ރައްޔިތުންނަށް ރައްޔިތުންގެ ބާރު ދެމި އޮންނާނީ ޒިންމާދާރު، މިނިވަން ރައްޔިތުން މަޖިލީހެއް އޮވެގެން: އަލީ ހުސެއިން
މަޖިލީހަށް މެމްބަރުން ހޮވާއިރު، އެއީ ޒިންމާދާރުކަމާއި އެކު ރައްޔިތުންގެ ހައްޤުގައި މިނިވަން ކަމާއި އެކު މަސައްކަތް ކުރާނެ ބައެއްތޯ ބަލަން ޖެހޭ
ޤާނޫނީ ވަކީލް އަލީ ހުސެއިން ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަނީ
ގައުމުގެ ރައްޔިތުންނަށް، އެ ރައްޔިތުންގެ ބާރު ފުރިހަމައަށް ލިބި، ރައްޔިތުންގެ ބާރު ދެމިއޮންނާނީ ޒިންމާދާރުކަމާއި އެކު ރައްޔިތުންގެ ހައްޤުގައި މަސައްކަތް ކުރާ މިނިވަން މަޖީލީހެއް އޮވެގެން ކަމަށް ކެންދޫ ދާއިރާގެ ކުރީގެ މަޖިލިސް މެންބަރު، އަދި މަޝްޙޫރު ޤާނޫނީ ވަކީލް އަލީ ހުސެއިން ވިދާޅުވެއްޖެއެވެ.
ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީ އަށް ގެނައި އިސްލާހާއި ގުޅިގެން ރާއްޖެ ޓީވީ ފަލަސުރުޚީ ޕްރޮގްރާމުގައި ވާހަކަދައްކަވަމުން އަލީ ހުސެއިން ވިދާޅުވީ މަޖިލީހަށް މެމްބަރުން ހޮވަން ވޯޓުލާއިރު މަޖިލިހަށް ހޮއްވަވާ ބޭފުޅުން ޒިންމާދާރުކަމާއި އެކު ރައްޔިތުންގެ ހައްޤުގައި މިނިވަން ކަމާއި އެކު މަސައްކަތް ކުރާނެތޯ ގައުމުގެ ރައްޔިތުން ވަރަށް ބޮޑަށް ބަލައި ޔަގީން ކުރަން ޖެހޭނޭ ކަމަށެވެ.
އަލީ ހުސެއިން ވިދާޅުވީ ވެރިކަމުގެ ހުރިހާބާރެއްވެސް ފެށިގެން އަންނަނީ ރައްޔިތުންގެ ކިބައިން ކަމަށާއި އެހެން ކަމުން އެ ބާރުތައް އެގޮތުގައި ދެމިއޮންނާނީ ޒިންމާދާރު، މިނިވަން މަޖިލީހެއް އޮވެގެން ކަމަށެވެ. އަދި އެފަދަ މަޖިލީހެއް އޮންނާނީވެސް ރައްޔިތުން މަޖިލިސް އިންތިޚާބުގައި ވޯޓުލާއިރު، މި ދެންނެވި ކަންކަމަށް ވިސްނައިގެން މެމްބަރުން ހޮވުމުންކަމަށް ވެސް އޭނާ ވިދާޅުވިއެވެ.
އަލީ ހުސެއިން ވިދާޅުވީ ރައްޔިތުންގެ މަންދޫބުން ގެ ގޮތުގައި ތިއްބެވި މަޖިލިސް މެމްބަރުން ސަރުކާރުގެ މެމްބަރުންނަށް ނުވަތަ ޕާޓީގެ މެމްބަރުންނަށް ބަދަލުވީމައި ދެން ދައުލަތެއް ނޯންނާނޭ ކަމަށެވެ.
އަދި އެފަދަ ދައުލަތަކުން ދެން ފެނިގެން ދާނީ ފަސާދައާއި، މުޅި ނިޒާމް ގަޑުބަޑުވެ، ދައުލަތް ދަރަނިވެ، އަވަށްޓެރި ގައުމުތަކުގެ ކުރިމަތީގައި ނާށިގަނޑު ހިފައިގެން ސަލާން ޖަހަން ޖެހޭ ހިސާބަށް ދައުލަތުގެ ކަންކަން ގޮސްފައިވާ ކަމަށް އަލީ ހުސެއިން ވިދާޅުވިއެވެ.
ހަޤީޤަތުގައި ވެސް މި ދައުލަތުގެ ކަންކަން ގޯސްވެގެން މިދިއައީ ރައްޔިތުންގެ މަންދޫބުންނަށް ތިއްބެވި މަޖިލިސް މެމްބަރުން ސަރުކާރުން ކުރާހައި ކަމަކަށް އާން ހޫން ކިޔައިގެން ސަނާކިޔައިގެން ތިބީމައިކެންދޫ ދާއިރާގެ ކުރީގެ މަޖިލިސް މެންބަރު، އަދި މަޝްޙޫރު ޤާނޫނީ ވަކީލް އަލީ ހުސެއިން
އަލީ ހުސެއިން ވިދާޅުވީ ރައްޔިތުންގެ ފަރާތުން މަޖިލީހަށް މެމްބަރުން ހޮވާފައި މި ތިބެނީ ސަރުކާރުން ކުރާ ގޯސްކަންތައްތައް ފާހަގަކޮށް، އެކަންކަން ހުއްޓުވާ، ސަރުކާރު ޖަވާބުދާރީ ކުރުވުމަށް ކަމަށެވެ. އެހެން ކަމުން ސަރުކާރު ޖަވާބުދާރީ ކުރުމަށް މެނުވި މަޖިލިސް ފަންކްޝަން ކޮށްގެން ނުވާނޭ ކަމަށް ވެސް އޭނާ ވިދާޅުވިއެވެ.
އަލީ ހުސެއިން ވިދާޅުވީ ކޮންމެ ދާއިރާއަކުންވެސް މަޖިލީހަށް އިންތިޚާބުވާ މެމްބަރަކަށް އެ ދާއިރާގެ ރައްޔިތުން ގުޅުއްވާފައި ޖަވާބުދާރީ ކުރުވުމަށް ނަސޭހަތްތެރިވާން ޖެހޭ ކަމަށެވެ.
