ލިވަޕޫލާއި ޕީއެސްޖީ ވާދަކުރަން ޖެހުނުއިރު، ރެއާލް އާއި އެތުލެޓިކޯގެ ކުރިމަތިލުމެއް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ލިވަޕޫލް އާއި ޕެރިސް ސެއިންޓް ޖާމަން (ޕީއެސްޖީ) ވާދަކުރަން ޖެހުނުއިރު، އެންމެ ފަހުގެ ޗެމްޕިއަން ރެއާލް މެޑްރިޑާއި ވާދަވެރި އެތުލެޓިކޯ މެޑްރިޑު ބައްދަލު ކުރަން ޖެހިއްޖެ އެވެ.

އައު ފޯމެޓުގެ ދަށުން ކުޅެމުން އަންނަ ޗެމްޕިއަންސް ލީގުގެ ގަދަ 16 ވަނަ ބުރުން ލިވަޕޫލް ޖާގަ ހޯދީ އެއް ވަނަ ޓީމުގެ ގޮތުގަ އެވެ.

ހުކުރު ދުވަހު ވަނީ ޗެމްޕިއަންސް ލީގުގެ ގަދަ 16 ވަނަ ބުރުގެ ގުރު ނަގައިފަ އެވެ. އެގޮތުން ގަދަ 16 ގައި ލިވަޕޫލް އާއި ޕީއެސްޖީ ބައްދަލު ކުރާއިރު، ޕީއެސްޖީ އަށް މުބާރާތުގެ ގަދަ 16 ވަނަ ބުރުން ޖާގަ ލިބުނީ ޕްލޭ އޮފް މެޗު ކުޅެގެންނެވެ.

ރެއާލް އާއި އެތުލެޓިކޯ ވާދަކުރަން ޖެހުނުއިރު، އެތުލެޓިކޯ އިން ގަދަ 16 ގެ ޖާގަ ހޯދީ ގަދަ އަށް ޓީމުގެ ތެރޭގައި ހިމެނިގެންނެވެ. އަދި ރެއާލް އިން ގަދަ 16 ގެ ޖާގަ ހޯދީ ޕްލޭ އޮފް މެޗުގައި މެންޗެސްޓަރ ސިޓީގެ މައްޗަށް ކުރި ހޯދައިގެންނެވެ.

ގަދަ 16 ވަނަ ބުރުގައި ބާސެލޯނާ ބައްދަލު ކުރަން ޖެހެނީ ބެންފީކާއާ އެވެ. ބާސެލޯނާ އިން ގަަދަ 16ގެ ޖާގަ ހޯދީ ލީގު ބުރުގެ ދެ ވަނަ ޓީމުގެ ގޮތުގަ އެވެ. ބެންފީކާ އިން ވަނީ ޕްލޭ އޮފް މެޗުގައި މޮނާކޯގެ މައްޗަށް ކުރި ހޯދައިފަ އެވެ.

މީގެ އިތުރުން ގަދަ 16 ގައި އާސެނަލް ނިކުންނާނީ ޕީއެސްވީއާ ދެކޮޅަށެވެ. އިންޓަރ މިލާން ނިކުންނާނީ ފެޔެނޫޑާ ދެކޮޅަށެވެ. ގަދަ 16 ގައި ބަޔާން މިއުނިކް ބައްދަލު ކުރަން ޖެހުނީ ވާދަވެރި ބަޔާ ލެވަކޫސަންއާ އެވެ.

ގަދަ 16 ގައި ބޮރޫޝިއާ ޑޯޓްމަންޑާއި. ލީލް ބައްދަލު ކުރަން ޖެހުނުއިރު، އެސްޓަން ވިލާ ނިކުންނާނީ ކުލަބު ބްރޫޖާ ދެކޮޅަށެެވެ.

ޗެމްޕިއަންސް ލީގުގެ ގަދަ 16 ގައި ދެ ލެގު ކުޅޭނެ އެވެ. އެގޮތުން ފުރަތަމަ ލެގުގެ ކުޅުން އޮންނާނީ އަންނަ މާޗު މަހުގެ ހަތަރެއް، ފަހެއް އަދި ހައެއްގަ އެވެ. ދެ ވަނަ ލެގުގެ ކުޅުން އޮންނާނީ 11،12، އަދި 13 ގަ އެވެ.