ޖަވާބުދާރީ ކުރުވުމަށް މަސައްކަތް ކުރާ ކޮންމެ ފަހަރަކު ރައީސް މުއިއްޒު ހޮޅި ވައުދުތައް ވެވަޑައިގަންނަވާ: މެމްބަރު އަހުމަދު ދީދީ
22 ޖެނުއަރީ 2025 | ބުދަ 13:15މިސަރުކާރަށް އަހަރަކަށްވުރެ ގިނަ ދުވަސްގެންދިޔައިރު ރައްޔިތުންނަށް ގިނަ ކަންކަން ހިތިކޮށް ތަޖުރިބާ ކުރެވިފައިވޭ
ބުދަ ދުވަހު ފުދިއްޖެ-ފުނޑިއްޖެ ޚާއްސަ ކަވަރޭޖްގައި މަރަދޫ ދާއިރާގެ މެންބަރު އަހުމަދު ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރު ޖަވާބުދާރީ ކުރުވުމަށް މަސައްކަތް ކުރާ ކޮންމެ ފަހަރަކު އެމަނިކުފާނު ރަށްރަށަށް ވަޑައިގަންނަވާ ހޮޅި ވައުދުތައް ވެވަޑައިގަންނަވާ ކަމަށް ރައްޔިތުން މަޖިލީހުގެ މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.
ރާއްޖެޓީވީގެ ފުދިއްޖެ-ފުނޑިއްޖެ ޚާއްސަ ކަވަރޭޖްގައި ބުދަ ދުވަހު ވާހަކަދައްކަވަމުން މެމްބަރު އަހުމަދު ދީދީ ވިދާޅުވީ މިސަރުކާރު ޖަވާބުދާރީ ކުރުވުމަށް މަގުމައްޗަށް ނުކުތުމަށް މަސައްކަތް ކުރާ ކޮންމެ ފަހަރަކު ރައީސް މުއިއްޒު ރަށްރަށް ވަޑައިގަންނަވާ ހޮޅި ވައުދުތައް ވެވަޑައިގަންނަވަމުން ގެންދަވާ ކަމަށެވެ.
މިސަރުކާރަށް އަހަރަކަށްވުރެ ގިނަ ދުވަސްގެންދިޔައިރު ރައްޔިތުންނަށް ގިނަ ކަންކަން ހިތިކޮށް ތަޖުރިބާ ކުރެވިފައިވާ ކަމަށް މެމްބަރު އަހުމަދު ދީދީ ވިދާޅުވިއެވެ. އަދި ސަރުކާރުން ދައްކަމުންދާ ވާހަކަތަކަކީ ދޮގު ކަމަށާއި، އެކަން ގަބޫލުނުކުރުމަށް އޭނާ ވަނީ އެދިވަޑައިގެންފައެވެ.
ރާއްޖޭގެ ތަރައްގީއަށް އިޝާރާތް ކުރައްވައި މެމްބަރު އަހުމަދު ދީދީ ވިދާޅުވީ ރައްޔިތުންގެ މަޖިލީހުން މިއަހަރު ފާސްކުރި ބަޖެޓުގައި ރަށްރަށުގެ ތަރައްގީ ކުރާނެ އެއްވެސް މަސައްކަތެއް ނުވަތަ މަޝްރޫއުގެ ތަފްސީލުތައް ހިމަނާފައިނުވާ ކަމަށާއި، އެއީ ރައްޔިތުންނަށް އޮޅުވާލުމަށް ސަރުކާރުން ކޮށްފައިވާ މަސައްކަތެއް ކަމަށެވެ. މިގޮތަށް ބަޖެޓު ފާސްކުރުމުން ޖަވާބުދާރީ ކުރުވުމާއި، ޒިންމާދާރުކުރުވުމުގެ ފުރުސަތު ގެއްލުނީ ކަމަށް އޭނާ ވިދާޅުވިއެވެ.
މެމްބަރު އަހުމަދު ދީދީ ވިދާޅުވީ ރައްޔިތުން ބޭނުންވާ ދެފުށް ފެންނަ ރައްޔިތުންނަށް ހެޔޮ އެދޭ ސަރުކާރެއް ގައުމަށް ގެނައުމުގެ ޖެނުއަރީ 31 ވަނަ ދުވަހު އެމްޑީޕީން އިސްނަގައިގެން ބާއްވާ ބޮޑު އެއްވުމުގައި ހުރިހާ ރައްޔިތުން ބައިވެރިވާން ޖެހޭ ކަމަށެވެ. އަދި މި އެއްވުމުން ސަރުކާރަށް ރައްޔިތުން އަޑު އިއްވަންޖެހޭ ކަމަށް އޭނާ ވިދާޅުވިއެވެ.
