ސެމީގައި ބާާސެލޯނާ އާއި އެތުލެޓިކޯ އަދި ރެއާލް އާއި ސޮސިއެޑާޑު
13 ފެބުރުއަރީ 2025 | ބުރާސްފަތި 07:06ސެމީ ފައިނަލްގެ ފުރަތަމަ ލެގު އޮންނާނީ މި މަހުގެ 26 ވަނަ ދުވަހު އަދި 27 ވަނަ ދުވަހު އެވެ. އަދި ދެ ވަނަ ލެގު އޮންނާނީ އޭޕްރީލް މަހުގެ ދެ ވަނަ ދުވަހު އަދި ތިން ވަނަ ދުވަހު އެވެ.
ކޮޕާ ޑެލް ރޭގެ ތަށި
ސްޕެނިޝް ކޮޕާ ޑެލް ރޭ ފުޓުބޯޅަ މުބާރާތުގެ ސެމީ ފައިނަލްގައި ބާސެލޯނާ އާއި އެތުލެޓިކޯ މެޑްރިޑު ވާދަކުރަން ޖެހުނުއިރު، އަނެއް ސެމީ ފައިނަލްގައި ރެއާލް މެޑްރިޑާއި ރެއާލް ސޮސިއެޑާޑް ބައްދަލު ކުރަން ޖެހިއްޖެ އެވެ.
ކޮޕާ ޑެލް ރޭ ސެމީ ފައިނަލްގެ ގުރު ނަގާފައިވާއިރު، ސެމީ ފައިނަލްގެ ފުރަތަމަ ލެގު އޮންނާނީ މި މަހުގެ 26 ވަނަ ދުވަހު އަދި 27 ވަނަ ދުވަހު އެވެ. އަދި ދެ ވަނަ ލެގު އޮންނާނީ އޭޕްރީލް މަހުގެ ދެ ވަނަ ދުވަހު އަދި ތިން ވަނަ ދުވަހު އެވެ.
ފެބްރުވަރީ 27 ގައި ބާސެލޯނާ އާއި އެތުލެޓިކޯގެ ފުރަތަމަ ލެގު އޮތީ ބާސެލޯނާގެ ދަނޑުގަ އެވެ. އަދި އޭޕްރީލް ދެ ވަނަ ދުވަހު ދެ ވަނަ ލެގު އޮތީ އެތުލެޓިކޯގެ ދަނޑުގަ އެވެ. ފެބްރުވަރީ 28 ގައި ރެއާލް އާއި ސޮސިއެޑާޑުގެ ފުރަތަމަ ލެގު އޮތީ ސޮސިއެޑާޑުގެ ދަނޑުގަ އެވެ. އަދި އޭޕްރީލް މަހުގެ ތިން ވަނަ ދުވަހު ދެ ވަނަ ލެގު އޮތީ ރެއާލްގެ އަމިއްލަ ދަނޑުގަ އެވެ.
ބާސެލޯނާާ އަކީ ކޮޕާ ޑެލް ރޭ މުބާރާތް އެންމެ ގިނަ ފަހަރު ކާމިޔާބު ކޮށްފައިވާ ޓީމެވެ. އެ ޓީމުން ވަނީ 31 ފަހަރު އެ މުބާރާތް ކާމިޔާބު ކޮށްފަ އެވެ. ރެއާލުން ވަނީ 20 ފަހަރެއްގެ މަތިން އެ މުބާރާތް ކާމިޔާބު ކޮށްފަ އެވެ. އެތުލެޓިކޯ އިން 10 ފަހަރު ކޮޕާ ޑެލް ރޭ ކާމިޔާބު ކޮށްފައިވާއިރު، ސޮސިއެޑާޑުން ވަނީ ދެ ފަހަރެއްގެ މަތިން އެ މުބާރާތް ކާމިޔާބު ކޮށްފަ އެވެ.
