ކުރީގެ ރައީސް އިބްރާހިމް މުހައްމަދު ޞާލިހުގެ އަނބިކަނބަލުން ފަޒްނާ އަޙުމަދުގެ މަންމާފުޅު، ޒަމީރާ އުމަރުގެ މޫނު ދެއްކުން ހޮނިހިރު ދުވަހުގެ މެންދުރު ފަހު ތިނަކުން ފެށިގެން ކުރިއަށް ގެންދާ ގޮތަށް ހަމަޖައްސައިފި އެވެ.
ފަޒްނާގެ މަންމާފުޅު، ޒަމީރާ އަވަހާރަވެފައި ވަނީ ހުކުރު ދުވަހުގެ ވަގުތެއްގަ އެވެ. ޒަމީރާ އަވަހާރަވެފައި ވަނީ އާލާސްކަންފުޅާ އުޅުއްވާތީ، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި ފަރުވާ ދެއްވަމުން ގެންދަވަނިކޮށެވެ.
ޒަމީރާގެ މޫނު ދެއްކުން ހޮނިހިރު ދުވަހުގެ މެންދުރު ފަހު ތިނަކުން ފެށިގެން ކުރިއަށް ގެންދާއިރު، ޖަނާޒާ އޮތީ މަޣްރިބް ނަމާދަށްފަހު އެވެ. ކަށުނަމާދު ކުރުމަށް ހަމަޖެހިފައި ވަނީ އިސްލާމީ މަރުކަޒުގަ އެވެ. އަދި ވަޅުލުމަށް ހަމަޖެހިފައި ވަނީ އާސަހަރައިގަ އެވެ. ޒަމީރާ އަވަހާރަވީއިރު އުމުރުފުޅުން 81 އަހަރެވެ.
ޒަމީރާ އުމަރު އަކީ ކުރީގެ ރައީސް މުހައްމަދު ނަޝީދުގެ ބޮޑުދައިތާފުޅު ވެސްމެއެވެ. ޒަމީރާ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަދި ނައިބު ރައީސް އަލްއުސްތާޛް ޙުސެއިން މުޙައްމަދު ލަޠީފްގެ އިތުރުން، ގިނަ ބަޔަކު އަންނަނީ އެ އާއިލާ އަށް ތައުޒިޔާ ފޮނުއްވަމުންނެވެ.
