ހިފާފައިވާ ހުޅަނގު އައްސޭރީ ގައި އިސްރާއީލުން ހިންގަމުން ދަނީ ނަސްލު ނައްތާލުމުގެ އޮޕަރޭޝަނެއް ކަމަށް ފަލަސްޠީނުގެ ރައީސް މަޙްމޫދު އައްބާސްގެ އޮފީހުން ހޯމަ ދުވަހު ނެރުނު ބަޔާނެއް ގައި ބުނެ، އިސްރާއީލުގެ އަމަލުތައް ކުށްވެރިކޮށްފައިވެއެވެ.
ފަލަސްޠީނުގެ ޞިއްޙީ ވުޒާރާއިން ބުނެފައިވަނީ މިއަހަރު މިހާތަނަށް އިސްރާއީލުގެ ބާރުތަކުން އެ ސަރަޙައްދުގައި 70 މީހުން ޝަހީދު ކޮށްލާފައިވާ ކަމަށެވެ.
ފަލަސްތީނު ސަރުކާރުގެ ތަރުޖަމާނު ނަބީލް އަބޫ ރުދައިނާ ގެ ބަޔާނުގައި ބުނެފައިވަނީ، "ވެސްޓް ބޭންކުގައި ފަލަސްޠީނު ރައްޔިތުންނާ ދެކޮޅަށް އިސްތިއުމާރީ ބާރުން ފުޅާކުރަމުންދާ ހަނގުރާމަ ކުށްވެރިކުރަމެވެ. މިއީ ފަލަސްތީނު ރައްޔިތުން ނައްތާލުމަށާއި ނަސްލު ފުހެލުމަށް އަމާޒުކޮށްގެން ހިންގާ ރޭވުންތެރި ޕްލޭނެކެވެ."
ފަހުން ރާމަﷲގައި ހުންނަ ފަލަސްޠީނުގެ ޞިއްޙީ ވުޒާރާއިން ބުނެފައިވަނީ "މިއަހަރު މިހާތަނަށް ހުޅަނގު އައްސޭރީގައި 70 މީހުން ޝަހީދު ވެފައިވާ" ކަމަށެވެ. މީގެ ތެރޭގައި 10 ކުޑަކުދިންނާއި، އެއް އަންހެނަކާއި، އުމުރުން ދުވަސްވީ ދެ މީހުން ހިމެނެއެވެ.
ހިސާބުތަކުން ދައްކާގޮތުގައި ހުޅަނގު އައްސޭރީގެ އުތުރުގައިވާ ޖެނިންގައި 38 މީހުންނާއި ޠޫބާސްގައި 15 މީހުން ވަނީ މަރުވެފައިވެއެވެ. އިސްރާއީލުން ހިފާފައިވާ އިރުމަތީ ޖެރޫސަލަމްގައި އެކަކު މަރުވެފައިވާކަމަށް ބުނެފައިވެއެވެ.
ޖެނުއަރީ 21 ވަނަ ދުވަހު އިސްރާއީލުގެ އަސްކަރިއްޔާ އިން ހުޅަނގު އައްސޭރީގައި ބޮޑު އޮޕަރޭޝަނެއް ފެށިއެވެ. މިއީ ޖެނިން ސަރަޙައްދުން ފަލަސްޠީނުގެ ހަތިޔާރުއެޅި ގްރޫޕްތައް ނައްތާލުމަށް ހިންގާ އޮޕަރޭޝަނެއް ކަމަށް ބުނެފައިވެއެވެ.
"އަޅުގަނޑުމެން އެމެރިކާ ސަރުކާރަށް މި ގޮވާލަނީ މާ ލަސްވުމުގެ ކުރިން، އަޅުގަނޑުމެންގެ ރައްޔިތުންނާއި އަޅުގަނޑުމެންގެ ބިމާ ދެކޮޅަށް ހިންގަމުންދާ އިސްރާއީލުގެ އަނިޔާވެރިކަން ހުއްޓުވުމަށް އަވަސް ފިޔަވަޅު އަޅަން," އަބޫ ރުދައިނާ ފަލަސްޠީނު ރަސްމީ ނޫސް އޭޖެންސީ ވާފާއަށް ދިން ބަޔާނެއްގައި ބުނެފައިވެއެވެ.
މި ބަޔާން ނެރުނު އިރު އިސްރާއީލުގެ ބޮޑު ވަޒީރު ނަތަންޔާހޫ އުޅުއްވަނީ އެމެރިކާގެ ރައީސް ޓްރަމްޕް އާ ބައްދަލު ކުރައްވަން ވޮޝިންގޓަން އަށް ކުރައްވާ ދަތުރުފުޅުގައެވެ.
އާދިއްތަ ދުވަހު، އިސްރާއީލުގެ ސިފައިންގެ ފަރާތުން ބުނެފައިވަނީ ޖެނުއަރީ 21 ވަނަ ދުވަހު ފެށުނު އޮޕަރޭޝަނާއި އޭގެ ކުރީ ހަފުތާގައި ދިން ވައިގެ ހަމަލާތަކުގައި 50 އަށްވުރެ ގިނަ "ޓެރަރިސްޓުން" މަރާލެވިފައިވާ ކަމަށެވެ.
