ބާސެލޯނާގެ އެއްބަސްވުން ޕެޑްރީ އައު ކޮށްފި

ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ޕެޑްރީ، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

އުމުރުން 22 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2020 ވަަނަ އަހަރު އެވެ. ލަސް ޕަލްމާސްގައި ހުރުމަށްފަހު އޭނާ ބާސެލޯނާ އަށް ބަދަލުވީއިރު، އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުވެ މުއްދަތު ހަމަވާން އޮތީ 2026 ވަނަ އަހަރު އެވެ.

ނަމަވެސް އެއްބަސްވުމުގައި ބާކީ އެއް އަހަރު އޮއްވާ، ޕެޑްރީ ވަނީ ބާސެލޯނާގެ އެއްބަސްވުން އައު ކޮށްފަ އެވެ. ބާސެލޯނާ އާއެކު ޕެޑްރީ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ.

ބާސެލޯނާގެ އަައު އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ޕެޑްރީ ބުނެފައި ވަނީ، އެ ކުލަބަކީ އަބަދު ވެސް އޭނާ އެންމެ ކުޅެން ބޭނުންވާ ކުލަބު ކަމަށެވެ. އެހެންކަމުން ބާސެލޯނާގެ އެއްބަސްވުން އައުކޮށް، އިތުރު އަހަރުތަކެއް އެ ކުލަބުގައި ހޭދަކުރުމުގެ ފުރުސަތު ލިބުމުން އިންތިހާ އަށް އުފާވާ ކަމަށް ވެސް ޕެޑްރީ ބުނެފައިވެ އެވެ.

ޕެޑްރީ ވަނީ މިހާތަނަށް ބާސެލޯނާ އަށް ކުޅެދިން 174 މެޗުގައި 24 ލަނޑު ޖަހައިފަ އެވެ. ބާސެލޯނާ އާއެކު އޭނަ ވަނީ ހަތަރު ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގާއި، ކޮޕާ ޑެލް ރޭގެ އިތުރުން ސްޕެނިޝް ސުޕަ ކަޕް އެވެ. މީގެ ތެރެއިން ސްޕެނިޝް ސުޕަ ކަޕް ވަނީ ދެ ފަހަރެއްގެ މަތިން ކާމިޔާބު ކޮށްފަ އެވެ.

ބާސެލޯނާ އިން މިހާރު މަސައްކަތް ކުރަމުން އަންނަނީ އެ ޓީމުގައި ތިބި ޒުވާން ކުޅުންތެރިންގެ އެއްބަސްވުން އައު ކުރުމަށެވެ. ޕެޑްރީ އަކީ ބާސެލޯނާގައި ތިބި ކުޅުންތެރިންގެ ތެރެއިން އެ ޓީމުގައި އެންމެ މުހިންމު އެއް ކުޅުންތެރިޔާ އެވެ. ކުރީގެ ކޯޗު ޒަވީ ހެނާންޑޭޒް ވެސް އަދި މިހާރުގެ ކޯޗު ހަންސީ ފްލިކް ވެސް އެންމެ ބޮޑު އިސްކަމެއް ދޭ ކުޅުންތެރިންގެ ތެރޭގައި ވެސް ޕެޑްރީ ހިމެނެ އެވެ.