އެއްބަސްވެފައިވާ ގޮތައް އިސްރާއީލު ސިފައިން ދެކުނު ލުބުނާނުން ފޭބުމަށް ލުބުނާނުގެ ރައީސް ގޮވާލައްވައިފި

އިސްރާއީލު-ހިޒްބުﷲ ހަނގުރާމަ ހުއްޓާލުމަށް ފާއިތުވި އަހަރު އެއްބަސްވެފައިވާ ގޮތައް ޖެނުއަރީ 26 ގެ ސުންގަޑި އަށް އިސްރާއީލުން އެ ޤައުމުގެ ދެކުނުން ފައިބަންޖެހޭނެ ކަމަށް ލުބުނާނުގެ އައު ރައީސް ވިދާޅުވެއްޖެއެވެ. ލުބުނާނުގެ ރައީސް މިހެން ވިދާޅުވީ ހަނގުރާމައިގައި ބޮޑެތި ގެއްލުންތަކެއް ލިބިފައިވާ އެ ޤައުމަށް ޒިޔާރަތްކުރެއްވި އދ. ގެ ސެކްރެޓަރީ ޖެނެރަލްއާ ބައްދަލުކުރެއްވުމަށްފަހުގައެވެ.

"އެއްގަމާއި ވައިގެ މަގުން އިސްރާއީލުން ގެންދަނީ ލުބުނާނުގެ ސިޔާދަތައް އަރައިގަންނަމުން، ޚާއްޞަކޮށް އާންމުންގެ ގެތައް ގޮއްވާލުމާއި ބޯޑަރު ސަރަޙައްދުގެ އަވަށްތައް ސުންނާފަތި ކުރުމަކީ، ހަނގުރާމަ ހުއްޓާލުމުގެ އެއްބަސްވުމުގައި ބަޔާންކޮށްފައިވާ ކަންތައްތަކާ މުޅިން ޚިލާފު ކަމެކެވެ. އަދި މިއީ ލުބުނާނުގެ ސިޔާދަތާއި ބައިނަލްއަޤްވާމީ މުޖުތަމަޢުގެ ފިކުރާ ޚިލާފުވުން ކަމުގައި ބެލެވެއެވެ،" ރައީސް ޖޯސެފް އައޫންގެ އޮފީހުން ނެރުނު ބަޔާނެއްގައި ބުނެފައިވެއެވެ. މި ބަޔާން ނެރެފައިވަނީ ހޮނިހިރު ދުވަހު އެންޓޯނިއޯ ގުޓެރެސް އާއެކު ބޭއްވުނު ބައްދަލުވުމަށްފަހުގައެވެ.

ގުޓެރެސް ވިދާޅުވެފައިވަނީ ނޮވެމްބަރު 27 ގައި ވެވުނު އެއްބަސްވުމުގައި ކަނޑައެޅިފައިވާ ޖެނުއަރީ 26 ގެ ސުންގަޑި އަށް "ފަރުވާތެރިކަމާއެކު" ސިފައިން އަނބުރާ ގެންދިއުމަށް "އެންމެ މަތީ ދަރަޖައިގައި މަސައްކަތް" ކުރައްވާނެ ކަމަށެވެ.

ގުޓެރެސް ވިދާޅުވެފައިވަނީ އައޫންގެ ވެރިކަމުގެ ދަށުން ލުބުނާނަށް "އުއްމީދީ މުސްތަޤުބަލެއް" އޮތް ކަމަށާއި، އެ ޤައުމަށް ހަމަޖެހުން ގެނެވި، މެދުއިރުމަތީގެ މުހިންމު މަރުކަޒަކަށް ވެވިދާނެ ކަމަށެވެ.

އައޫން ރައީސް ކަމަށް ހޮވިވަޑައިގެންފައިވަނީ ޖެނުއަރީ މަހުގައެވެ. އެއީ ލުބުނާނުގެ ސިޔާސީ ޕާޓީތަކުގެ މެދުގައި ވެވުނު އެއްބަސްވުމަކާ ގުޅިގެންނެވެ. މި އެއްބަސްވުމާ އެކު ރައީސް ކަމުގެ މަގާމު ދެ އަހަރު ދުވަހު ހުހަށް އޮތް އޮތުން ވަނީ ނިމުމަކަށް އައިސްފައެވެ. މި ހުސްކަމުގެ ސަބަބުން އިސްރާއީލުގެ ހަމަލާތަކާއި އިޤްތިޞާދީ ހަލަބޮލިކަމާ ކުރިމަތިލާންޖެހިފައިވާ އެ ޤައުމު އިތުރަށް ހީނަރުވަމުން ދިޔަކަން ފާހަގަ ކުރެވެއެވެ.

ކުރީގެ އަސްކަރީ އެންމެ އިސްވެރިޔާ ކަމުގައި ހުންނެވި ރައީސް އައޫން ވަނީ އދ. ގެ ވަގުތީ ބާރު (ޔޫނިފިލް) އަށް އެމަނިކުފާނުގެ ތާއީދު އޮތްކަން ފާޅުކުރައްވާފައެވެ. ޔޫނިފިލްގެ މަސްއޫލިއްޔަތަކީ 2006 ވަނަ އަހަރު އިސްރާއީލާއި ހިޒްބުﷲ އާ ދެމެދު ހިނގި ހަނގުރާމަ ނިމުމަކަށް ގެނައި އދ. ގެ ޤަރާރު 1701 ގެ ދަށުން އެ ޤައުމުގެ ދެކުނު ސަރަޙައްދު ރައްކާތެރިކުރުމެވެ.

ހުކުރު ދުވަހު ބެއިރޫތައް ޒިޔާރަތްކުރެއްވި ފްރާންސްގެ ރައީސް އެމެނުއެލް މެކްރޯން ވިދާޅުވީ، އެ ސަރަޙައްދުން އިސްރާއީލުގެ ސިފައިން މުޅިން ފޭބުން "އަވަސް" ކުރަންޖެހޭ ކަމަށާއި ލުބުނާންގެ ސިފައިންގެ ގާބިލުކަން ވަރުގަދަ ކުރަންޖެހޭ ކަމަށެވެ.

އދ.ގެ ގުޓެރެސް އެ ޤައުމަށް ކުރެއްވި ޒިޔާރަތުގައި ލުބުނާނަށް އިތުރު ބައިނަލްއަޤްވާމީ އެހީތެރިކަން ފޯރުކޮށްދެއްވާނެ ކަމަށް ވަޢުދުވެވަޑައިގަތް އިރު، އެމެރިކާއިން ހޮނިހިރު ދުވަހު އެ ޤައުމަށް 117 މިލިއަން ޑޮލަރަށްވުރެ ގިނަ އަދަދެއްގެ ފައިސާގެ އެހީ ދޭނެ ކަމަށް ވަނީ އިއުލާން ކޮށްފައެވެ. އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، މި ފައިސާ ދޭނީ އދ.ގެ ސަލާމަތީ މަޖިލީހުގެ ޤަރާރު 1701 ތަންފީޒުކުރުމަށްޓަކައި ލުބުނާންގެ ސިފައިންނާއި ސަލާމަތީ ބާރުތަކަށް ވެދޭ އެހީތެރިކަމުގެ ބައެއްގެ ގޮތުގައި ކަމަށެވެ.

ލުބުނާނުގެ ސިފައިންނާއި އދ. އަދި ފްރާންސް އިން އިސްރާއީލަށް ތުހުމަތުކޮށްފައިވަނީ ހަނގުރާމަ ހުއްޓާލުމުގެ އެއްބަސްވުމާ ތަކުރާރުކޮށް "ޚިލާފުވެފައިވާ" ކަމަށެވެ. އެއީ އެ އެއްބަސްވުން "ތަންފީޒުކުރުމަށް" މަސައްކަތްކުރާ ކަމަށް ބުނެ އިސްރާއީލުން ގިނަ ހަމަލާތަކެއް ދީފައިވާތީއެވެ.

ހޮނިހިރު ދުވަހު ޓީވީ މެދުވެރިކޮށް ދެއްކެވި ވާހަކަފުޅެއްގައި ހިޒްބުﷲ ގެ ލީޑަރު ނައީމް ޤާސިމް ވިދާޅުވީ އިސްރާއީލުގެ ސިފައިންވަނީ އެ އެއްބަސްވުމާ "ސަތޭކަ" ފަހަރަށްވުރެ ގިނައިން ޚިލާފުވެފައި ކަމަށެވެ.