ދިރާގު ޓީވީއަށް "އޭއެންޑްއީ" ނެޓްވޯކްގެ 5 ޗެނަލެއް ތައާރަފު ކޮށްފި އެވެ.
އޭ އެންޑް އީ ނެޓްވޯކް ޗެނަލް ލޯންޗު ކޮށްފައި ވަނީ ދިރާގު ހެޑް އޮފީހުގައި ހޯމަ ދުވަހު ބޭއްވި ޚާއްސަ ރަސްމިއްޔާތެއްގައެވެ.
"އޭއެންޑްއީ" ޗެނަލް ދިރާގު ޓީވީއަށް ލޯންޗު ކޮށްދެއްވީ އެ ކުންފުނީގެ ޗީފް އެގްޒެކްޓިވް އޮފިސަރ އިސްމާއިލް ރަޝީދާއި އޭއެންޑްއީގެ އޭޝިއާ ޕެސިފިކްގެ މެނޭޖިންގ ޑިރެކްޓަރ ޕްރޭމް ކަމަތުއެވެ.
ދިރާގުން ލޯންޗު ކޮށްފައިވާ އޭ އެންޑް އީ ނެޓްވޯކްގެ 5 ޗެނަލަކީ "ހިސްޓްރީ" ޗެނަލާއި "އެޗްޓޫ" ޗެނަލް އާއި "ލައިފް ޓައިމް" ޗެނަލް އާއި "އެފްވައިއައި" ޗެނަލް އާއި "ސީވަން" ޗެނަލްއެވެ.
އޭއެންޑްއީގެ އޭޝިއާ ޕެސިފިކްގެ މެނޭޖިންގ ޑިރެކްޓަރ ޕްރޭމް ވިދާޅުވީ އެ ނެޓްވޯކްގެ ޗެނަލްތައް ދިރާގާ ގުޅިގެން ރާއްޖެއަށް ފޯރުކޮށްދެވުމަކީ ވަރަށް ބޮޑަށް ފަހުރުވެރިވާ ކަމެއް ކަމަށާއި ކުރިއަށް އޮތް ތާނގައި ވެސް ދިރާގާ އެކު މަސައްކަތް ކުރަމުންދާނެ ކަމަށާއި މި ފުރުސަތު ލިބުމުން ދިރާގަށް ޝުކުރު އަދާކުރާ ކަމަށެވެ.
ރާއްޖެޓީވީއަށް މައުލޫމާތު ދެއްވަމުން ދިރާގުގެ ބިޒްނަސް ޑިވަލޮޕްމަންޓު ޑައިރެކްޓަރ އަހްމަދު މައުމޫން ވިދާޅުވީ ލޯންޗުކުރެވިފައި ވަނީ ރާއްޖެއަށް މުޅީން އާ ޗެނަލްތަކެއް ކަމަށާއި މި 5 ޗެނަލްއަކީ މުޅި އޭޝިއާ ޕެސިފިކްގައި ވެސް މަޝްހޫރު ޗެނަލްތަކެއް ކަމަށެވެ. އަދި މި ޗެނަލްތަކަކީ އިންޓަނޭޝަނަލް ޗެނަލްތަކެއް ކަމަށާއި ޗެނަލްތަކުގައި ހިމެނޭ ކޮންޓެންޓުތަކަކީ 70 ޕަސަންޓު ޔުނައިޓަޑް ސްޓޭޓްސްގެ ކޮންޓެންޓާއި އަނެއް 30 ޕަސަންޓަކީ އޭޝިއާ ޕެސިފިކް ރީޖަންގެ ކޮންޓެންޓުތައް ކަމަށެވެ.
ދިރާގުން ބުނީ އަލަށް ދިރާގު ޓީވީއަށް ތައާރަފު ކުރެވުނު 5 ޗެނަލް ކަސްޓަމަރުންނަށް ކަމުދާނެ ކަމަށް އުންމީދު ކުރާ ކަމަށެވެ.
