ބެލްޖިއަމްގެ ކޯޗަކަށް ގާސިއާ ހަމަޖައްސައިފި

ބެލްޖިއަމްގެ ޤައުމީ ފުޓުބޯޅަ ޓީމުގެ ކޯޗަކަށް ފްރާންސްގެ ރޫޑީ ގާސިއާ ހަމަޖައްސައިފި އެވެ.

ބެލްޖިއަމްގެ ކޯޗަކަށް އެންމެ ފަހުން ހުރީ ޑޮމެނިކޯ ޓަޑެސްކޯ އެވެ. އެ މަޤާމަށް އޭނާ ހަމަޖެއްސީ 2023 ވަނަ އަހަރު އެވެ. ނަމަވެސް މިދިޔަ އަހަރު ޖަރުމަނުގައި އޮތް ޔޫރޯ ފުޓުބޯޅަ މުބާރާތުގައި ބެލްޖިއަމް އަށް ލިބުނު ދަށް ނަތީޖާގެ ސަބަބުން، ޓަޑެސްކޯގެ މުސްތަޤުބަލާ މެދު އޮތީ ސުވާލު އުފެދި އެވެ.

އުމުރުން މިހާރު 60 އަހަރުވެފައިވާ ގާސިއާ، ބެލްޖިއަމްގެ ޤައުމީ ޓީމާ ހަވާލުވީ ހުކުރު ދުވަހުގެ ވަގުތެއްގައި ކަމަށް މީީޑިއާ ތަކުގައި ވަނީ ރިޕޯޓުކޮށްފަ އެވެ. ބެލްޖިއަމްގެ ޤައުމީ ޓީމާ އެކު ގާސިިއާ އެއްބަސްވުމުގައި ސޮއި ކޮށްފައިވާ އެއްބަސްވުމުގެ މުއްދަތު ހަަމަވާނީ 2026 ވަނަ އަހަރު އެމެރިކާ، ކެނެޑާ އަދި މެކްސިކޯގައި އޮންނަ ފީފާ ވޯލްޑް ކަޕްގެ ނިޔަލަށް ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.

ގާސިއާ އޭނާގެ ކޯޗިން ކެރިއަރު ފެށީ 1994 ވަނަ އަހަރު އެވެ. އޭގެ ފަހުން ބެލްޖިއަމްގެ ޤައުމީ ޓީމު ވެގެންދާނީ ގާސިއާ އިރުޝާދު ދޭނެ 11 ވަނަ ޓީމެވެ. މީގެ ކުރިން ގާސިއާ މުޅިން ވެސް މަސައްކަތް ކޮށްފައި ވަނީ ކުލަބުތަކުގަ އެވެ. އެގޮތުން އޭނާ ވަނީ ލީލް، ރޯމާ، މާސޭ، ލިއޯން، އަލް ނަޞްރު އަަަދި ނަޕޯލީ އަށް ވެސް އިރުޝާދު ދީފަ އެވެ. އެންމެ ފަހުން ގާސިއާ ހުރީ ނަޕޯލީގެ ކޯޗުކަމުގެ މަގާމުގަ އެވެ.

އޭނާގެ އިރުޝާދުގެ ދަށުން ނަޕޯލީން ވަނީ 16 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ އަށް މެޗުން މޮޅުވެފަ އެވެ. ހަތަރު މެޗުން އެއްވަރުވެފައިވާއިރު، އަނެއް ހަތަރު މެޗުން ވަނީ ބަލިވެފަ އެވެ. ނަމަވެސް ނަޕޯލީން ވަނީ އެ ޓީމުގެ ކޯޗުކަމުން ގާސިއާ ވަކި ކުރަން ނިންމައިފަ އެވެ.

ބެލްޖިއަމްގެ ޤައުމީ ޓީމު ވެގެން ދާނީ ގާސިއާ އިރުޝާދު ދޭނެ ޤައުމީ ފުރަތަމަ ޓީމަށެވެ.