ހައިރައިޒްއިން ކޮންމެ އަހަރަކު ވެސް އިންތިޒާމުކޮށްގެން ކުރިއަށްގެންދާ ފުޑް އެންޑް ބެވަރެޖް ޝޯގެ 8 ވަނަ އެޑިޝަން ފަށައިފިއެވެ.

ބުރާސްފަތި ދުވަހުގެ ހަވީރު ހުޅުމާލޭގެ ސެންޓްރަލް ޕާކުގައި މިކަމަށް ބޭއްވި ރަސްމިއްޔާތެއްގައި މި ހަރަކާތް ފައްޓަވައިދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް އެވެ.

މި ޝޯއަކީ ރާއްޖޭގައި ކާބޯތަކެތީގެ ދާއިރާއިން ބާއްވާ އެންމެ ބޮޑު ހަރަކާތެކެވެ. މިއަހަރުގެ ހަރަކާތް ކުރިއަށްދާނީ ހޮނިހިރު ދުވަހުގެ ނިޔަލަށް ކޮންމެ ދުވަހެެއްގެ ހަވީރު 4:00ން ރޭގަނޑު 11:00ށް ހުޅުމާލޭ ސެންޓްރަލް ޕާކުގައެވެ.

ހައިރައިޒްއިން އިންތިޒާމްކޮށްގެން ކުރިއަށްގެންދާ މި ހަރަކާތަކީ ރާއްޖޭގައި ތިބި އެފް އެންޑް ބީ ދާއިރާގެ ފަރާތްތައް އެއްތަނަކުން ދިމާވެ އެ ފަރާތްތަކުގެ ޕްރޮޑަކްޓުތައް އާއްމުންނަށާއި ވިޔަފާރިވެރިންނަށް ދައްކާލުމުގެ ބޭނުމުގައި ބާއްވާ ހަރަކާތެކެވެ. މި ހަރަކާތް ކުރިއަށްދާ މުއްދަތުގައި އެގްޒަބިޓަރުންގެ އުފެއްދުންތަކުގެ އަޖުމަ ބަލާލައި އެ ފަރާތްތަކުގެ ލަކީޑްރޯތަކުގައި ބައިވެރިވުމުގެ ފުރުސަތު އާއްމުންނަށް ލިބޭނެއެވެ.

ފުޑް އެންޑް ބެވަރެޖް ޝޯ އާއި ގުޅިގެން ހައިރައިޒްގެ ޑިރެކްޓަރ ސޭލްސް އޮފް މާކެޓިން މާއިޝާ ވިދާޅުވީ، މިފަދަ ހަރަކާތްތަކަކީ ރާއްޖޭގެ ކާބޯތަކެތީގެ ދާއިރާއަށް ވަރަށް މުހިންމު ހަރަކާތްތަކެއް ކަމަށެވެ. މި ހަރަކާތުގެ ސަބަބުން ފަތުރުވެރިކަމުގެ ދާއިރާއާއި ކާބޯތަކެތީގެ ދާއިރާގެ ވިޔަފާރިތަކަށާއި އާންމުންނަށްވެސް އޭގެ ފައިދާ ކުރާނެކަމަށް އޭނާ ވިދާޅުވިއެވެ. އަދި މިފަހަރުގެ މި ޝޯރގައި އަލަށް މާކެޓަށް ނުކުންނަ މުޅިންތަފާތު ޕްރޮޑަކްޓްތަކެއް އެބަ އުޅޭކަމަށާއި 40 އަށްވުރެ ގިނަ އެގްޒަބިޓަރުން މި އިވެންޓުގައި ބައިވެރިވާއިރު، ތަފާތު ގިން ސްޓޯލްތަކެއް ވެސް ހުރި ކަން މާއިޝާ ވަނީ ފާހަގަކޮށްފައެވެ.

މާއިޝާ އިތުރަށް ވިދާޅުވީ މި އިވެންޓުގައި އެންމެ ޚާއްސަކަމަކަށް މޯލްޑިވްސް ސީޖީއެމްއާއި ގުޅިގެން ޔަންގް ސެފްސް ޕްރޮމޯޓު ކުރުމުގެ މަގުސަދުގައި ވަރަށް ޚާއްސަ ކޭކް ޑިސްޕެލޭ އަކާއި ކުދި ވިޔަފާރިތަކަށް ޚާއްސަކޮށްގެން ދެވަނަ ޓެންޓުގައި މައުލޫމާތު ސެސަންތަކެއް ކުރިއަށް ދާނޭ ކަމަށެވެ. އަދި މީގެ އިތުރުން އެ ފަރާތްތަކަށް ޓްރެއިނިންގ ތަކެއް ވެސް ކުރިއަށް ދާނެކަމަށް އޭނާ ވިދާޅުވިއެވެ.

މާއިޝާ ވިދާޅުވީ މިފަދަ ޝޯއެއްގެ ސަބަބުން ރާއްޖޭގެ ވިޔަފާރިތަކުގެ މެދުގައި ވާދަވެރިކަން އިތުރުވެ ކާބޯތަކެތީގެ އަގު ހެޔޮވުމަށް ވެސް ފުރުސަތު ލިބޭނެކަމަށެވެ.

މިއަހަރުގެ މި ޝޯގައި 40 އަށްވުރެ ގިނަ އެގްޒަބިޓަރުން ބައިވެރިވެއެވެ. މީގެ ތެރޭގައި ދިވެހި ކުންފުނިތަކާއި ރާއްޖޭގައި ވިޔަފާރިކުރާ ބޭރުގެ ކުންފުނިތައްވެސް ހިމެނެއެވެ.

ޝޯ ކުރިއަށްދާ މުއްދަތުގައި އެތަނަށް ޒިޔާރަތްކުރާ މީހުންގެ މެދުގައިވެސް ގުރުއަތު ނެގުން އޮންނާނެއެވެ. އަދި އެތަނުން ގަންނަ ތަކެތިން ޚާއްސަ ޑިސްކައުންޓްތައް ލިބޭއިރު، ތަކެތީގެ ރަހަ ބަލާލުމުގެ ފުރުސަތުވެސް ލިބޭނެއެވެ.

މީގެ އިތުރުން އެގްޒަބިޓަރުން ވިއްކާ ތަކެއްޗާ ގުޅޭ މައުލޫމާތު ވެސް ޒިޔާރަތްކުރާ ފަރާތްތަކަށް ފޯރުކޮށްދޭނެއެވެ.

މި އިވެންޓުގެ މެއިން ސްޕޮންސަރ އަކީ ނެސެލްސް އެވެ. އަދި ކޯސްޕޮންސަރުންގެ ތެރޭގައި ހިމެނެނީ އެމްއެޗްއޭ އަދި ސޯސަން ފިހާރައެވެ.