ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނުް މަގާމުން އެކަހެރި ކުރުމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ގޮވާލައިފިއެވެ.
އެމްޑީޕީ އިން ބުދަ ދުވަހު ނެރުނު ބަޔާނުގައި ބުނެފައިވަނީ ޕީ.އެން.ސީ. އަށް މެންބަރުން އިތުރުކުރުމަށް ހިންގި ހަރަކާތުގައި ސައްހަ ނޫން ފޯމުތައް އިލެކްޝަންސް ކޮމިޝަނަށް ހުށަހަޅާފައިވާކަން އިލެކްޝަންސް ކޮމިޝަންގެ ބަހުންނާއި، ޕީއެންސީގެ އަމިއްލަ އިއުތިރާފުން ވަނީ ޝައްކެއް ނެތް މިންވަރަށް އޮޅުންފިލާފައި ކަމަށެވެ. މިކަން ހިނގައި ދިޔައީ އެކިފަރާތްތަކުން ހުށަހަޅާ ފޯމުތަކުގެ ސައްހަކަން ކަށަވަރުކުރުމުގެ ގާބިލުކަން އެޕާޓީގައި ނެތުމުގެ ސަބަބުންކަމަށް ޕީއެންސީން ބުނިނަމަވެސް، މިއީ ގަސްތުގައި ރާވައިގެން ހިންގާފައިވާ ޖަރީމާއެއްކަން މިހާރު ވަނީ ހާމަވެފައި ކަމަށް ވެސް އެމްޑީޕީ އިން ބުނެފައިވެއެވެ.
"ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގެ މި ބޮޑު ޖަރީމާ ހިންގުމުގައި ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނު އިސް ދައުރެއް އަދާކޮށްފައިވާތީ މިޕާޓީގެ ފަރާތުން މިނިސްޓަރުގެ އެ ހުތުރު އަމަލު ކުށްވެރިކުރަމެވެ."
ވަޒީރުންނަކީ ގާނޫނުއަސާސީއާއި ރައްޔިތުންގެ ހައްގުތަކަށް ރައްކާތެރިވުމަށް މާތްﷲ ގަންދީ ހުވައެއްކޮށްގެން އެ މަގާމާ ހަވާލުވާ ބައެއް ކަމަށްވާއިރު، އެކިއެކި ހިދުމަތްތަކަށް އެދިގެން ދިވެހިސަރުކާރަށް ލިޔެކިޔުން ހުށަހަޅާ ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގައި މިނިސްޓަރު އިހުސާންގެ ބައިވެރިވުން އޮތްކަމީ އެ ވަޒީރު ކުރެއްވި ހުވަޔާވެސް ހިލާފު އަމަލެއް ކަަމަށް އެމްޑީޕީ އިން ވަނީ ބުނެފައެވެ.
"މިހާރު އާންމުވެފައިވާ ފޮޓޯތަކުން ފެންނަ ގޮތުގައި، ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުން ކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައިދިޔައީ މިނިސްޓަރު އިހުސާނުގެ ސީދާ ބެއްލެވުމުގެ ދަށުންނެވެ." ބަޔާނުގައި ވެއެވެ.
އެމްޑީޕީ އިން ވަނީ މިނިސްޓަރު އިހުސާނު ހިންގަވާފައިވާ މި މުޑުދާރު އަމަލުގެ މައްސަލަ ތަހުގީގުކުރުމަށް ދިވެހި ފުލުހުންގެ ހިދުމަތަށް ގޮވާލާފައެވެ.
އެ ޕާޓީން ބުނެފައިވާ ގޮތުގައި މިނިސްޓަރު އިހުސާނަކީ ފުލުހުންގެ އިދާރާގެ ކަންކަން ބެލެހެއްޓުން ހަވާލުވެފައިވާ ވަޒީރުކަމަށްވާއިރު، އޭނާ އެ މަގާމުގައި ހުރެއްޖެނަމަ މިމައްސަލައިގެ އިންސާފުވެރި ތަހުގީގެއްކުރުމަކީ މުސްތަހީލުކަމަކަށްވާތީ، މި މައްސަލައިގައި އިންސާފުވެރި ތަހުގީގެއް ކަށަވަރުކުރުމަށްޓަކައި، މިނިސްޓަރު އިހުސާނު މަގާމުން އެކަހެރިކުރުމަށް ވެސް ސަރުކާރަށް ގޮވާލާ ކަމަށެވެ. އަދި މި އަމަލަކީ ދައުލަތުގެ ވަސީލަތްތައް ބޭނުންކޮށްގެން ނާޖާއިޒް މަންފާއެއް ހޯދައި ދިނުމުގެ އަމަލަކަށްވާތީ މިމައްސަލައިގެ ފުރިހަމަ ތަހުގީގެއް ކުރުމަށް އެންޓި ކޮރަޕްޝަން ކޮމިޝަނަށް ގޮވާލާ ކަމަށް ވެސް އެމްޑީޕީ އިން ވަނީ ބުނެފައެވެ.
ދިވެހިރައްޔިތުން ސަރުކާރުގެ ކަމާބެހޭ އިދާރާތަކުން ހިދުމަތްތައް ހޯދަނީ އެ ރައްޔިތުންގެ ޒާތީ މައުލޫމާތުތައް އިތުރު ފަރާތަކަށް ހާމަނުވާނޭކަމުގެ ކަށަވަރުކަމާއެކުގައި ކަމަށާއި އެހެންނަމަވެސް، ޕާޓީގެ މެންބަރުންގެ ދަފުތަރު އިތުރުކުރުމަށްޓަކައި ދިވެހިރައްޔިތުންގެ ޒާތީ މައުލޫމާތުން ވައްކަންކުރުމަކީ އިންތިހާއަށް ނާތަހުޒީބު، އަދި ހިޔާނާތުގެ އަމަލެއް ކަމަށް ވެސް އެމްޑީޕީ އިން ވަނީ ބުނެފައެވެ. މިއީ ސަރުކާރާމެދު ރައްޔިތުންގެ މެދުގައި އޮންނަންވާ އިތުބާރު ގެއްލިގެންދާފަދަ އަމަލަކަށްވާތީ މިފަދަ ކަންކަން އިތުރަށް ނުހިނގާނޭކަން ކަށަވަރުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ އިދާރާތަކަށް ގޮވާލާ ކަމަށް ވެސް ބަޔާނުގައި ވެއެވެ.
އަދި މިހާރު ޕީއެންސީގެ ދަފުތަރުގައި ހިމެނުމަށް އިލެކްޝަންސް ކޮމިޝަނަށް ހުށަހަޅާފައިވާ ގިނަ ފޯމުތަކަކީ ސައްހަ ނޫން ފޯމުތަކެއްކަން ސާފުވެފައިވާތީ މިމައްސަލަ ބަލައި، އެކަމުގައި ގޮތެއް ނިމުމުގެ ކުރިން އެއިން އެއްވެސް ފޯމެއް ރަޖިސްޓްރީ ނުކުރުމަށް އިލެކްޝަންސް ކޮމިޝަނަށް ގޮވާލާ ކަމަށްވެސް ބުނެފައިވެއެވެ.
