ދެކުނު ކޮރެއާގެ ރައީސްގެ ބަންދުގެ މުއްދަތު ކޯޓުން އިތުރުކޮށްފި

ދެކުނު ކޮރެއާގެ ރައީސް ޔޫން ސުކް ޔެއޯލް ބަންދު ކޮށްފައިވާ މުއްދަތު 20 ދުވަހަށް އެ ގައުމުގެ ކޯޓަކުން އިތުރުކޮށްފިއެވެ.

ބަންދުގެ މުއްދަތު އިތުރު ކުރުމާ ގުޅިގެން، އޭނާ އަށް ތާއީދު ކުރާ އެތައް ސަތޭކަ މީހުން ރުޅިއައިސް ކޯޓު އިމާރާތުގެ ތެރެއަށް ވަނީ ވަދެގަނެފައެވެ.

ރުޅި އައިސްފައިވާ މީހުން ކުން ކޯޓު އިމާރާތަށް ވަދެ، ކުޑަދޮރުތައް ތަޅާލައި، އެތެރެއަށް ވަދެ މާރާމާރީ ހިންގާފައިވާ ކަމަށް ރިޕޯޓުތައް ބުނެއެވެ. 

އާދީއްތަ ދުވަހުގެ ހެނދުނު ކޯޓުގެ ނިންމުން އިއުލާނުކުރުމާ ދާދި އެއްވަގުތެއްގައި، އޭނާއަށް ތާއީދުކުރާ ފަރާތްތަކުން ކޯޓު އިމާރާތް ކައިރިއަށް އެއްވެ، އެމީހުން ހުއްޓުވަން މަސައްކަތްކުރި ރައިޓް ފުލުހުންނާ ކުރިމަތިލާފައިވެއެވެ. 

ޔޫން ވަނީ މަގާމުގައި ހުންނަވަނިކޮށް ބަންދުކުރެވުނު ދެކުނު ކޮރެއާގެ ފުރަތަމަ ރައީސްކަމުގައި ވެފައެވެ. އޭނާއާ ދެކޮޅަށް ކުރެވޭ ތުހުމަތުތަކަކީ ޑިސެމްބަރު 3 ވަނަ ދުވަހު ކުއްލިއަކަށް މާޝަލް ލޯގެ އިއުލާން ކުރައްވާ އަދި އެކަމާ ގުޅިގެން ޤައުމު ސިޔާސީ ހަމަނުޖެހުމަކަށް ވައްޓާލުމާ ގުޅޭ ބަޣާވާތުގެ ތުހުމަތުތަކެކެވެ. 

މަންޒަރުތަކުން ފެންނަ ގޮތުން، އިހުތިޖާޖުކުރާ ފަރާތްތަކުން ކޯޓުގެ ދޮރުފާރަވެރިންނަށް ތިބި ފުލުހުންނަށް އަލިފާން ނިއްވާ ފުޅިތަކުން ހަމަލާ ދިނުމަށްފަހު، އެތެރެއަށް ވަދެ، އޮފީސް ތަކެއްޗާއި ފަރުނީޗަރު ހަލާކުކޮށްލިއެވެ. 

ހޮނިހިރު ދުވަހު ޔޫން އާއި އޭނާގެ ވަކީލުން ކޯޓުގެ ފަނޑިޔާރުގެ ކުރިމައްޗަށް ހާޒިރުވެ އަޑުއެހުމުގައި ބައިވެރިވެ، އޭނާ ދޫކޮށްލުމަށް ވަކާލާތުކުރިއެވެ. ކޯޓުގެ މި ހުކުމަކީ އޭނާ ދިގު މުއްދަތަކަށް ބަންދުގައި ހުންނަވަން ޖެހުމުގެ ފެށުމެއް ކަމަށް ބައެއް ފަރާތްތަކުން ދެކެއެވެ. 

ދެކުނު ކޮރެއާގައި މާޝަލް ލޯގެ އިއުލާނާ ކުރުމާ ގުޅިގެން ހިނގައިދިޔަ ހަމަނުޖެހުންތަކުގެ ސަބަބުން 1980 ގެ އަހަރުތަކުގެ ފަހުކޮޅު ޑިމޮކްރަސީ އަކަށް ބަދަލުވުމަށްފަހު ޤައުމަށް ދިމާވި އެންމެ ސީރިއަސް ސިޔާސީ ހަމަނުޖެހުންތައް ދަނީ ހިނގަމުންނެވެ. 

މަތީ ފަންތީގެ އޮފިޝަލުންގެ ކޮރަޕްޝަން ތަޙުޤީޤުކުރާ އޮފީހުން ފުލުހުންނާއި ސިފައިންނާ ގުޅިގެން ކުރިއަށްގެންދާ ތަޙުޤީޤުގައި މިހާރު ދެކުނު ކޮރެއާގެ ރައީސްގެ ބަންދު 20 ދުވަހަށް އިތުރުކުރެވިދާނެއެވެ. މި މުއްދަތުގައި އެމީހުން މައްސަލަ ދައުވާ ކުރުމަށްޓަކައި ޕަބްލިކް ޕްރޮސެކިއުޓަރުންނާ ހަވާލުކުރާނެއެވެ.

ޔޫންގެ ވަކީލުންނަށްވެސް ކޯޓުގެ އަމުރާ ދެކޮޅަށް އިސްތިއުނާފު ކުރެވިދާނެއެވެ.