ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު) ގައި ޕީއެންސީގެ ފޯމުފުރަން މީޓީންގ ރޫމް ދޫކުރީ މިނިސްޓަރުގެ ބިއުރޯއިން އެދިގެން ކަމަށާއި، މީޓިންގ ރޫމްދޫކުރާއިރު ކުރާކަމެއް ނުބަލާކަމަށް އެއްބަސްވެއްޖެއެވެ.

އަންގާރަ ދުވަހު ޑީއެންއާރުގެ މަސައްކަތް ދައްކާލުމަށް ނޫސްވެރިން ގެންގޮސްފައިވާއިރު، ޕީއެންސީގެ ފޯމު ފުރި މީޓިންގް ރޫމާއި، އެތަނުގެ މަސައްކަތްތައް ވަނީ ނޫސްވެރިންނަށް ދައްކާލާފައެވެ. މިއާއެކު ނޫސްވެރިން ވަނީ ޕީއެންސީއަށް ފޯމުފުރުމަށް ޑީއެންއާރު ތެރޭގައި ކުރި މަސައްކަތްތަކާއި ގުޅޭގޮތުން ސުވާލު ފުންޏެއް އޮއްސާލާފައެވެ.

މިކަމާއި ގުޅިގެން ހޯމް މިނިސްޓްރީގެ ޑެޕިއުޓީ މިނިސްޓަރު އަދި ޑީއެންއާރުއާ ހަވާލުވެ ހުންނެވި އަހުމަދު ޢާލީ ވިދާޅުވީ އޭނާއަށް ފެނުނު ފޮޓޯގައި ފެންނަނީ ޕިއްޒާގެ ފޮޓޯ އެކަނި ކަމަށާއި، އިތުރު ފޮޓޯއެއް ނީންނާނެ ކަމަށެވެ. އަދި އޮންނަ އުސޫލުގެ ތެރެއިން މިނިސްޓްރީއަށް މީޓިންގ ރޫމް ދެމުންދާ ކަމަށާއި، މީޓީންގ ރޫމުގައި ކުރީ ކޮންކަމެއްކަން ބުނަން ދަތި ކަމަށް ޢާލީ ވިދާޅުވިއެވެ.

ތަކުރާރުކޮށް ނޫސްވެރިން ސުވާލުކުރުމުންވެސް ޢާލީ ވިދާޅުވީ ދައުރުވަމުންދާ ފޮޓޯގައި ޑީއެންއާރުގެ އެއްވެސް މުވައްޒަފެއް ނުފެންނާނެ ކަމަށެވެ. އަދި އޭނާ އެތަނަށް ދިޔައީ ހަމައެކަނި ޕިއްޒާ ކާން ކަމަށާއި، އޭނާ އިންތަނެއްގެ ޕީއެންސީގެ ފޯމު ފުރާފައި ނުވާނެ ކަމަށެވެ. އަދި ތުހުމަތުތަކަށް އިންކާރުކޮށްފައިވެއެވެ.

ނަމަވެސް ދައުރުވަމުންދާ ފޮޓޯތަކުން ޢާލީ އާއި މަޖީދު މިނިސްޓަރުގެ އަރިހުގައި ޑީއެންއާރުގެ މީޓިންގ ރޫމުގައި އިން އިރު އެ މޭޒުގެ އަނެއްފަރާތުގައި ޕީއެންސީއަށް ފޯމު ފުރާތަން ފެނެއެވެ. އަދި މިނިސްޓަރު އެއިރު އިންނެވީ ފޯނެއްގައެވެ. ޢާލީ ވިދާޅުވި ޕިއްޒާއެއްވެސް އެ މޭޒުމަތީގައި ނެތެވެ. ފެންނަނީ ފިންގަރ ޕްރިންޓް ޖަހާ ދެ ޕެޑް ހުޅުވާފައި އޮތްތަނާއި ޕީއެންސީގެ ފޯމްތައް ފުރަމުންދިޔަތަނެވެ. ނަމަވެސް އެކަންވެސް އަލީ ދޮގުކުރެއްވިއެވެ.