މާލޭ މަޖީދީ މަގުގައި ހުރި އިމާރާތެއްގައި އަލިފާން ރޯވެއްޖެއެވެ،

އެމްއެމްޑީއެފް ގެ ފަޔަރ އެންޑް ރެސްކިޔު ސަރވިސްގެ ސިފައިން ދަނީ އަލިފާން ނިއްވުމުގެ މަސައްކަތުގައި ހަރަކާތްތެރި ވަމުންނެވެ.

ބުރާސްފަތި ދުވަހުގެ ފަތިހު ހިނގި މިހާދިސާގައި އިމާރާތުގައި އަލިފާން ރޯވީ 4:15 ހާއިރު އެވެ.

އިމާރާތުގައި ރޯވި އަލިފާން ނިއްވާލީ 5:30 ހާއިރުއެވެ.

އަލިފާން ރޯވީ ފުރުޓް ޓްރީ އެޕަލް ފިހާރައިގެ ގުދަނުގެ ފުރަތަމަ ފަންގިފިލާގައި ކަމަށް އެމްއެމްޑީއެފް އިން ވަނީ ބުނެފައެވެ.

އަލިފާން ރޯވި އިމާރާތަކީ މއ. ކެލާގެއާގޭގައި އަދައިގެ ގޮތަކަށް ހަދާފައިވާ ތިން ބުރީގެ އިމާރާތެކެވެ.

އެއްވެސް ބަޔަކު ދިރިއުޅޭ އިމާރާތެއް ނޫން ކަމަށް މައުލޫމާތު ލިބިފައިވެއެވެ.

ޙާދިސާ ހިނގުމާއެކު ގުދަނުގެ ދެ ފަރާތުގައި ހުރި އިމާރާތްތަކުން ވެސް މީހުން ހުސްކުރިއެވެ. އެއްވެސް މީހަކަށް ގެއްލުމެއް ލިބިފައި ނުވާކަަމަށް މައުލޫމާތު ލިބިފައިވެއެވެ.

ރޯވި އިމާރާތަކީ ފިލައިން ހަދާފައިވާ އިމާރާތެކެވެ.

އެ ގުދަން ވަނީ އެއްކޮށް ރޯވެ އަނދާފައެވެ.

އަލިފާނުގެ ހާދިސާގައި ދުމުގެ ސަބަބުންނާއި އިމާރާތައް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 ފަރާތެއް (14 ދިވެހިން އަދި 19 ބިދޭސީން) ފާހަގަ ކުރެވުނު ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފައިވެއެވެ.

މީގެ ތެރެއިން 5 ގޭބިސީއެއްގެ 14 ދިވެހިން އަދި 8 ބިދޭސީންނަށް ވަގުތީ ބޯހިޔާވަހިކަމާއި ކެއިންބުއިން އެންޑީއެމްއޭ އިން ހަމަޖައްސައިދިން ކަމަށާއި، 11 ބިދޭސީއަކަށް އެ މީހުން ނިސްބަތްވާ ކުންފުނި ތަކުން ވަނީ އެހީތެރިކަން ފޯރުކޮށްދީފައި ކަމަށް ވެސް އެންޑީއެމްއޭ އިން ވަނީ ބުނެފައެވެ.