ހއ. ދިއްދޫ އަތޮޅު ހޮސްޕިޓަލްގެ ގިނަ ޚިދުމަތްތައް ހުއްޓުމަކަށް، އޮޕަރޭޝަންތައް ވެސް ނުކުރެވޭ
ދަތުގެ ޚިދުމަތް މެދުކެނޑިފައި، އެއީ އެ ޚިދުމަތް ދޭ ދަތުގެ ޚިދުމަތް ދޭ ގޮނޑި ހަލާކު ވެގެން
ހއ. ދިއްދޫ އަތޮޅު ހޮސްޕިޓަލް
ހއ. ދިއްދޫ އަތޮޅު ހޮސްޕިޓަލްގެ ގިނަ ޚިދުމަތްތައް ހުއްޓުމަކަށް އައިސް، އޮޕަރޭޝަންތައް ވެސް ހުއްޓިއްޖެ އެވެ.
ހއ. ދިއްދޫ އަތޮޅު ހޮސްޕިޓަލަކީ ކޮންމެ ދުވަހަކު ވެސް ގިނަ ބަޔަކު ޚިދުމަތް ހޯދާ ހޮސްޕިޓަލެކެވެ. ޚާއްސަކޮށް އެ އަތޮޅުގެ އެހެން ރަށްރަށުގެ ރައްޔިތުން ވެސް ދިއްދޫ އަށް ގޮސް ސިއްހީ ފަރުވާ ހޯދަ އެވެ. ނަމަވެސް މިހާރު އެ ހޮސްޕިޓަލުން ގިނަ ޚިދުމަތްތައް ނުލިބޭ ކަމަށް ގިނަ ބަޔަކު ދަނީ ބުނަމުންނެވެ. އެންމެ އާދައިގެ ލޭގެ ޓެސްޓެއް ވެސް ނުހެދޭ ކަމަށާއި، މީގެ ކުރިން އެއްވެސް މައްސަލައެއް ދިމާނުވެ ލިބުނު ޚިދުމަތްތައް ނުލިބޭތާ ގާތްގަނޑަކަށް 2 ހަފްތާ އަށް ވުރެ ގިނަ ދުވަސް ވެފައިވާ ކަމަށް އެރަށުން ރާއްޖެއެމްވީ އަށް މައުލޫމާތު ދިން މީހުން ބުންޏެވެ.
މި މައްސަލައާ ގުޅިގެން އާދިއްތަ ދުވަހު ފަށާއިރު ޕްރޮގްރާމްގެ ތެރެއިން ހއ. ދިއްދޫ އަތޮޅު ހޮސްޕިޓަލަށް ގުޅުމުން އެ ހޮސްޕިޓަލްގެ މުވައްޒަފެއް ބުނީ، ދަތުގެ ޚިދުމަތް މެދުކެނޑިފައިވާ ކަމަށާއި، އެ ޚިދުމަތް މެދުކެނޑުނީ ދަތުގެ ޚިދުމަތް ދޭ ގޮނޑި (ޑެންޓަލް ޗެއަރ) ހަލާކު ވެގެން ކަމަށެވެ. ހެލްތް މިނިސްޓްރީގެ ސަމާލު ކަމަށް އެކަން ގެނެސްފައިވާ ކަމަށާއި، އޭގެ ގޮނޑިއެއް ލިބޭނެ ދުވަހެއް ނޭނގޭ ކަމަށް އެ މުވައްޒަފު ބުންޏެވެ.
މީގެ އިތުރުން އެ މުވައްޒަފު ބުނީ، ލޭގެ ޓެސްޓެއް ކަމަށްވާ ސީބީސީ ޓެސްޓު ނުހެދޭ ކަމަށާއި، ވިޓަމިން ޑީ ގެ ޓެސްޓު އަދި ޓެލެސީމިއާގެ ޓެސްޓު ވެސް ނުހެދޭ ކަމަށެވެ. މި ޚިދުމަތްތައް މެދުކެނޑުނު ސީދާ ސަބަބެއް ހާމަ ކޮށްފައިނުވެ އެވެ. އަދި އަލުން ޚިދުމަތް ފެށޭނެ ދުވަހެއް ވެސް ބުނެފައި ނުވެ އެވެ.
ދަތުގެ ޚިދުމަތްތައް ހުއްޓިފައި. ޑެންޓަލް ޗެއަރ ހަލާކުވެގެން މައްސަލަ ޖެހިގެން ހަލާކުވެފައި. މިހާރު ގާތްގަނޑަކަށް ދެ ހަފްތާ ވެދާނެ އެއްކޮށް ހުއްޓުނުތާ. ރިކުއެސްޓް ކޮށްފައިވީ. ނޭނގޭ ލިބޭނެ ދުވަހެއް. ދެން ސީބީސީ ނުހެދޭ. އެހެން ދޭތެރެ ދޭތެރެއިން ހުއްޓިއްޖެ. ދެން ޓެލެސީމިއާ ޓެސްޓު ވެސް ނުހެދޭތާ ވަރަށް ގިނަ ދުވަސްވެއްޖެހއ. ދިއްދޫ އަތޮޅު ހޮސްޕިޓަލުގެ މުވައްޒަފެއް
އޮޕަރޭޝަންގެ ޚިދުމަތްތަކާ ގުޅޭގޮތުން ސުވާލު ކުރުމުން އެ މުވައްޒަފު ބުނީ، އޮޕަރޭޝަން ކުރުމަށް އެއްވެސް ޕޭޝަންޓަކު ނާންނަ ކަމަށާއި، އޮޕަރޭޝަން ކުރުމާއި ނުކުރުން ނިންމާނީ ޑޮކްޓަރު ކަމަށެވެ.
މުވައްޒަފު އެހެން ބުނި ނަމަވެސް ސީބީސީ ޓެސްޓު ނުހެދޭ ކަމަށްވާނަމަ އެއްވެސް އޮޕަރޭޝަނެއް ކުރިއަށް ނުގެންދެވޭނެ އެވެ.
ހއ. ދިއްދޫ އަތޮޅު ހޮސްޕިޓަލަކީ ހއ އަތޮޅުގެ އިތުރުން ހދ އަތޮޅުގެ ބައެއް ރައްޔިތުން ވެސް ޚިދުމަތް ހޯދަންދާ ހޮސްޕިޓަލެކެވެ. ގާތްގަނޑަކަށް ދިއްދޫގެ އާބާދީގައި 4000 މީހުން ހިމެނޭއިރު ދުވާލެއްގެ މައްޗަށް 100 އަށް ވުރެ ގިނަ ބަލިމީހުން އެ ހޮސްޕިޓަލުން ޚިދުމަތް ހޯދަ އެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގެ އެ ހޮސްޕިޓަލަށް ވަސީލަތްތައް އިތުރުކޮށް، ޚިދުމަތްތައް ފުޅާކުރި އެވެ. އެގޮތުން ސްކޭންގެ ޚިދުމަތާއެކު، އަންހެނުންގެ ޚާއްސަ ބަލިތަކާއި، ދަތުގެ ޚާއްސަ ބަލިތައް، ކަށީގެ ބަލިތައް އަދި ޑައިލަސިސްގެ ޚިދުމަތް ފެށި އެވެ. ގިނަ ޓެސްޓުތައް އެ ހޮސްޕިޓަލުން ހެދޭ ގޮތަށް މަގުފަހިގެން ވެގެންދިއުމާ ގުޅިގެން ދުވާލެއްގެ މައްޗަށް 400 އާއި 800 އާ ދެމެދުގެ އަދަދަކަށް ޓެސްޓް ވެސް ހަދާ ކަމަށް އެހޮސްޕިޓަލުން މައުލޫމާތު ދީފައިވެ އެވެ.
ނަމަވެސް މިހާރު ހޮސްޕިޓަލްގެ ގިނަ ޚިދުމަތްތައް މެދުކެނޑި، ސިއްހީ ފަރުވާ ނިޒާމުގެ ކަންކަން ކަންބޮޑުވާ ހިސާބަށް ގޮސްފައިވާ ކަމަށް މައުލޫމާތު ލިބެ އެވެ.
