ބައެއް މަޝްރޫޢުތައް މަޑުޖެހިފައި ވަނީ ބޮޑު ހިލައިގެ ދަތިކަން ހުރުމުން ކަމަށާއި އެކަން ހައްލުކުރަމުންދާ ކަމަށް ރައީސް ޑރ.މުހައްމަދު މުއިއްޒު ވިދާޅުވާ ވާހަކަ އަނެއްކާވެސް ތަކުރާރުކުރައްވައިފިއެވެ.
ރައީސް އެފަދައިން ވިދާޅުވީ ރ.އަތޮޅުގެ ބައެއް ރަށްރަށަށް މިހާރު ކުރައްވަމުންދާ ދަތުރުފުޅުގެ ތެރެއިން ރ.ވާދޫގެ ރައްޔިތުންނާއި ބައްދަލުކުރައްވާ ވާހަކަދައްކަވަމުންނެވެ.
މަޝްރޫޢުތައް ކުރިއަށް ނުގެންދެވުމުން ސަރުކާރުން އެކި ފަހަރު ދައްކަވަނީ އެކި ވާހަކައެވެ. ވެރިކަަމަށް އައީއްސުރެ މަޝްރޫޢުތައް ހުއްޓިފައި ހުރި ނަމަވެސް މަޝްރޫޢުތަކަށް ކަނޑައެޅި ބަޖެޓް ހިމެނޭހެން 2024ގެ ބަޖެޓް ވަނީ ހޭދަކޮށް ހުސްކޮށްފައެވެ. ނަމަވެސް އެ ޚަރަދުތަކުގެ ތަފްސީލް ސަރުކާރުން ވަނީ ހާމަނުކޮށް ހިފަހައްޓާފައެވެ. މީގެ ކުރިން ސަރުކާރުން ބުނަމުން އައީ މަޝްރޫޢުތައް ކުރިއަށް ނުދަނީ އެކަށީގެންވާ ބަޖެޓެއް ނެތުމުން ކަަމަށެވެ.
މީގެ ކުރިން ހުވަދު އަތޮޅުގެ ރަށްތަކަށް ކުރެއްވި ދަތުރުފުޅުގެ ތެރެއިން ގދ.ރަތަފަންދޫ ރައްޔިތުންނާ ބައްދަލުކުރައްވައި މިއަދު ދެއްކެވި ވާހަކަފުޅުގައި ރައީސް ވިދާޅުވީ އެ ރަށުގެ ގިރާ ސަރަހައްދު ހިމާޔަތްކުރުމުގެ މަޝްރޫއު މަޑުޖެހިފައި އޮތީ މަސައްކަތަށް ބޭނުންވާ ތަކެތި ނުލިބުމާއި ފައިސާގެ ދަތިކަމާހުރެ ކަމަށެވެ. މި މޭރުމުން ރައީސް ވާހަކަދައްކަވަން ފައްޓަވާފައި މި ވަނީ ފައިސާ ނެތިގެން މަޝްރޫއު ނުހިންގޭ ކަމަށް ބުނާތީ އާއްމުންގެ ފާޑުކިޔުން އިތުރުވެފައިވާ ދަނޑިވަޅެއްގައެވެ.
އަންގާރަ ދުވަހު ވާދޫގައި ވާހަކަދައްކަވަމުން އެ ރަށުގެ ގިރާ ސަރަަހައްދުގެ މައްސަލަ އަށް އަވަސް ހައްލެއް ހޯއްދަވާދެއްވާނެ ކަމަށް ރައީސް ވައުދުވެވަޑައިގަންނަވާފައިވެއެވެ. އެ ރަށުގެ ބަންދަރުގެ މަސައްކަތް ކުރިއަށް ނުދާ ސަބަބާއި މެދު ވާހަކަދައްކަވަމުން އެ މަނިކުފާނު ވިދާޅުވީ ބޮޑުހިލަޖެހުމަކީ އެ މަޝްރޫޢުގެ އެންމެ ބޮޑު މަސައްކަތް ކަމަށެވެ. އެކަން ނުކުރެވި ވަނީ ބޮޑުހިލަ ސަޕްލައި ލިބުމުގައި މައްސަލަ ދިމާވުމުގެ ސަބަބުން ކަމަށް ވެސް ރައީސް ވިދާޅުވިއެވެ. މިހާރު ފިނޭންސް މިނިސްޓްރީ އާއި އެސްޓީއޯ އާއި އެކު މަޝްވަރާކޮށްގެން އެކަން ހައްލުކުރުމުގެ މަސައްކަތް ކުރަމުންދާ ކަަމަށް ރައީސް ވިދާޅުވިއެވެ. އެގޮތުން ބަލްކްކޮށް ބޮޑުހިލަ ގެނެސް އެކަން ހައްލުކޮށްދެއްވާނެ ކަމަށް ރައީސް ވިދާޅުވި ނަމަވެސް އެމަސައްކަތް މިހާރު އޮތް މަރުހަލާ އާއި އެކަން ކޮށް ނިންމާނެ ތާރީހެއް ރައީސް ހާމައެއް ނުކުރައްވައެވެ.
އެހެންނަމަވެސް ބޮޑުހިލައިގެ ދަތިކަން ދިމާވުމުން ރާއްޖޭގެ ބައެއް ރަށްރަށުގައި ރަށްގިރުމާއި ބަނދަރުގެ މަސައްކަތް ހުއްޓިފައި އެބަ ހުރި ކަމަށާއި، ބޮޑުހިލަ ލިބުމާއި އެކު ހުއްޓިފަ ހުރި މަސައްކަތް އަލުން ފަށައިގެން ކުރިއަށް ގެންދަވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.
މިދަންނަވާ މަޝްރޫޢު ފެށޭނެ އެއާއި އެކު. ބޮޑުހިލަ ބަލްކްކޮށް ގެންނާނަން. ބަނދަރުގެ ބޮޑު ހިލަޖެއްސުމުގެ މަސައްކަތް ފެށިގެން ކުރިއަށް ދާން އެހިސާބުން. ކުރިން ވެސް ދަންނަވާފަ ވާނެ އެހެން ރަށެއްގަ ވެސް އެ ދަތިކަން ދިމާވެފައިވާކަން.ރައީސް ޑރ.މުހައްމަދު މުއިއްޒު
ވާދޫގައި ބޭއްވި ޖަލްސާގައި ވާހަކަދައްކަވަމުން އެ ރަށުގެ ރައްޔިތުން ސަރުކާރުގެ އެދެމުންދާ ކަންކަމާއި އެ ރަށުގައި ހުރި ދަތިތަކަށް ރައީސް މުއިއްޒު ވަނީ އަލިއަޅުވާލައްވާފައެވެ. އެގޮތުން މީގެ ކުރިން އެ މަނިކުފާނު ދެއްވާފައިވާ ޔަޤީންކަމާއި އެއްގޮތަށް އެ ރަށުން ގޯތި ދިނުމަށް ބަލާއިރު، އެ ރަށުގެ ކުނިކޮށި ހުރި ސަރަހައްދުގެ ސަބަބުން ގޯތިތައް ދިނުމުގައި ދަތިތަކާއި ކުރިމަތިލާންޖެހިފައިވާކަމަށް ވަނީ ފާހަގަކުރައްވާފައެވެ. އެކަން ހައްލުކޮށްދެއްވާނެކަމުގެ ޔަޤީންކަން ދެއްވަމުން ރައީސް ވަނީ ކުނިކޮށީގެ މައްސަލަ ހައްލުވެގެންދާއިރު އެ ރަށަށް ދިމާވެފައިވާ ކުނި މެނޭޖްކުރުމުގެ މައްސަލަ އަށް ޖުމުލަ ހައްލެއް ހޯއްދަވައިދެއްވާނެ ކަމަށެވެ. އަދި ކުނީގެ މައްސަލަ ހައްލުވުމާއި އެކު އެ ރަށުން ގޯތި ނުދެވުމުގެ މައްސަލަ ނިމުމަކަށް އަންނާނެ ކަމަށް ރައީސް ވަނީ ފާހަގަކުރައްވާފައެވެ. ރައީސް އެ މައްސަލަ ހައްލުކޮށްދެއްވާނެ ކަމަށް ވިދާޅުވި ނަމަވެސް މީގެ ކުރިން ދެއްވި ޔަޤީންކަމާއި އެއްގޮތަށް މިހާތަނަށް އައި އިރު އެ މައްސަލަ ހައްލު ނުކުރެވިވާ ސަބަބު ހާމަކޮށްދެއްވާފައެއް ނުވެއެވެ.
ވާދޫގައި ވާހަކަދައްކަވަމުން ރައީސް ވަނީ އެ ރަށުގެ ސްކޫލްގެ މަސައްކަތާއި އެ ރަށަށް ބޭނުންވާ އެހެނިހެން ބައެއް ކަންކަން ކޮށްދެއްވާނެ ކަމަށް ވައުދުވެވަޑައިގަންނަވާފައެވެ.
