ފުލުހުންނަކީ ޤާނޫނީ ގޮތުން ކުރަން ޖެހޭ އެއްވެސް މަސައްކަތެއް ކުރާ ބައެއް ނޫން. އެއީ ނިވާފަތްގަނޑެއްގައި ފޮރުވިގެން ތިބި ބައެއް: ރައީސް ޔާމީން
ޑީއެންއާރުގައި ހުރި މައުލޫމާތުތައް ވަގަށް ނަގައިގެން ސަރުކާރު ހިންގާ ޕާޓިއަށް ވެއްދުމުގެ ޒިންމާ ނަގަން ޖެހޭނީ ސީދާ ރައީސް ޑރ. މުޙައްމަދު މުއިއްޒު
ރައީސް ޔާމީން ޕީއެންއެފް ޖަލްސާގައި ވާހަކަދައްކަވަނީ
ރާއްޖޭގެ ފުލުހުންނަކީ ޤާނޫނީ ގޮތުން ކުރަން ޖެހޭ އެއްވެސް މަސައްކަތެއް ކުރާ ބައެއް ނޫން ކަމަށާއި އެއީ ނިވާފަތްގަނޑެއްގެ ތެރޭގައި ކަނޑިކި އަދެގެން ތިބި ބައެއް ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅު ވެއްޖެއެވެ.
ރައީސް ޔާމީން މިފަދައިން ވިދަޅުވީ ބުރާސްފަތި ދުވަހުގެ ރޭ ޕީއެންއެފުން ބޭއްވި ޖަލްސާގައި ވާހަކަފުޅުދައްކަވަމުންނެވެ.
މި ޖަލްސާގައި ރައީސް ޔާމީން ވަނީ ރައީސް ޑރ. މުޙައްމަދު މުއިއްޒުގެ މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވެ ވާހަކަތައް ދައްކަވާފައެވެ. މިވަގުތު އެންމެ ބޮޑަށް ދެކެވޭ އެއް ވާހަކަ ކަމަށްވާ، މީހުންގެ ޒާތީ މައުލޫމާތުތައް ވަގަށް ނަަގައިގެން ވެރިކަން ކުރާ ޕާޓީ ޕީއެންސީއަށް މެމްބަރުން އިތުރުކުރުމަށް މި ސަރުކާރުން ކުރަމުން ގެންދާ ވައްކަމުގެ އިތުރުން ރާއްޖޭގައި ހެދިފައި އޮތް ޤާނޫނު ތަަކަށް މި ސަރުކާރުން ބޯ ނުލަބައި ބޭނުންހާ ގޮތަކަށް ކަންކަން ކުރަމުން ގެންދާތީ އެކަމާއި ގުޅުވައި ރައީސް ޔާމީން ވަނީ ވާހަކަދައްކަވާފައެވެ.
ރައީސް ޔާމީން ވިދާޅުވީ، ޑީއެންއާރުގައި ހުރި މައުލޫމާތުތައް ވަގަށް ނަގައިގެން އެ ބޭނުންކޮށް ރައްޔިތުންނަށް އެނގުމަކާ ނުލާ މި ސަރުކާރު ހިންގާ ޕާޓިއަށް ވެއްދުމުގެ ޒިންމާ ނަގަން ޖެހޭނީ ހޯމް މިނިސްޓަރު އަލީ އިހުސާން ކަމަށް ގިނަ ބަޔަކު ބުނަމުންދާ ކަމަށެވެ. އެހެން ނަމަވެސް ރައީސް ޔާމީން ވިދާޅުވީ، އެމަނިކުފާނުގެ ނަޒަރުގައި އެކަމުގެ ފުރިހަމަ ޒިންމާ ނަގަން ޖެހޭނީ ސީދާ ރައީސް ޑރ. މުޙައްމަދު މުއިއްޒު ކަމަށެވެ.
ރައީސް ޔާމީން ވިދާޅުވީ، ތަހުގީގީ އިދާރާތަކުން މިކަންކަން ތަހުގީގުކުރަން ޖެހޭނީ އިސްވެ ކަމަށާއި ނަމަވެސް އަދިވެސް ޕީޖީއިން ވެސް މިކަމަށް އިސް ނުނަގާ ކަމަށާ ފުލުހުންވެސް އަމިއްލަ ފަރާތްތަކުން ހުށަހެޅި މައްސަލަތައް ބަލާނެ ކަމާ މެދުވެސް ސުވާލު އުފެދޭ ކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، ދައުލަތުން ދައުލަތުގައި ހުރި ރައްޔިތުންގެ ޒާތީ މައުލޫމާތުން ވައްކަން ކުރުމަކީ މައުލޫމާތު ލޯންޑަރ ކުރުން ކަމަށާ އެއަށް ވުރެ ބޮޑު ޖިނާއީ ކުށެއް ނޯންނާނެ ކަމަށެވެ. އަދި މިފަދަ ކަންކަމުން ރައްޔިތުންގެ އިތުބާރު ދައުލަތަށް ގެއްލިގެން ދާނެ ކަމަށް ވެސް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މި ހުރިހާކަމެއް ހިނގަމުންދާއިރުވެސް މިކަން ބެލޭނޭ ކޯޓެއްވެސް އަދި މުއައްސަސާއެއްވެސް ނެތްކަމަށެވެ. އެގޮތުން ފުލުހުންނަކީ މީގެން އެއްވެސް ކަމެއް ބަލާ ބައެއް ނޫން ކަމަށް ރައީސް ޔާމީން ވިދާޅުވިއެވެ. ރައީސް ޔާމީން ވިދާޅުވީ ފުލުހުންނަށް ގައުމުގައި މިހިނގާ ކަންކަން ނުބެލޭވާހަކަ އެމަނިކުފާނު ދައްކަވާތީ އެކަމާވެސް ހިތްޕުޅާއި ނުވާކަމަށާއި ނަމަވެސް އެވާހަކަތަށް ދައްކަވާނޭ ކަމަށް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން ވިދާޅުވީ ފުލުހުންނަކީ އެއްވެސް ގޮތަކަށް ފިރިހެން މަސައްކަތެއް ކުރާ ބައެއް ނޫން ކަމަށެވެ. އަދި އެއީ ނިވާފަތްގަނޑެއްގެ ތެރޭގައި ކަނޑިކި އަދެގެން ފޮރުވިފައި ތިބި ބައެއްކަމަށް ޔާމީން ވިދާޅުވިއެވެ.
ރައީސް ޔާމީން އިތުރަށް ވިދާޅުވީ ގައުމުގައި މިހާބޮޑެތި ވައްކަންތަކާއި ކަރަޕްޝަންގެ އަމަލުތައް އިންތިހާއަށް މައްޗަށް ގޮސްފައިވާއިރު، ގާނޫނީ ގޮތުން ކުރަން ޖެހޭ އެއްވެސް މަސައްކަތެއް ފުލުހުން ކުރަމުން ނުދާކަމަށާއި ފުލުހުން އެތިބީ އެ ހުރިހާކަމަކުން ރެކިގެން ކަމަށެވެ.
