ޕީއެންސީގެ މައްސަލަ ނުބެލޭނެ ކަމަށް ނިންމައިފި
30 ޖެނުއަރީ 2019 | ބުދަ 08:34ފިޔަވަޅު ނޭޅުމަށް ނިންމާފައި ވަނީ އެ ގަވާއިދު ހެދިފައި ވަނީ އެ މައްސަލައެއް ކުރިމަތިވި ފަހުން ކަމަށް ވާތީ
އީސީން ބޭއްވި ނޫސްވެރިންގެ ބައްދަލުވުން
ކުރީގެ ރައީސް އަބްދުﷲ ޔާމީންގެ އަރިސް ފަރާތްތަކުން އުފެއްދުމުގެ މަސައްކަތް ކުރަމުންދާ ޕީޕަލްސް ނޭޝަނަލް ކޮންގްރެސް (ޕީއެންސީ)އާ ގުޅޭ ގޮތުން އާންމު ފަރުދަކު ހުށަހަޅާފައިވާ މައްސަލަ ނުބެލޭނެ ކަމަށް އީސީން އުފެއްދި ލަފާދޭ ކޮމެޓީން ނިންމައިފިއެވެ.
އެމައްސަލައިގައި ބުނެފައި ވަނީ އެކޮމެޓީގެ މެމްބަރު މަހުފޫޒު ސައީދު ވިދާޅުވީ ޕީޕީއެމްގެ ތަކެތި ޕީއެންސީ އިން ބޭނުންކޮށްފައިވާކަން ހާމަވާ ކަމަށާއި އަދި ޕީޕީއެމްގެ ލީޑަރޝިޕްގައި ހަރަކާތްތެރިވި ފަރާތްތައް ޕީއެންސީ އުފެއްދުމަށް ހަރަކާތްތެރިވިކަން ހާމަވާ ކަމަށެވެ. އެހެން ނަމަވެސް ޕީއެންސީއާ މެދު ފިޔަވަޅު ނޭޅުމަށް ނިންމާފައި ވަނީ އެ ގަވާއިދު ހެދިފައި ވަނީ އެ މައްސަލައެއް ކުރިމަތިވި ފަހުން ކަމަށް ވާތީ ކަމަށެވެ.
"ޕީއެންސީ އުފެއްދުމަށް ޕީޕީއެމްގެ އިމާރާތް ބޭނުންކުރިކަން އެނގުނު. އަދި ޕީޕީއެމްގެ ލީޑަރޝިޕްގައި ހަރަކާތްތެރިވި ފަރާތްތައް އިސްކޮށް ތިއްބަވައިގެންކަން އެނގުނު ޕީއެންސީ އުފައްދާފައި ވަނީ. އެކަންތައް އެހެން ހުރިކަމުގައި ވިއަސް އަޅުގަނޑުމެން ބެލި އިރުގައި ސިޔާސީ ޕާޓީތަކުގެ ގަވައިދަށް ގެނެވުނު އިސްލާހު ގެނެސްފައި ވަނީ 24 ޖެނުއަރީގައި. އޭގެ ކުރިން ވަނީ ޕީއެންސީ އުފެއްދުމުގެ ހުއްދަ ދީ ޕީއެންސީގެ ޖަލްސާ ބޭއްވުމުގެ ހުއްދަވެސް ދީފައި. އެހެންވީމަ ފަހުން ގެޒެޓްކުރެވުނު ގަވައިދެއްގެ ދަށުން ކުރިން ހިނގާފައިވާ ކަންތައްތަކަކާއިމެދު ފިޔަވަޅު އެޅިދާނެކަމަށް އަޅުގަނޑުމެންނަށް ގަބޫލެއް ނުކުރެވޭ" ލަފާދޭ ކޮމެޓީގެ މެމްބަރު މަހުފޫޒު ސައީދު ވިދާޅުވިއެވެ.
ޤަވައިދަށް ގެނައި ބަދަލުތަކުގެ ތެރޭގައި ޕާޓީއެއް ބިކަކޮށްލައި އެހެން ޕާޓީއެއް އުފެއްދުމަށް ހުރަސްއެޅުމަށް އީސީއަށް ވަނީ ބާރުތަކެއް ދީފައެވެ. އެގޮތުން މިހާރު ވެސް ހިނގަމުންދާ ޕާޓީއެއްގެ މުވައްޒަފުންނާއި ވަސީލަތްތައް ބޭނުންކޮށްގެން އާ ޕާޓީއެއް އުފެއްދުމަށް މަސައްކަތް ކުރާނަމަ، ނުވަތަ މިހާރުވެސް ހިނގަމުންދާ ޕާޓީއެއްގެ ލީޑަރޝިޕް ގެއްލި، އެ ޕާޓީ ހިންގާނެ ފަރާތެއް ނެތް ހާލަތަކަށް އެ ޕާޓީ ދާގޮތަށް އާ ޕާޓީއެއް އުފެއްދުމަށް މަސައްކަތް ކުރާނަމަ އެކަމަށް ހުއްދަ ނުދިނުމުގެ ބާރު ޤަވާއިދުގައި އީސީއަށް ވަނީ ދީފައެވެ. އަދި ހަމަ މިއާއިއެކު ނުފޫޒާއި އޮޅުވާލުމާއި ބާރު ބޭނުންކޮށްގެން އާ ޕާޓީއެއް އުފައްދަން މަސައްކަތް ކުރާ ކަމުގެ ޝަކުވާއެއް އީސީއަށް ހުށަހަޅައިފި ނަމަ އެ ހާލަތުގައި ވެސް ޕާޓީ އުފެއްދުން ހުއްޓުވުމުގެ ބާރު އީސީއަށް ލިބިދެއެވެ.
