"މިހާރު ކަންކަން ހިނގަމުން ދަނީ ކުރީގެ ޤާނޫނުއަސާސީ އާއި އެއް ގޮތަށް ހުރިހާ ކަމެއްގެ ބާރު ރައީސުލްޖުމްހޫރިއްޔާ އަށް ލިބޭ ގޮތަށް "

ޕާޓީ ބަދަލުކުރުމުން މެމްބަރުންގެ ގޮނޑި ގެއްލޭ ގޮތަށް ހުށަހެޅި އިސްލާހުގެ ސަބަބުން މިހާރު ބާރުތައް އެއްވެ ކަންކަން ހިނގަމުން ދަނީ ކުރީގެ ޤާނޫނުއަސާސީ އާއި އެއް ގޮތަށް ހުރިހާ ކަމެއްގެ ބާރު ރައީސުލްޖުމްހޫރިއްޔާ އަށް ލިބޭ ގޮތަށް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެއެވެ.

އޭނާ އެފަދައިން ވިދާޅުވީ ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާއި ގުޅިގެން ސުޕްރީމް ކޯޓަށް ހުށަހަޅާފައިވާ މައްސަލަ އާއި މެދު ވާހަކަދައްކަވަމުންނެވެ.

ސުޕްރީމްކޯޓު ސަރަހައްދުގައި ހުންނަވާ ހޯމަ ދުވަހު ރާއްޖެއެމްވީ އަށް ދެއްވި ބަސްތީގަތުމެއްގައި، ހޯމަ ދުވަހު ވެސް މަޖިލީހުން ފެނިގެން ދިޔައީ ޤާނޫނުއަސާސީ އަށް ގެނެސްފައިވާ އިސްލާހުގެ އަސަރު ކަމަށް އޭނާ ވަނީ ވިދާޅުވެފައެވެ.

ހޯމަ ދުވަހުގެ މަޖިލީހުގެ ޖަލްސާގައި އިލެކްޝަންސް ކޮމިޝަނުގެ ރައީސަކަށް މުޙައްމަދު ޒާހިދު އަދި ނައިބު ރައީސަކަށް ޢަބްދުއްރަޙްމާން ޞަލާޙް ރަޝީދު އައްޔަން ކުރެއްވުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ. އެ ބޭފުޅުންނަށް ރުހުން ދިނުމުގެ މައްސަލަ ކުރިއަށް ގެންދިޔަ އިރު މަޖިލީހުގައި ތިއްބެވީ ރައީސުލްޖުމްހޫރިއްޔާ ފޮނުއްވި ނަމަށް ވޯޓުލާން ތިބީ އެ މަނިކުފާނު ބޭނުންވާ ހާލަތެއްގައި ގޮނޑި ގެއްލުވާލުމުގެ ފުރުސަތު އޮތް މެމްބަރުންތަކެއް ކަމަށް ޒިޔާދު ވިދާޅުވިއެވެ.

އެ ހާލަތުގައި ތިބެގެން މެމްބަރުން ދޭ ވޯޓަކުން އައްޔަންކުރާ މެމްބަރުންތަކެއް އިލެކްޝަންސް ކޮމިޝަންގައި ތިބެގެން ދެން ބާއްވާ އިންތިޚާބެއްގެ މިނިވަންކަމާއި މެދު އާއްމު ރައްޔިތުން ސުވާލު އުފައްދާ ކަމަށް ޒިޔާދު ވަނީ ވިދާޅުވެފައެވެ. ހަމައެހެންމެ އެންޓި ކޮރަޕްޝަން ކޮމިޝަން އަށް މެމްބަރުން އައްޔަންކުރާ އިރު ވެސް އެ މަޤާމަށް މީހަކު އައްޔަންކުރުމަށް ރުހުން ދެނީ ރައީސްގެ ކޮންޓްރޯލްގެ ދަށުގައި ތިބި މެމްބަރުން ކަމަށް ޒޔާދު ވިދާޅުވިއެވެ.

ފަހުގެ ޤާނޫނުއަސާސީ ލިޔުނު އިރު ބާރުތައް ވަކިކުރީ އެހެންވެގެންތާ. އޭގެ ކުރިން ވެސް އިލެކްޝަންސް ކޮމިޝަނެއް ހުރޭ. މިނިވަން ވަކި މުއައްސަސާއެއް ގޮތުގައި އޭސީސީވެސް އެހެން ކޮމިޝަންތައް ވެސް ބޭއްވީ މި ޤާނޫނުއަސާސީން. އެހެންނަމަވެސް ޤާނޫނުއަސާސީ އަށް ގެނައި އިސްލާހުގެ ނަތީޖާ އަކީ މެމްބަރުން ތިބީ ތަޅު އެޅުވިފައި.

ވައިކަރަދޫ ދާއިރާގެ މެމްބަރު ހުސެއިން ޒިޔާދު

މެންބަރުކަން ގެއްލޭ ގޮތަށް ގާނޫނު އަސާސީއަށް ގެނައި ބަދަލުގެ މައްސަލަ ހޯމަ ދުވަހު ސުޕްރީމް ކޯޓުގައި ވަނީ ފަށާފައެވެ.

މި މައްސަލައިގައި ހަވާލާދީފައިވާ ގަޒިއްޔާ އަކީ، 20 ނޮވެމްބަރު 2024 ގައި ރައީސުލްޖުމްހޫރިއްޔާ ތަސްދީގުކޮށްފައިވާ ގާނޫނު ނަންބަރު 25/2024 (ގާނޫނުއަސާސީ އަށް 6 ވަނަ އިސްލާހު ގެނައުމުގެ ގާނޫނު) ގެ ދަށުން، ރައްޔިތުންގެ މަޖިލީހުގެ މެމްބަރަކު އިންތިހާބުވާ ސިޔާސީ ޕާޓީ ބަދަލުކޮށްފިނަމަ، ނުވަތަ އެ މެމްބަރަކު ސިޔާސީ ޕާޓީ އިން ވަކިކޮށްފިނަމަ، މެމްބަރުކަމުން ވަކިވާ ގޮތަށް، ގާނޫނުއަސާސީގެ 73 ވަނަ މާއްދާ އަށް ގެނެސްފައިވާ ބަދަލުތައް، ގާނޫނުއަސާސީގެ އަސާސީ އޮނިގަނޑާ ހިލާފު ކަމަށް ދެކިގެން، އެ މާއްދާ ބާތިލު ކޮށްދިނުމަށް އެދި ހުށަހެޅުމުން ބަލަމުންދާ މައްސަލައެކެވެ.