ދެ ވަނަ ލެގުގައި ވެސް ކުރި ހޯދައި، ރެއާލް ގަދަ 16 އަށް
މޮޅާއެކު ރެއާލް އިން ގަދަ 16 ވަނަ ބުރުގެ ޖާގަ ހޯދީ، ދެ ލެގުގެ އެގްރިގޭޓް ނަތީޖާ 6-3 އިންނެވެ.
މެޗުގައި ލަނޑު ޖެހުމަށްފަހު އެމްބާޕޭ އުފާ ފާޅު ކުރަނީ
ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި ވެސް މެންޗެސްޓަރ ސިޓީ ބަލިކޮށް، އެންމެ ފަހުގެ ޗެމްޕިއަން ރެއާލް މެޑްރިޑުން މުބާރާތުން ގަދަ 16 ވަނަ ބުރުން ޖާގަ ހޯދައިފި އެވެ.
މި ދެ ޓީމު ސިޓީގެ އިއްތިހާދު ސްޓޭޑިއަމްގައި ކުޅުނު ފުރަތަމަ ލެގު ރެއާލް އިން ކާމިޔާބު ކުރީ 3-2 އިންނެވެ. އެހެންކަމުން ރެއާލްގެ ދަނޑުގައި ދެ ވަނަ ލެގަށް ނިކުތްއިރު ވެސް އެ ޓީމަށް ފުރުސަތު އޮތީ ބޮޑުވެފަ އެވެ.
ބުދަ ދުވަހުގެ ރޭ ރެއާލްގެ އަމިއްލަ ދަނޑުގައި ސިޓީއާ ދެކޮޅަށް ކުޅުނު ދެ ވަނަ ލެގު އެ ޓީމުން ކާމިޔާބު ކުރީ 3-1 އިންނެވެ. މެޗުގައި ރެއާލް އިން ތިން ލަނޑު ޖަހާފައި ވަނިކޮށް، ސިޓީން އެއް ލަނޑު ޖެހި އެވެ.
މެޗު ފަށައިގެން ހަތަރު ވަނަ މިނެޓުގައި ރެއާލަށް ކުރި ހޯދައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެއީ ރައުލް އަސެންސިއޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ފުރަތަމަ ހާފުގެ 33 ވަނަ މިނެޓުގައި ރޮޑްރީގޯ ތަނަވަސްކޮށްދިން ފުރުސަތެއްގައި އެމްބާޕޭ ވަނީ ދެ ވަނަ ލަނޑު ޖަހައި، ރެއާލަށް ލީޑު ފުޅާ ކޮށްދީފަ އެވެ.
މެޗުގެ ދެ ވަނަ ހާފުގައި ވެސް ރެއާލުން ލަނޑު ޖަހާނެ ފުރުސަތުތަކެއް ތަނަވަސްކުރި އެވެ. މެޗުގެ 61 ވަނަ މިނެޓުގައި އެމްބާޕޭ ވަނީ ތިން ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަކޮށްފަ އެވެ. އެއީ ފެޑްރިކޯ ވަލްވާޑޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ސިޓީގެ ހަމައެކަނި ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ނިކޯ ގޮންޒާލޭޒް އެވެ.
މޮޅާއެކު ރެއާލް އިން ގަދަ 16 ވަނަ ބުރުގެ ޖާގަ ހޯދީ، ދެ ލެގުގެ އެގްރިގޭޓް ނަތީޖާ 6-3 އިންނެވެ.
