ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އުވާލައި އެ ޕާޓީ ސިޔާސީ ޕާޓީގެ ދަފްތަރުން އުނިކުރިކުރުމަށް ކޮމިޝަނުން ނިންމައިފިއެވެ.

އިލެކްޝަންސް ކޮމިޝަނުން ބުނީ ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) ގެ 30 ވަނަ މާއްދާގެ (ހ)ގެ 2 ވަނަ ނަންބަރުގައިވާ ގޮތުގެމަތިން ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް މި ކޮމިޝަނަށް ހުށަހަޅާފައިވާތީ، މިއަދުން ފެށިގެން ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އުވާލައި އެ ޕާޓީ ސިޔާސީ ޕާޓީގެ ދަފްތަރުން އުނިކުރިކުރުމަށް ކޮމިޝަނުން ނިންމާފައިވާ ކަމަށެވެ.

ޕީޕީއެމް އުވާލަން އެ ޕާޓީގެ ސެނެޓުން ނިންމާފައިވަނީ ޑިސެމްބަރު 2، 2024 ގައެވެ. އެ ޕާޓީގެ ސެނެޓުން ބޭއްވި ބައްދަލުވުމުގައި އެ ޕާޓީ އުވާލަން ފާސްކޮށްފައިވަނީ ސެެނެޓް ބައްދަލުވުމުގައި ބައިވެރިވި 42 ސެނެޓަރުންގެ އިއްތިފާގުންނެވެ.

ރާއްޖޭގެ ދެވަނައަށް އެންމެ މީހުން ގިނަ ޕާޓީގެ ގޮތުގައި އޮތް ޕީޕިއެމް އުވާލަން ސެނެޓުން ނިންމީ، ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީން އެ ޕާޓީން ވަކިވެވަޑައިގަތުމަށް މަޖުބޫރުކޮށް، ބާރުތައް އަތުލުމަށްފަހު ޕީއެންސީއަށް އެ ޕާޓީގެ މެންބަރުން ބަދަލުކުރުމަށްފަހުގައެވެ. ރައީސް މުއިއްޒު އިސްވެ ހުންނަވާ ޕީއެންސީ ބޮޑުކުރުމުގެ މަސައްކަތާއެކު ޕީޕީއެމްގެ ސިޔާސީ މައިދާނުން ގެއްލި އެންމެ ފަހުން ޕާޓީވެސް އުވާލަން ނިންމާ އެ ޕްލޭނާ އެއްގޮތަށް އެކަން ވަނީ ކުރައްވާފައެވެ.

ޕީޕީއެމް އުވާލަން ޕީޕީއެމްގެ ސެނެޓުން ނިންމި އިރު، ފަސޭހަކޮށް އެކަން ކުރެވޭނެ ގޮތަށް ޕާޓީގެ އަސާސީ ގަވާއިދަށް ބަދަލުވެސް ގެނެސްފައިވެއެވެ. އެގޮތުން ސެނެޓުގެ 2/3 އަޣުލަބިއްޔަތަށް ޕާޓީ އުވާލެވޭ ގޮތް ހެދުމާއި، މާލީ ސަބަބުތަކަށްޓަކައި ޕާޓީ އުވާލަން ޖެހޭ ނަމަ ހުށަހެޅުމަށް ބުނެފައި އިންނަ މާއްދާގައި، ލީޑާޝިޕަށް ފެނިއްޖެ ނަމަ ޕާޓީ އުވާލަން ހުށަހެޅޭ ގޮތަށް ވަނީ ބަދަލު ކޮށްފައެވެ.

ޕީޕިއެމް އުފެދިގެން އައީ ޑީއާރުޕީ ތެރޭގައި ދެ ފެކްޝަނެއް އުފެދި، ކުރީގެ ރައީސް މައުމޫން އަބްދުލްގައްޔޫމްގެ ފެކްޝަނުން ޑީއާރުޕީ އިން ވަކިވެގެންްނެވެ. ޕާޓީ އުފެއްދުމަށްފަހު އެ ޕާޓީން 2013 ވަނަ އަހަރުގެ ރިޔާސީ އިންތިހާބުގައި ރައީސް ޔާމިން ވާދަކުރައްވާ ޕީޕިއެމްގެ ފުރަތަމަ ވެރިކަން ގާއިމްކުރިއެވެ.