"ޤާނޫނުއަސާސީ އަށް އިސްލާހު ގެނައުގެ މައްސަލަ ސުޕްރީމްކޯޓަށް ނުބެލޭ ނަމަ މާދަމާ ފާސްކުރާ އިސްލާހަކުން ނިޒާމް ބަދަލުކުރިއަސް ކުރެވޭނެ ކަމެއް ނެތް"
ޤާނޫނުއަސާސީ އަށް ގެންނަ އިސްލާހެއްގެ މައްސަލަ ސުޕްރީމްކޯޓަށް ނުބެލޭނެ ކަމަށް ނިންމައިފި ނަމަ އެކަން ފަހުން ބެލޭނެ ގޮތެއް ނޯންނާނެ ކަމަށް ވަކީލު ވިދާޅުވި
ސުޕްރީމްކޯޓުގެ އަޑުއެހުމުގެ ތެރެއިން
ޤާނޫނުއަސާސީ އަށް ގެންނަ އިސްލާހެއްގެ މައްސަލަ ސުޕްރީމްކޯޓަށް ނުބެލޭނެ ކަމަށް ނިންމައިފި ނަމަ މާދަމާ މަޖިލީހަށް ގެންނަ އެންމެ ބަދަލަކުން ނިޒާމު ބަދަލުކުރިޔަސް އެކަން ބެލޭނެ ގޮތެއް ވެސް ނޮއޮންނާނެ ކަމަށް ޤާނޫނީ ވަކީލް މަހްފޫޒް ސައީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ސިޔާސީ ޕާޓީއަކުން މަޖިލީހުގެ މެމްބަރަކު ވަކިކޮށްފި ނަމަ ނުވަތަ ވަކިވެއްޖެ ނަމަ ރައްޔިތުންގެ މަޖިލީހުގެ ގޮނޑި ގެއްލޭ ގޮތަށް ގާނޫނުއަސާސީ އަށް ގެނެސްފައިވާ އިސްލާހާއި ގުޅިގެން ސުޕްރީމްކޯޓަށް ހުށަހަޅާފައިވާ މައްސަލައިގައި ވަކާލާތު ކުރައްވަމުންނެވެ. ދައުލަތުން ވަކާލާތުކުރައްވާފައި ވަނީ މި މައްސަލަ ސުޕްރީމްކޯޓަށް ނުބެލޭނެ ކަމަށެވެ.
ޤާނޫނުއަސާސީ އަށް އިސްލާހެއް ގެނައުމަށް މަޖިލީހުން ކުރާ ކޮންމެ ކަމަކީ ސުޕްރިމްކޯޓަށް ބެލޭނެ ކަމެއް ކަމަށް އޭނާ ވިދާޅުވިއެވެ.
ޤާނޫނުއަސާސީއަށް ގެންނަ އިސްލާހެއްގެ މައްސަލަ ސުޕްރީމްކޯޓުގައި ނުބެލޭނެ ކަމަށް ނިންމާ، އެފަދަ މައްސަލަތައް ބެލުމުގެ ދޮރު ބަންދުކޮށްލައިފި ނަމަ، އެއީ ދެވަނަ ފަހަރަށް ހުޅުވަން އުނދަނގޫ ދޮރަކަށް ވެގެން ދާނެ ކަމަށް އޭނާ ވިދާޅުވިއެވެ. ޑިމޮކްރެޓިކް މުޖުތަމައުތަކުގައި ނިންމާފައި ހުރި ނިންމުންތައް ބަލައިގަންނަން މި މައްސަލައިގެ ތެރެއިން ފުރުސަތު ލިބޭ ކަމަށް މަހްފޫޒް ވިދާޅުވިއެވެ. އެ ފުރުސަތު ދޫކޮށްލައިފި ނަމަ ސުޕްރީމް ކޯޓަށް މީގެ ފަހުން ހުށަހަޅާ މި ބާވަތުގެ އެއްވެސް މައްސަލަ އެއް ނުބެލޭނެ ކަމަށް މަހްފޫޒް ވިދާޅުވިއެވެ.
ޤާނޫން އަސާސީ އާއި ޚިލާފަށް ކަމެއް ކޮށްފިއްޔާ ބާތިލޭ ވާނީ. ކާކުތޯ ކަނޑައަޅަނީ؟ އިސްލާމް ދީނުގެ އަސްލަކާ ޚިލާފަށް ޤާނޫނެއް ނުހެދޭނެ ކަމަށް އެބަ އޮވޭ. އިސްލާމް ދީނުގެ އަސްލަކާ ޚިލާފުވޭތޯ ކަނޑައަޅަނީ ކާކުތޯ. އަމިއްލަ އަށް އެކަން ކަނޑައަޅާ ނަމަ ޤާނޫނެއް ޤާނޫނުއަސާސީ އެއް އެބަ އޮތްތޯ. ޤާނޫނު ބާތިލްކުރެވޭނީ މަޖިލީހަށް ނޫނީ ސުޕްރީމް ކޯޓެއް.ޤާނޫނީ ވަކީލް މަހްފޫޒް ސައީދު
މި މައްސަލައިގައި ކަންބޮޑުވާ ކަމަކީ އަސާސީ ހައްގުތަކުގެ ބައިގައި ސީދާގޮތުން އަތް ނުލި ކަމުގައި ވީ ނަމަވެސް، ޤާނޫނުއަސާސީގައި ހިމެނޭ މާއްދާތަކުގެ ސަބަބުން މުޅި ދުސްތޫރީ ނިޒާމާއި އަސާސީ ހައްގަށް އުނިކަން އަންނާނެ ފަދަ ބަދަލެއް ގެނެވިދާނެތީ ކަމަށް އޭނާ ވަނީ ވިދާޅުވެފައެވެ.
މިސާލަކަށް ވަޒީރުންގެ މަޖިލީހުގެ މެމްބަރުންނަކީ ރައްޔިތުންގެ މަޖިލީހުގެ މެމްބަރުންނަށް ވާން ޖެހޭ ކަމަށް ވަޒީރުންގެ ޝަރުތުރުތަކުގެ ތެރޭގައި ހިމެނުމުން، ޤާނޫނުއަސާސީ އެކުލަވާލަން ނެގި ނިޒާމީ ވޯޓުގެ ބާރު ކަނޑުވާލެވުނީ ކަމަށް އޭނާ ވިދާޅުވިއެވެ. މަޖިލީހުން ގެންނަ އެފަދަ ބަދަލަކުން މުޅި ނިޒާމް ބަދަލުކޮށްލިޔަސް، ޤާނޫނުއަސާސީ އަށް ގެންނަ ބަދަލުތައް ސުޕްރީމްކޯޓަށް ނުބެލޭ ނަމަ އެފަދަ މައްސަލަތައް ބެލޭނެ ގޮތެއް ނޯންނާނެ ކަމަށް މަހްފޫޒް ވިދާޅުވިއެވެ.
ރާއްޖޭގެ ޤާނޫނުއަސާސީ އާއި ޚިލާފަށް ކުރާ ކަންކަން ބާތިލް ކަމަށް ޤާނޫނުއަސާސީގައި ކަނޑައަޅާފައިވާ އިރު އެއީ ބާތިލް ކަމެއްކަން ނިންމާނީ ކޮން ފަރާތަކުންތޯ އޭނާ ސުވާލުކުރެއްވިއެވެ.
