ހުރިހާ ކަމެއްވެސް ރައްޔިތުން އެދިވަޑައިގަންނަވާ ގޮތަށް ކޮށްދިނުމުގައި ސަރުކާރުން ބާރު ދުވެލީގައި ކުރިއަށްދާނެ - ރައީސް
އިންނަމާދޫގައި 50 ޔުނިޓްގެ ހައުސިންގް މަޝްރޫޢެއް ހިންގާނެ
ރައީސް ޑރ. މުހައްމަދު މުއިއްޒު އިންނަމާދޫރައްޔިތުންނާއި ބައްދަލުކުރައްވާ ވާހަކަދައްކަވަނީ
ރަށުގެ ތަރައްޤީއަށްޓަކައި އެކިއެކި މަސައްކަތްތައް ކުރަންޖެހިފައި އެބަހުރި ކަމަށާ، އެ ހުރިހާ ކަމެއްވެސް ރައްޔިތުން އެދިވަޑައިގަންނަވާ ގޮތަށް ކޮށްދިނުމުގައި އަދުގެ ސަރުކާރުން ބާރު ދުވެލީގައި ކުރިއަށްދާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރ. އިންނަމާދޫގެ ރައްޔިތުންނަށް ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަން ދެއްވީ، މާޅޮސްމަޑުލު އުތުރުބުރީގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގައި އެ އަތޮޅު އިންނަމާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައެވެ.
މިހާރު ފާސްކޮށްފައި އޮތް ބަޖެޓުގެ ތެރެއިން، މިފަދަ އެކި ކަންކަމުގައި ޢަމަލީ ސިފަޖެހިގެންދާނެ ކަމުގެ ޔަޤީންކަން ދެއްވައި، ރައީސުލްޖުމްހޫރިއްޔާ ވިދާޅުވީ، މި ހިނގާ 2025 ވަނަ އަހަރަށް ފާސްކޮށްފައި އޮތް ބަޖެޓުން އެންމެ އިސްކަމެއް ދެއްވަނީ ބޯހިޔާވަހިކަމުގައި ހުރި ދަތިކަމަށް ދާއިމީ ޙައްލު ހޯއްދަވައިދެއްވަން ކަމުގައި ވާއިރު، ރަށު ކައުންސިލުން ބިން ކަނޑައަޅައި ހަމަޖައްސަވައި ދެއްވުމާއެކު ކޮންޓްރެކްޓަރުން ހަމަޖެހުނުހާ އަވަހަކަށް، ރ. އިންނަމާދޫގައި 50 ޔުނިޓްގެ ހައުސިންގް މަޝްރޫޢެއް ހިންގަވަން ނިންމަވާފައިވާ ކަމުގައެވެ.
ބޯހިޔާވަހިކަމުގެ ދަތިކަމަށް ދާއިމީ ޙައްލު ހޯއްދަވައިދެއްވުމަށް ފަހު ދެން އެންމެ ބޮޑު އިސްކަމެއް ދެއްވަނީ ތަޢުލީމީ އަދި ޞިއްޙީ ދާއިރާއަށް ކަމުގައި ވީ ނަމަވެސް، ވަކިވަކި ރަށްރަށުގެ ޚާއްޞަ ބޭނުންތަކަށް އިސްކަންދެއްވާނެކަން ފާހަގަކުރައްވައި ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، ރ. އިންނަމާދޫ ބަނދަރުގެ ޖާގައިގެ ދަތިކަމަށް ޙައްލު ހޯއްދަވައި ދެއްވުމަށް އިސްކަން ދެއްވާނެކަމަށް ވިދާޅުވެފައެވެ. އެގޮތުން، ބަނދަރުގެ މައްސަލަ ޙައްލު ކުރުމަށް ފަށާފައިވާ މަޝްރޫޢު ޢަމަލީ ގޮތުން ހިންގަވައިދެއްވައި، ނިންމަވައިދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ދެއްވާފައެވެ.
ރ. އިންނަމާދޫގެ ތަޢުލީމީ ދާއިރާއާއި ޞިއްޙީ ދާއިރާއަށް ބޭނުންވެފައިވާ ތަރައްޤީ ގެނެސްދެއްވާނެކަމުގެ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ. އެގޮތުން ޞިއްޙީ ދާއިރާއަށް ގެންނަން ބޭނުންވެފައިވާ ޢުމްރާނީ އަދި އިންސާނީ ވަޞީލަތުގެ ތަރައްޤީއާއި، ތަކެތީގެ ގޮތުން ގެންނަންޖެހޭ ތަރައްޤީއާއި ޚިދުމަތުގެ ވަގުތު އިތުރުކުރުމުގެ ކަންކަން، ރައްޔިތުން އެދިވަޑައިގެންފައިވާ ގޮތަށް މި އަހަރު ތެރޭގައި ކުރިއަށް ގެންގޮސްދެއްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ތަކުރާރުކޮށް ދެއްވާފައެވެ.
ހަމަ މިއާއެކު ސްކޫލަށް ބޭނުންވާ ވަޞީލަތްތަކާއި ޖާގަ އިތުރުކުރުމަށްޓަކައި އައު މަޝްރޫޢެއް ހިންގަންޖެހޭ ކަމަށާ، މި އަހަރުގެ ބަޖެޓުގައި ހަމަޖައްސާފައިވާ ފަދައިން ތަރައްޤީގެ މަޝްރޫޢު ހިނގަމުންދާނެކަމުގެ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ.
މީގެ އިތުރުން ރަށުގެ ގިރާ ސަރަޙައްދު ހިމާޔަތްކުރުމާއި، ނަރުދަމާގެ މަސައްކަތްތަކާއި، މަގު ހެދުމުގެ މަޝްރޫޢު ފަދަ ތަރައްޤީގެ މަޝްރޫޢުތަކާއި، ޒުވާނުންނަށް ޚާއްޞަކޮށްގެން ހިންގާ ތަރައްޤީގެ މަޝްރޫޢުތަކަކީ މި އަހަރާއި އަންނަ އަހަރުގެ ތެރޭގައި ޢަމަލީ ސިފަޖެހިގެންދާނެ މަޝްރޫޢުތަކެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، ދެން ރ. އިންނަމާދޫއަށް ވަޑައިގަންނަވާނީ ރައްޔިތުންގެ އުންމީދުތަކާ ގުޅިފައިވާ ތަރައްޤީގެ މަޝްރޫޢުތަކެއްގައި ޙަޤީޤީ ކުލަޖެހި، އެކަމުގެ އުފަލުގައި ބައިވެރިވެވަޑައިގަތުމަށް ކަމުގައި ވިދާޅުވެ، ރަށުގެ ރައްޔިތުންނަށް އުންމީދު އައުކޮށްދެއްވިއެވެ.
