ވަޒީރަކު ގާނޫނާ ޚިލާފުވެއްޖެ ކަމުގައި ވާނަމަ ރައްޔިތުންގެ މަޖިލީހުގެ މެންބަރުން އެކަން ދޫކޮށްލައިގެންނުވާނެ
ކެންދޫ ދާއިރާގެ މެންބަރު މައުރޫފް ޒާކިރު
ތިންވަނަ ފަހަރަށް ވަޒީރަކަށް ރުހުންދޭންޖެހުމުން އެނގެނީ ދައުލަތަށް އެ ވަޒީރެއްގެ ބަލަދު އަރާފައިވާކަން ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
މިނިސްޓްރީތަކަށް ގެނެވުނު ބަދަލާއެކު އަލުން 4 މިނިސްޓަރެއްގެ ރުހުން ހޯދުމަށް ރައްޔިތުންގެ މަޖިލީހަށް ފޮނުވާފައިވާ މައްސަލައަށް ބަހުސްކުރައްވަމުން މައުރޫފް ވިދާޅުވީ ގާނޫނުއަސާސީއަށް ގެނައި އިސްލާހަކީ ރައްޔިތުންގެ މަޖިލިސްގެ މެންބަރުންގެ ބާރު ކެނޑިގެންދާނެ އިސްލާހެއް ކަމަށެވެ. އަދި ހަމަ އެއާއެއްކޮށް އޭގެ ސަބަބުން ރައްޔިތުންގެ މަޖިލީހުގެ މެންބަރުންނާއި ވަޒީރުން ޖަވާބުދާރީކުރުވުމުގައި ގޮންޖެހުންތަކެއް ކުރިމަތިވެގެންދާނެ ކަމެއް ކަމަށް އޭނާ ވިދާޅުވިއެވެ.
މައުރޫފް ވިދާޅުވީ ރުހުން ހޯދަން ފޮނުވާފައިވާ ވަޒީރުންގެ ތެރެއިން އެއް ވަޒީރަކަށް ތިންވަނަ ފަހަރަށް ރުހުން ދިނުމަށް ފޮނުވާފައިވާ ކަަމަށެވެ. އޭނާ ވިދާޅުވީ އެއީ ދައުލަތަށް ބަލަދުއަރާފައިވާ ވަޒީރުން ކަމަށެވެ.
މައުރޫފް ވިދާޅުވީ މިއަދު މި ފެނިގެންދަނީ އައްޔަންކޮށްފައިވާ ވަޒީރެއްގެ މައްޗަށް ޖިނާއީ ކުށެއް ކުރިކަމުގެ ތުހުމަތު ކުރެވިގެން އުޅޭތަން ކަމަށެވެ. އަދި ގައުމެއްގައި ކުރެވޭނެ އެންމެ ބޮޑު އެއް ކުށަކީ ގައުމެއްގެ ރައްޔިތުންގެ ޒާތީ މައުލޫމާތުން ޑާޓާއިން ވައްކަންކުރުން ކަމަށެވެ. މައުރޫފް ވިދާޅުވީ އެފަދަ ކަމެއް ފެންމަތިވެގެން އުޅޭއިރުގައި ރައްޔިތުންގެ މަޖިލީހުގެ ޒިންމާއަކީ އެ ވަޒީރަކު ޖަވާބުދާރީކުރުވައި އެ ވަޒީރަކާ އެންމެ ކުޑަމިނުން ސުވާލުކޮށް އެކަން ހިނގާފައިވާ ގޮތް ބެލުން ކަމަށެވެ.
މައުރޫފް ވަނީ މިކަމުގައި މަޖިލީހުގެ ހުރިހާ މެންބަރުން އެމްޑީޕީގެ މަސައްކަތަށް އެއްބާރުލުންދެއްވާ އެކަންކަން ބެލުމަށް އެދިވަޑައިގެންފައެވެ.
