މުޅި ރޯދަމަސް އެކީ ރައްޔިތުންގެ މަޖިލިސް ޗުއްޓީ އަށް ދާން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ނިސްބަތްވާ މަޖިލިސް މެމްބަރުން ދެކޮޅު ކަމަށް މެމްބަރުން ވިދާޅުވެއްޖެ އެވެ.

އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވީ، ރަމަޟާން މަސް އެކުގައި މަޖިލިސް ބަންދު ކުރަން ތާއީދު ނުކުރައްވާ ކަމަށެވެ.

"މިކަން ކުރަން އުޅޭ މަގްސަދެއް ސާފެއް ނޫން، ސަރުކާރާއި، ޕްރައިވެޓް ސެކްޓަރ ވެސް ރޯދަ މަހު މަސައްކަތް ކުރޭ، އެހެން އެކަން އޮއްވާ މަޖިލިސް ބަންދު ކުރަން ޖެހޭ ސަބަބެއް ނެތް؛" ކަމަށް ނާޒިލް ވިދާޅުވިއެވެ.

އެމްޑީޕީގެ ޕާލިމެންޓަރީ ގުރޫޕްގެ ޑެޕިއުޓީ ލީޑަރު ހުސެއިން ޒިޔާދު (ފިއްޓޭ) ވިދާޅުވީ، އެއީ އެއް ގޮތަކަށް ވެސް ކުރަން އެއްބަސްވާނެ ކަމެއް ނޫން ކަމަށާއި، އެކަމާ އެމްޑީޕީގެ ޕާލިމެންޓަރީ ގްރޫޕްގެ ހުރިހާ މެމްބަރުން ވެސް ދެކޮޅު ހަދާ ކަމުގައެވެ.

"ދުވާލަކު އެންމެ ދެ ގަޑި އިރު މަސައްކަތް ކުރަން މި ޖެހެނީ، އެވަރު ވަގުތު ކޮޅަކަށް މަސައްކަތް ނުކުރެވެން ޖެހޭ ސަބަބެއް ނެތް؛" ކަމަށް ފިއްޓޭ ވިދާޅުވިއެވެ.

އެމްޑީޕީގެ ސުޕަރ މެޖޯރިޓީ އޮތް 19 ވަނަ މަޖިލިހުގައި ވެސް ރޯދަ މަހު މަސައްކަތް ކުރިއަށް ގެންދިޔަ ކަން ފިއްޓޭ ވެސް ނާޒިލް ވެސް ފާހަގަ ކުރެއްވިއެވެ.

މައުލޫމާތު ލިބިފައިވާ ގޮތުގައި، ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަޣުލަބިއްޔަތު އޮންނަ އާންމު ކޮމިޓީން ބުރާސްފަތި ދުވަހު ވަނީ ރޯދަ މަހު މަޖިލިސް ބަންދު ކުރަން ފާސް ވެސް ކޮށްފައެވެ.

އާންމު ކޮމިޓީގައި 11 މެމްބަރުން ތިއްބަވާއިރު، އެ ކޮމިޓީގައި ހިމެނެނީ އެމްޑީޕީ ގެ އެންމެ މެމްބަރެކެވެ. އެއީ ކަނޑިތީމު ދާއިރާގެ މެމްބަރު އަމީން ފައިސަލް އެވެ. އޭގެ އިތުރުން ކޮމިޓީގައި އެންމެ އަމިއްލަ މެމްބަރެއް ހިމެނިވަޑައިގަންނަވައެވެ. ދެން ތިއްބަވަނީ ޕީއެންސީ އަށް ނިސްބަތްވާ 9 މެމްބަރުންނެވެ.

މި ކަމާ ބެހޭ ގޮތުން ރާއްޖެޓީވީ އާ ވާހަކަ ދައްކަވަމުން އަމީން ވިދާޅުވީ، އާންމު ކޮމިޓީން ފާސް ކުރި ނަމަވެސް އެ ގޮތައް ފާސް ކުރަން އޭނާ ވޯޓު ނުދެއްވާ ކަމަށެވެ.

"ޕްރައިވެޓް ސެކްޓަރ ވެސް، ސިވިލް ސާވިސް ވެސް ރޯދަ މަހު މަސައްކަތް ކުރޭ، ދެން ކީއްވެތޯ އެންމެ 2 ގަޑިއިރު ރައްޔިތުންގެ މަޖިލިސް މެމްބަރުންނަށް މަސައްކަތް ނުކުރެވޭންވީ؟" އަމީން ވިދާޅުވިއެވެ.

"ރަމަޟާން މަހު މުސްލިމުންގެ ބޮޑެތި ހަނގުރާމަތައް ވެސް ހިނގާފައި އެބަހުރި، މަސައްކަތް ކުރުން ހުއްޓާލަން ޖެހޭ މަހެއް ނޫން އެއީ، މަޖިލިސް މެމްބަރުންނަށް ދެ ގަޑިއިރު މަސައްކަތް ކުރަން ބުރަވާން ޖެހޭ ސަބަބެއް ނެތް؛" އަމީން ފާހަގަ ކުރެއްވިއެވެ.

އަމީން އިތުރަށް ވިދާޅުވީ، މަޖިލިސް ޗުއްޓީން އައީ ވެސް ދާދި ފަހުން ކަމަށާއި، އަނެއްކާ މިހާ އަވަހަށް އެއް މަސް ދުވަހުގެ ޗުއްޓީ އެއް ނަގަން އެމްޑީޕީ މެމްބަރުން ތާއީދު ނުކުރާ ކަމަށެވެ.

ރޯދަ މަސް ބަންދު މަހެއްގެ ގޮތުގައި ކަނޑައަޅަން އާންމު ކޮމިޓީގެ ބައްދަލުވުމުގައި ޕީއެންސީ ގެ ހުރިހާ މެމްބަރުން ވޯޓު ދެއްވި ކަން އަމީން ފާހަގަ ކުރެއްވިއެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި، ޕީއެންސީގެ ޕާލިމެންޓަރީ ގުރޫޕުން ވެސް މިހާރު ވަނީ ރޯދަ މަހަކީ މަޖިލިހުގައި މަސައްކަތް ނުކުރާ މަހަކަށް ހެދުމަށް ފާސް ކޮށްފައެވެ.

މި ކަމާ ބެހޭ ގޮތުން ވާހަކަ ދެއްކެވި އެމްޑީޕީގެ ޕާލިމެންޓަރީ ގްރޫޕް ގެ މެމްބަރުން ވިދާޅުވީ، ރޯދަ މަސް ބަންދު ކުރުމާ ދެކޮޅު ހަދާ ޕާލިމެންޓަރީ ގްރޫޕުން ބަޔާނެއް ނެރުމަށް ތައްޔާރުވަމުން ދާ ކަމުގައެވެ.

ރޯދަ މަހަކީ ބަންދު މަހެއްގެ ގޮތުގައި ކަނޑައަޅަން މަޖިލިހުގެ އާންމު ކޮމިޓީން ނިންމުމަށް ފަހު އެ ގޮތައް ފާސް ކުރުމަށް މަޖިލިހުގެ ތަޅުމަށް ހުށަހަޅަން ޖެހޭނެއެވެ.

ބެލެވޭ ގޮތުގައި ރޯދަ މަހު މަސައްކަތް ކުރާ ގޮތައް އޮތް ނަމަވެސް ގިނަ ވެގެން ބޭއްވޭނީ އެންމެ 8 ޖަލްސާ އެވެ.