އިނގިރޭސި ޕްރިމިއާ ލީގުގައި އެސްޓަލް ވިލާއާ ދެކޮޅަށް ކުޅުނު މެޗުން އެއްވަރުވެ، ލިވަޕޫލަށް ޕޮއިންޓަކުން ފުއްދާލަން ޖެހިއްޖެ އެވެ.

އެސްޓަން ވިލާގެ އަމިއްލަ ދަނޑުގައި ބުދަ ދުވަހުގެ ރޭ މި ދެ ޓީމު ބައްދަލު ކުރި މެޗު ނިމުނީ 2-2 އިން އެއްވަރުވެގެންނެވެ. މެޗުގައި ލިވަޕޫލުން ލީޑު ނަގާފައި ވަނިކޮށް، އެސްޓަން ވިލާ އިން ވަނީ ފަހަތުން އަރައި ދެ ލަނޑު ޖަހައިގެން ލީޑު ނަގައިފަ އެވެ. ނަމަވެސް ދެ ވަނަ ހާފުގައި ޖެހި ލަނޑުން ލިވަޕޫލް ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 29 ވަނަ މިނެޓުގައި ލިވަޕޫލަށް ލީޑު ނަގައިދިނީ މިޞްރުގެ ފޯވާޑު މުޙައްމަދު ޞަލާޙު އެވެ. އެއީ ޑިއޭގޯ ޖޮޓާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ފުރަތަމަ ހާފުގެ 38 ވަނަ މިނެޓުގައި ޔޫރީ ޓިއެލަމަންސް ޖެހި ލަނޑުން އެސްޓަން ވިލާ އިން ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި އެސްޓަން ވިލާ އިން ލީޑު ނެގީ އޮލޭ ވަޓްކިންސް ޖެހި ލަނޑުންނެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ލޫކަސް ޑިގްނީ އެވެ.

ދެ ވަނަ ހާފުގައި ލިވަޕޫލުން ވަނީ ލަނޑު ޖަހައި، މެޗުގެ ނަތީޖާ ހަމަހަމަ ކޮށްފަ އެވެ. މެޗުގެ 61 ވަނަ މިނެޓުގައި ޞަލާޙު ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިން ލަނޑު ޖެހީ ޓްރެންޓް އެލެގްޒެންޑާ އާނޯލްޑް އެވެ.

މެޗު އެއްވަރުވެ ޕޮއިންޓެއް ލިބުނު ނަމަވެސް، އެއް ވަނައިގައި ލިވަޕޫލް އޮތީ އަށް ޕޮއިންޓުގެ ލީޑަކުންނެވެ. މިހާތަނަށް ކުޅެފައިވާ 26 މެޗުން ލިވަޕޫލަށް ލިބެނީ 61 ޕޮއިންޓެވެ. ލިވަޕޫލަށް ވުރެ އެއް މެޗު މަދުން ކުޅެގެން ދެ ވަނައިގައި އާސެނަލަށް ލިބެނީ 53 ޕޮއިންޓެވެ.

މެޗުގެ އަދަދު ހަމަކޮށް، ފަރަގު ފަސް ޕޮއިންޓަށް ކުޑަ ކުރުމުގެ ފުރުސަތު އާސެނަލަށް އޮންނާނެ އެވެ.