށް އެ ބަދަލުތައް ގެނައުމަކީ އިންސާފުވެރި ގޮތެއް ނޫން ކަމަށް މި މައްސަލަ ދިރާސާކުރުމަށް ފަހު މާލިއްޔަތު ކޮމިޓީން އެކުލަވާލި ރިޕޯޓުގައި ވަނީ ބުނެފައެވެ. އެހެންކަމުން މި ވަގުތަށް މުސާރައަށް ބަދަލުތައް ގެންނަން ނުފެންނަ ކަމަށް ކޮމިޓީން ވަނީ ފާސްކޮށްފައެވެ.
