ކުރިއަށް އޮތް ދެދުވަހު ވެސް މުޅިރާއްޖޭގެ މޫސުން ގޯސްވާނެ: މޫސުމާބެހޭ ގައުމީ އިދާރާ
23 ޖެނުއަރީ 2025 | ބުރާސްފަތި 08:34ބުރާސްފަތި ދުވަހުން ފެށިގެން ވައިގަދަވަމުންދާނެ
މާލެއަށް ބޯކޮށް ވާރޭވެހެނީ
ކުރިއަށް އޮތް ދެދުވަހު ވެސް މުޅިރާއްޖޭގެ މޫސުން ގޯސްވާނެ ކަމަށް މޫސުމާބެހޭ ގައުމީ އިދާރާއިން ބުނެފިއެވެ.
ރާއްޖެޓީވީގެ ފަށާއިރު ޕްރޮގްރާމަށް މޫސުމާބެހޭ ގައުމީ އިދާރާގެ އެސިސްޓެންޓު މީޓިއަރޮލޮޖިސްޓު ހުސެއިން ވަހީދު ވިދާޅުވީ މިއީ މޫސުމީ ވިއްސާރައެއް ކަމަށާއި، ކުރިއަށް އޮތީ މޫސުން ގޯސް ދުވަސްތަކެއް ކަމަށެވެ. ކުރިއަށް ދެ ދުވަހު ވެސް ރާއްޖޭގެ ހުރިހާ ހިސާބަކަށް މޫސުން ގޯސްވާނެ ކަމަށާއި، ބޯކޮށް ވާރޭވެހުން އެކަށީގެންވާ ކަމަށް އޭނާ ވިދާޅުވިއެވެ.
މީގެ އިތުރުން ހަސަން ވަހީދު ވިދާޅުވީ މިދިޔަ 24 ގަޑިއިރު ފަރެސްމާތޮޑާއަށް 129.7 މިލިމީޓަރުގެ ވާރޭ ވެހިފައިވާ ކަމަށާއި، ގދ. ގެފަނަފުށްޓަށް 56.2 މިލިމީޓަރުގެ ވާރޭ ވެހިފައިވާ ކަމަށެވެ. އަދި ކުރިއަށް އޮތް ދެދުވަސްތެރޭގައި ބޯކޮށް ވާރޭވެހި ފެންބޮޑުވެ، ގެއްލުން ލިބިދާނެ ކަމަށާއި، ރައްކާތެރިކަމުގެ ފިޔަވަޅު އެޅުމަކީ މުހިންމު ކަމެއް ކަމަށް އޭނާ ވިދާޅުވިއެވެ.
ހަސަން ވަހީދު ވިދާޅުވީ ބުރާސްފަތި ދުވަހުން ފެށިގެން ވައިގަދަވަމުންދާނެ ކަމަށާއި، ކަނޑުދަތުރުކުރާ ފަރާތްތަކުން ޚާއްސަ ސަމާލުކަމެއްދޭން ޖެހޭ ކަމަށެވެ.
މޫސުމާބެހޭ ގައުމީ އިދާރާއިން ބުނީ ބުރާސްފަތި ދުވަހުގެ ހެނދުނު 10:00ން ހުކުރު ދުވަހުގެ 10:00ށް އެކިހިސާބަށް ވިއްސާރަކޮށް ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހުން އެކަށީގެންވާ ކަމަށާއި، އިރުދެކުނާއި ދެކުނުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު ގާތްގަޑަކަށް 40 މޭލަށް ވައި ގަދަވުން އެކަށީގެންވާ ކަމަށް އެއިދާރާއިން ބުނެއެވެ.
މޫސުމާބެހޭ ގައުމީ އިދާރާއިން ބުނީ އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި، ރާޅުގެ އުސްމިނުގައި 7 ނުވަތަ 4 ފޫޓު ހުންނާނެ ކަމަށެވެ.
