މި އަހަރުގެ ރިޔާސީ ބަޔާނަކީ މާޔޫސްވާ، ދޮގާއި އޮޅުވާލުން ގިނަ ބަޔާނެއް ކަމަށް އެމްޑީޕީ ޕާލިމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.

މި އަހަރުގެ ރިޔާސީ ބަޔާނަށް މައިނޯރިޓީ ލީޑަރުގެ ހައިސިއްޔަތުން ޖަވާބުދެއްވަމުން ހޯމަ ދުވަހު ނާޒިލް ވިދާޅުވީ އެއީ ވަރަށް މާޔޫސްކުރުވާ ފަދަ ބަޔާނެއް ކަމަށެވެ. އެ ބަޔާނާއި ރާއްޖޭގެ ހާލަތާއި އެއްވެސް މިންވަރަކަށް ދިމާ ނުވާ ކަމަށް ނާޒިލް ވިދާޅުވިއެވެ.

ރާއްޖޭގައި ޤާނޫނުގެ ވެރިކަމެއް ނުހިނގާ ކަމަށާއި ގައުމު ދަނީ ހުދުމުހުތާރު ވެރިކަމަކާ ދިމާލަށް ކަމަށް ނާޒިލް ވަނީ ވިދާޅުވެފައެވެ. މިއަދު ގައުމުގެ ޑިމޮކްރަސީ ދަނީ ރަނގަޅު މިސްރާބަކަށް ނޫން ކަމަށް އޭނާ ވަނީ ވިދާޅުވެފައެވެ.

ރައްޔިތުން ތިބީ މިއަދު ހާސްކަން މަތީކަމަށް ވާއިރު އެ ހާސްކަން ފިލުވާނެ ގޮތެއް ސަރުކާރަށް ބުނެދެވިފައި ނުވާ ކަމަށް އޭނާ ވިދާޅުވިއެވެ. ސަރުކާރަށް އިގްތިޞާދު ހިންގާނެ ގޮތާއި އާމްދަނީ ހޯދޭނެ ގޮތް ވެސް ނު ހޯދޭ ކަމަށް އޭނާ ވަނީ ވިދާޅުވެފައެވެ. އެކަމުގެ ސަބަބުން ވިޔަފާރިތައް ބަންދުކުރަން ޖެހި، ވިޔަފާރިތައް ބަނގުރޫޓުވަމުންދާ ކަމަށް އޭނާ ވަނީ ވިދާޅުވެފައެވެ.

ރައީސް މުއިއްޒުގެ ބަހާއި އަމަލާއި ދިމާ ނުވާކަމަށް ނާޒިލް ވަނީ ވިދާޅުވެފައެވެ. އެގޮތުން ދައުރު ބަދަލުވުމާއި އެކު ރައީސް މުއިއްޒުގެ ހަގީގަތް ހާމަވަމުންދާ ކަަމަށާއި އެ މަނިކުފާނު ވަނީ އެމްޑީފީން ފަށާފައި އޮތް ރިފޯމް އެޖެންޑާ ނުވަތަ އިސްލާހީ މަސައްކަތް ހުއްޓާލާފައި ކަމަށް ނާޒިލް ވަނީ ވިދާޅުވެފައެވެ. މާލީ ރިފޯމް ނުގެނެސް ހޭދަވާ ކޮންމެ ދުވަހަކު ވެސް ރާއްޖެ އަށް ގެއްލުން ލިބޭ ކަމަށް ނާޒިލް ވިދާޅުވިއެވެ.

މީގެ އިތުރުން މަސައްކަތްތެރިންނާއި މެދު މި ސަރުކާރުން އަމަލުކުރަމުން ދަނީ އިހާނެތިކޮށް ކަމަށް އޭނާ ވަނީ ވިދާޅުވެފައެވެ. ވެރިކަމަށް 15 މަސްދުވަސް ވެގެން ދާއިރު އަދިވެސް ސިޔާސީ މުވައްޒަފުންގެ އަދަދު ވެސް ސަރުކާރުން އޮތީ ސިއްރުކޮށްފައި ކަމަށް ނާޒިލް ވަނީ ވިދާޅުވެފައެވެ.

ހަމައެހެންމެ ޗައިނާ އާއި އެކު ސޮއިކުރި ފްރީ ޓްރޭޑް އެއްބަސްވުމާއި އެކު ރާއްޖޭގެ ފަތުރުވެރިކަން ވަނީ ޗައިނާ ކުންފުނިތަކަށް ހުޅުވާލާފައި ކަމަށް ވެސް ނާޒިލް ވިދާޅުވިއެވެ. ނާޒިލް ވިދާޅުވީ ގެސްޓް ހައުސް ސިނާއަތަކީ ބޭރުގެ ކުންފުނިތަކަށް ބަންދުކޮށްފައި އޮންނަ ސިނާއަތަކަށް ވީ ނަމަވެސް މިހާރު އެކަން އޮތީ އެހެން ނޫން ކަަމަށެވެ. ނަމަވެސް ސަރުކާރުން ދަނީ އެކަން ސިއްރުކުރަމުން ކަމަށް ނާޒިލް ވަނީ ވިދާޅުވެފައެވެ.

ސަރުކާރުން ބަޖެޓު ފައިނޭންސް ކުރުމަށް ވެސް މަސައްކަތް ނުކުރާ ކަމަށާއި ދަރަނި ނުނަގާނެ ކަމަށް ވީ ވައުދުވެސް ނުފުއްދޭ ކަމަށް ނާޒިލް ވަނީ ވިދާޅުވެފައެވެ.