ކުރީ ސަރުކާރުން އޯޑަރު ކުރި ރާއްޖޭގެ ފުރަތަމަ ސޯލާރ ފެރީ އެޕްރިލް މަހު ރާއްޖެ ގެންނަނީ
މިއީ މީގެ ތިން އަހަރު ކުރިން ރައީސް އިބްރާހީމް މުހައްމަދު ޞާލިހުގެ ސަރުކާރުން އޯޑަރު ކުރި ފެރީއެއް
ނޭވަލްޓް ކުންފުނިން ރާއްޖެއަށް ބަންނަ "އެޕޯލޯ" މޮޑެލްގެ ފެރިއެއް.
އިންޑިއާގެ އެންމެ ބޮޑު ސޯލާރ އިލެކްޓްރިކް ބޯޓް މެނުފެކްޗަރުން ކަމަށްވާ ނަވަލްޓް އިން ރާއްޖޭގައި ބޭނުންކުރުމަށް އުފައްދާ ސޯލާރ ފެރީ އަންނަ އެޕްރިލް މަހު ރާއްޖެ ގެންނަ ގޮތަށް ހަމަޖެހިފައިވާ ކަމަށް އެ މަސައްކަތްކުރަމުންދާ އިންޑިއާގެ ނޭވަލްޓް ކުންފުނިން ބުނެފި އެވެ.
އެއީ މީގެ ތިން އަހަރު ކުރިން، ރައީސް އިބުރާހީމް މުހައްމަދު ޝާލިހުގެ ސަރުކާރުގައި 2022 ވަނަ އަހަރު އޯޑަރު ކުރި ފެރީއެކެވެ.
ނަވަލްޓްގެ ސީއީއޯ ސަންދިތު ތަންޑަޝެރީއާ ހަވާލާދީ "އިންޑިއަން އެކްސްޕްރެސް" ނޫހުން ބުނެފައި ވަނީ މި ބޯޓު އުފައްދަނީ މޯލްޑިވްސް ފިނޭންސް މިނިސްޓްރީން ލިބުނު އޯޑަރަކަށް ބަލައިގެން ކަމަށާއި ބޯޓުގެ މައި އޮނިގަނޑު މިހާރު ނިމިފައިވާ ކަމަށެވެ.
އަދި ބޯޓުގެ މެއިން ސްޓްރަކްޗަރ މިހާރު ނިމިފައިވާ ކަމަށާއި އިންޓީރިއަރ މަސައްކަތާއި ކުލަ ލުން މާޗުގެ ނިޔަލަށް ނިމޭނެކަމަށް ސަންދިތު ތަންޑަޝެރީއާ އާއި ހަވާލާދީ ރިޕޯޓުގައި ބުނެފައިވެއެވެ. އަދި މިއީ މިފަދަ ޕެސެންޖަރ ފެރީއެއް އެކްސްޕޯޓްކުރަން ތައްޔާރުވަމުންދާ ފުރަތަމަ ފަހަރު ކަމަށް ވެސް ރިޕޯޓުކޮށްފައިވެއެވެ.
"އެޕޯލޯ" ގެ ނަމުން ނަން ދީފައިވާ އެ ސޯލާރ ފެރީއަކީ ރާއްޖޭގެ މާހައުލަށް ހާއްސަކޮށް ބަންނަމުންދާ ފެރީއެކެވެ. މިގޮތުން އެ ފެރީ ބަނދެފައި ވަނީ ކަނޑުގަދައިރު ވެސް ދުއްވަން އެކަށީގެންވާ ގޮތަށެވެ.
މި ބޯޓު މި ތައްޔާރުކުރަނީ ފިނޭންސް މިނިސްޓްރީން އޯޑަރަށް. ބޯޓުގެ މެއިން ސްޓްރަކްޗަރ މިހާރު ވަނީ ނިމިފައި. އިންޓީރިއަރ މަސައްކަތާއި ކުލަ ލުން މާޗުގެ ނިޔަލަށް ނިމޭނެ. މިއީ އަހަރުމެން މިފަދަ ޕެސެންޖަރ ފެރީއެއް އެކްސްޕޯޓްކުރަން ތައްޔާރުވަމުންދާ ފުރަތަމަ ފަހަރު،"އިންޑިއަން އެކްސްޕްރެސް
އެ ސޯލަރ ފެރީގައި 50 ކިލޯވޮޓްގެ މަންޓާ ޑީއެންވީ އެޕްރޫވްޑް އެލްއެފްޕީ ބެޓަރީ ޕެކާ އެކު 40 ކިލޯވޮޓްގެ އިންބޯޑް އިލެކްޓްރިކް މޯޓަރ ހަރުކޮށްފައި ހުރެ އެވެ. އަދި 25 ކިލޯވޮޓްގެ ސޯލާރ ޕެނަލްއެއް ފެރީގެ މަތީގައި ހަރުކޮށްފައި ހުރެ އެވެ.
ފިނޭންސް މިނިސްޓްރީން އޯޑަރު ދީގެން ބަންނަ އެ ސޯލާރ ފެރީއަށް 577,039 ޑޮލަރު ހަރަދުވާ ކަމަށް ރިޕޯޓްތައް ބުނެ އެވެ. އެ ބޯޓުގެ ދިގު މިނުގައި 26 މީޓަރު ހުންނައިރު، ފުޅާ މިނުގައި ހުންނަނީ ހަތް މީޓަރެވެ.
މީގެ އިތުރުން އެއް ފަހަރު ޗާޖުކޮށްގެން 240 ކިލޯމީޓަރަށް ދަތުރުކުރެވޭނެ ކަމަށާއި ރާއްޖެއިން އިތުރު އޯޑަރުތައް ލިބޭނެ ކަމަށް އުއްމީދުކުރާ ކަމަށް ވެސް އެ ނޭވަލް އާކިޗެކްޓާއިން ޑިގްރީ ހާސިލުކޮށްފައިވާ ނޭވަލްޓުގެ ސީއީއޯ އާއި ހަވާލާދީ "އިންޑިއަން އެކްސްޕްރެސް" ނޫހުގައި ރިޕޯޓުކޮށްފައި ވެއެވެ.
މިއީ ރާއްޖޭގައި ބޭނުންކުރާ މިފަދަ ފުރަތަމަ ސޯލާރ ފެރީ އަށް ވާއިރު، އެ ފެރީ ބޭނުންކޮށްގެން ހިދުމަތް ދިނުމަށް ހަމަޖެހިފައިވާ ގޮތެއް މި ސަރުކާރުން މިހާތަނަށް އަދި ހާމަ ނުކުރެ އެވެ.
