އޮމްރޯންގެ އުފެއްދުންތައް މެޑްޓެކްއިން ރާއްޖޭގެ ބާޒާރަށް ތަޢާރަފްކޮށްފި
އެ ކުންފުނިން ރާއްޖޭގެ ބާޒާރަށް ރަނގަޅު އުފެއްދުންތަކެއް ނެރެން ގިނަ މަސައްކަތްތަކެއް ކުރެވުނު
އޮމްރޯން ހެލްތް ކެއަރ އުފެއްދުންތައް ރާއްޖޭގެ ބާޒާރަށް ނެރުމަށް ބޭއްވި ރަސްމިޔާތުގެ ތެރެއިން
ދުނިޔޭގެ ހެލްތް ކެއަރ ޕްރޮޑަކްސް އުފައްދާ ކުންފުނި އޮމްރޯންގެ އުފެއްދުންތައް މެޑްޓެކްއިން ރާއްޖޭގެ ބާޒާރަށް ތަޢާރަފްކޮށްފި އެވެ.
ޖަޕާނުގެ ކުންފުންޏެއްކަމަށްވާ އޮމްރޯންގެ ހެލްތް ކެއަރ ޕްރޮޑަކްޓްސް ރާއްޖެއަށް ތައާރަފްކުރީ އެކަމަށް ބޭއްވި ޚާއްސަ ރަސްމިއްޔާތެއްގައި ހޯމަ ދުވަހުގެ ހެނދުނު ގައެވެ.
އޮމްރޯންގެ ހެލްތް ކެއަރ ޕްރޮޑަކްޓްސް ރާއްޖެއަށް ތައާރަފްކުރުމަށް ހޮޓެލް ޖެންގައި ބޭއްވި މި ރަސްމިއްޔާތުގައި އެކަމުގެ އެއްބަސްވުމުގައި މެޑްޓެކް ކުންފުނީގެ ފަރާތުން ސޮއިކުރެއްވީ ޗީފް އެގްޒެކްޓިވް އޮފިސަރ އަދި މެނޭޖިންގ ޑިރެކްޓަރ މުބާހް ރަފީއު އެވެ. އަދި އޮމްރޯން ހެލްތްކެއަރގެ ފަރާތުން ސޮއިކުރެއްވީ އޮމްރޯން ހެލްތްކެއަރ އިންޑިއާގެ މެނޭޖިންގ ޑިރެކްޓަރ ޓެޓްސުޔާ ޔަމަޑާ އެވެ.
މިކަމާއި ގުޅިގެން މެޓްޑެކްއިން ބުނީ އެ ކުންފުނިން ރާއްޖޭގެ ބާޒާރަށް ރަނގަޅު އުފެއްދުންތަކެއް ނެރެން ގިނަ މަސައްކަތްކެއް ކުރެވުނު ކަމަށެވެ. އަދި މިއީ އެ ކުންފުނިން ރާއްޖޭގެ ބާޒާރަށް ފެންވަރު ރަނގަޅު ހެލްތް ކެއަރ ޕްރޮޑަކްޓްސް ތަޢާރަފްކުރުމަށް ކުރާ މަސައްކަތަށް ލިބިގެންދިޔަ ބޮޑު ކުރިއެރުމެއް ކަމަށެވެ.
އަދި މިއީ އެ ކުންފުނިން އާންމު ރައްޔިތުނަށް ރަނގަޅު ހެލްތް ޕްރޮޑަކްޓެއް ހޯދުމަށް ފަސޭހަކޮށްދިނުމަށާއި ގޭތެރޭގައި ފަސޭހަކަމާއި އެކު، ހެލްތު މޮނިޓަރކުރެވޭނެ އާލާތްތައް ފޯރުކޮށްދިނުމަށް އެ ކުންފުނިން ކުރާ މަސައްކަތުގެ ދަށުން ކުރެވިގެންދިޔަ މުހިންމު މަސައްކަތެއް ކަމަށް ވެސް މެޑްޓެކްއިން ވަނީ ފާހަގަކޮށްފަ އެވެ.
އޮމްރޯންއަކީ ދުނިޔޭގައިވެސް ފާހަގަކޮށްލެވޭ އަމިއްލައަށް އެމީހެއްގެ ސިއްހަތު މޮނިޓަރ ކޮށް, ދުޅަހެޔޮކަންމަތީ ހުރުމަށް ބާރުއަޅާ ހެލްތް ކެއަރ ޕްރޮޑަކްޓްސް އުފައްދާ ކުންފުންޏެކެވެ.
