ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި ޔުވެންޓަސްގެ މައްޗަށް ކުރި ހޯދައި، ޕީއެސްވީން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

ޔުވެންޓަސްގެ އަމިއްލަ ދަނޑުގައި މި ދެ ޓީމު ކުޅުނު ފުރަތަމަ ލެގު އެ ޓީމުން ކާމިޔާބު ކުރީ 2-1 އިންނެވެ. އެހެންކަމުން ޔުވެންޓަސް އަށް ގަދަ 16ގެ އުންމީދު ބޮޑުއިރު، ޕީއެސްވީ އަށް ގަދަ 16 އިން ޖާގަ ލިބެން އޮތީ ދެ ވަނަ ލެގުގައި ޔުވެންޓަސްގެ މައްޗަށް ކުރި ހޯދައިގެންނެެވެ.

ޕީއެސްވީގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު ދެ ވަނަ ލެގުގައި އެ ޓީމުން ވަނީ 3-1 އިން ޔުވެންޓަސް ބަލިކޮށް، މުބާރާތުގެ ގަދަ 16 އިން ޖާގަ ހޯދައިފަ އެވެ.

މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި އިވާން ޕެރިސިޗް ވަނީ ލަނޑު ޖަހައި ޕީއެސްވީ އަށް ލީޑު ނަގައިދީފަ އެވެ. އެއާއެކު އެގްރިގޭޓް ނަތީޖާ ހަމަހަވި އެވެ.

ނަމަވެސް، އޭގެ ދިހަ މިނެޓު ފަހުން ޓިމޯތީ ވިއާ ވަނީ ލަނޑު ޖަހައި ޔުވެންޓަސް އަށް މެޗުގެ ނަތީޖާ އެއްވަރުކޮށް، އެގްރިގޭޓުން ކުރި ހޯދައިދީފަ އެވެ. އޭގެ ފަހުން މެޗުގެ 74 ވަނަ މިނެޓުގައި އިސްމާއީލް ސައިބަރީ ޖެހި ލަނޑުން، އަނެއްކާ ވެސް ޕީއެސްވީ ވަނީ މެޗުގައި ލީޑު ނަގައި، އެގްރިގޭޓް އެއްވަރުކޮށްފަ އެވެ.

މެޗުގެ ފުރިހަމަ ވަގުތު ހަމަވީއިރު، ދެ ޓީމު އެގްރިގޭޓުން އެއްވަރުވެފައި އޮތުމުން ދެން ވަނީ 15 މިނެޓުގެ ދެ ހާފު ކުޅެފަ އެވެ. މެޗުން ޕީއެސްވީ މޮޅުވީ އިތުރު ވަގުތުގެ ފުރަތަމަ ހާފުގައި ރަޔަން ފްލަމިންގޯ ޖެހި ލަނޑުންނެވެ.

މި ނަތީޖާ އާއެކު، ޔުވެންޓަސް ކަޓުވާލައި ޕީއެސްވީން މުބާރާތުގެ ގަދަ 16 ވަނަ ބުރުން ޖާގަ ހޯދީ އެގްރިގޭޓް ނަތީޖާ 4-3 އިންނެވެ.