މި ސަރުކާރުން ޒުވާނުންނާ މެދު ގެންގުޅޭ ޕޮލިސީ ސާފުކުރުމަށް މަގުމައްޗަށް ނުކުންނަންޖެހޭ: މެންބަރު މީކާއިލް
21 ޖެނުއަރީ 2025 | އަންގާރަ 12:36ގައުމުގައި ޒުވާނުންގެ ދައުރު ވަރަށް ބޮޑު
ފުދިއްޖެ-ފުނޑިއްޖެ ޚާއްސަ ކަވަރޭޖްގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުން ޒުވާނުންނާ މެދު ގެންގުޅޭ ޕޮލިސީ ސާފުކުރުމަށް މަގުމައްޗަށް ނުކުންނަންޖެހޭ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ފުދިއްޖެ-ފުނޑިއްޖެ ޚާއްސަ ކަވަރޭޖްގައި ވާހަކަދައްކަވަމުން މެންބަރު މީކާއިލް ވިދާޅުވީ މިސަރުކާރަށް އަހަރަކަށްވުރެ ގިނަ ދުވަސްވެގެން ދިޔައިރު ޒުވާނުންނާ މެދު ގެންގުޅޭ ޕޮލިސީ ސާފުނުވާ ކަމަށާއި، އަމަލުކުރަމުންދަނީ އެކި ގޮތަށް ކަމަށެވެ.
ޒުވާނުންނަކީ ރާއްޖޭގެ އާބާދީގެ ވަރަށް ބޮޑު ބައެއް ކަމަށާއި، ގައުމުގައި ޒުވާނުންގެ ދައުރު ވަރަށް ބޮޑު ކަމަށް މެންބަރު މީކާއިލް ވިދާޅުވިއެވެ. ނަމަވެސް ޒުވާނުންގެ ކުރިމަގަށް ވިސްނައިގެން ސަރުކާރުން މަސައްކަތް ކުރާ މަންޒަރު ނުފެންނަ ކަމަށް އޭނާ ވިދާޅުވިއެވެ. އަދި ވިދާޅުވީ މިސަރުކާރުން ޒުވާނުންގެ ތެރެއިން ބައެއް މަސައްކަތްތައް ކުރާ ޒުވާނުންނަކީ ގޭންގް ސްޓާރުންނަށް ހަދާފައިވާ ކަމަށެވެ.
މިސަރުކާރުގައި ޒުވާނުންގެ ޕޮލިސީ ސާފުކުރުމަށް މަގުމައްޗަށް ނުކުންނަންޖެހިފައިވާކަން ފާހަގަކުރައްވައި މެންބަރު މީކާއިލް ވިދާޅުވީ އެމްޑީޕީން އިސްނަގައިގެން 31 ޖެނުއަރީ 2025 ގައި ބާއްވާ ބޮޑު އެއްވުމުގައި ޒުވާނުން ހިމެނޭ ގޮތަށް ހުރިހާ ރަައްޔިތުން ބައިވެރިވާންޖެހޭ ކަމަށެވެ. އަދި ސަރުކާރަށް ރައްޔިތުންގެ އަޑު އިއްވަންޖެހޭ ކަމަށް މެންބަރު މީކާއިލް ވިދާޅުވިއެވެ.
