ދެކުނު ކޮރެއާގެ ރައީސް ހައްޔަރު ކޮށްފި

ދެކުނު ރައީސް ޔޫން ސުކް-ޔެއޯލް ހައްޔަރު ކޮށްފިއެވެ.

ދެކުނު ކޮރެއާގެ ތަޙުޤީޤުކުރާ ފަރާތްތަކުން، އިތުބާރުނެތް ކަމަށް ފާސްކޮށްފައިވާ ރައީސް ޔޫން ސުކް-ޔެއޯލް ހައްޔަރުކޮށްފައިވަނީ، އެ ޤައުމުގެ ގާނޫނު ހަދާ މަޖިލީހުން ބާޠިލުކުރި ކުރު މުއްދަތެއްގެ މާޝަލް ލޯ ތަންފީޒުކުރަން މަސައްކަތްކުރުމުގެ ސަބަބުން ބަޣާވާތެއް ކުރަން އުޅުއްވި ކަމުގެ ތުހުމަތުގައެވެ.

"ޖޮއިންޓް އިންވެސްޓިގޭޝަން ހެޑްކުއާޓަރސްއިން މިއަދު [ޖަނަވަރީ 15] ހެނދުނު 10:33 ގައި ރައީސް ޔޫން ސުކް-ޔެއޯލް ހައްޔަރުކުރުމުގެ އަމުރު ތަންފީޒުކޮށްފިއެވެ،" ބުދަ ދުވަހު ނެރުނު ބަޔާނެއްގައި އޮތޯރިޓީތަކުން ބުނެފައިވެއެވެ.

މިއީ ދަކުނު ކޮރެއާގެ ތާރީޚުގައި މަޤާމުގައި ހުންނަވަނިކޮށް ހައްޔަރުކުރެވުނު ފުރަތަމަ ރައީސެވެ.

ކޮރެއާގެ ޔޮންހަޕް ނިއުސް އޭޖެންސީން ރިޕޯޓުކޮށްފައިވާ ގޮތުގައި، ކޮރެއާގެ ކޮރަޕްޝަން އިންވެސްޓިގޭޝަން އޮފީސް (ސީއައިއޯ) ގެ ޑެޕިއުޓީ ޗީފް، ލީ ޖޭ-ސޫންގް، ބުދަ ދުވަހުގެ ހެނދުނުން ފެށިގެން ސުވާލުކުރާ ކޮޓަރިއެއްގައި ޔޫން އާ ސުވާލުކުރުމުގައި އިސްކޮށް ހަރަކާތްތެރިވެފައިވެއެވެ. އަދި ޔޫންގެ ޤާނޫނީ ވަކީލުންވެސް އެތަނުގައި ތިބިކަމަށް ބުނެފައިވެއެވެ.

ރޮއިޓަރސް އިން ރިޕޯޓުކޮށްފައިވާ ގޮތުގައި، ސީއައިއޯއިން ބުނެފައިވަނީ ސުވާލުކުރުމަށްފަހު ޔޫން ބަންދުކުރެވޭނީ އުއިވަންގް ގައި ހުންނަ ސޯލް ޑިޓެންޝަން ސެންޓަރުގައި ކަމަށެވެ.

ހައްޔަރުކުރުމުގެ ކުރިން ރެކޯޑުކޮށްފައިވާ ވީޑިއޯ މެސެޖެއްގައި ޔޫން ވިދާޅުވެފައިވަނީ، އޭނާ މާޝަލް ލޯ ތަންފީޒުކުރަން ކުރި މަސައްކަތާ ގުޅިގެން ސުވާލުކުރުމަށް ހައްޔަރުވާން ނިންމީ ލޭއޮހުރުވުމަކަށް ފުރުސަތު ނުދިނުމުގެ ގޮތުންނެވެ.

"އަޅުގަނޑު ނިންމީ ކޮރަޕްޝަން އިންވެސްޓިގޭޝަން އޮފީހަށް ޖަވާބުދާރީވާން،" ޔޫން ވިދާޅުވިއެވެ. އަދި އޭނާ އިތުރަށް ވިދާޅުވެފައިވަނީ، ތަޙުޤީޤުގެ ޤާނޫނީ ހައިސިއްޔަތު ޤަބޫލުނުކުރެއްވި ނަމަވެސް، "ހިތާމަވެރި ލޭއޮހޮރުވުމެއް ހުއްޓުވުމަށްޓަކައި" އެކަމަށް އެއްބާރުލުން ދެއްވަން ނިންމެވީ ކަމަށެވެ.

ދަކުނު ކޮރެއާގެ ތަޙުޤީޤުކުރާ ފަރާތްތަކާއި ފުލުހުން ސިޑި ބޭނުންކޮށްގެން ޔޫންގެ ގެކޮޅަށް ވަދެފައިވަނީ، ޕްރެޒިޑެންޝަލް ސެކިއުރިޓީ ސަރވިސްއިން އެތަނަށް ވަނުން ހުރަސްއެޅުމަށް، ވެހިކަލްތައް ބޭނުންކޮށްގެން ގެކޮޅުގެ ދޮރާށި ބަންދުކުރުމުންނެވެ.

ރިޕޯޓުތަކުގައިވާ ގޮތުން، ޔޫންގެ ގެކޮޅުގެ ބޭރުގައި އެތައް ހާސް ބަޔަކު ވަނީ އެއްވެފައެވެ. އޭގެ ތެރޭގައި އޭނާއަށް ތާއީދުކުރާ މީހުންވެސް ހިމެނެއެވެ. އަދި ވެރިކަންކުރާ ކޮންޒަވޭޓިވް ޕީޕަލްސް ޕަވަރ ޕާޓީގެ މެންބަރުންގެ ގްރޫޕަކާއި ޔޫންގެ ވަކީލުންވެސް ގެކޮޅުގެ ތެރޭގައި ރައީސް ހައްޔަރުކުރުން ހުއްޓުވަން މަސައްކަތްކޮށްފައިވާކަމަށް ރިޕޯޓުތަކުގައި ބުނެފައިވެއެވެ.

ހައްޔަރުކުރުމަށްފަހު، ޔޫންގެ ރިޔާސީ މޮޓަރކޭޑު ފުލުހުންގެ އެސްކޯޓާއެކު އޭނާގެ ގެކޮޅުން ނުކުތްތަން ނޫސްވެރިންނަށް ފެނިފައިވެއެވެ. އަދި ޔޫން ދަތުރުކުރެއްވި ކަމަށް ބެލެވޭ އުޅަނދެއް ފަހުން ގްވަޗޯން ސިޓީގައި ހުންނަ ކޮރަޕްޝަން އިންވެސްޓިގޭޝަން އޮފީސް ފޯރ ހައި-ރޭންކިންގ އޮފިޝަލްސް އަށް ގޮސްފައިވެއެވެ.

ޔޫންގެ ރިޔާސީ ގެކޮޅުގައި މި ހަމަނުޖެހުން ހިނގީ، ޑިސެމްބަރު 3 ވަނަ ދުވަހު އޭނާ ކުރު މުއްދަތަކަށް މާޝަލް ލޯ ތަންފީޒުކުރެއްވުމާ ގުޅިގެން ކުރެވުނު އިމްޕީޗްމަންޓް ޝަރީޢަތުގެ ފުރަތަމަ އަޑުއެހުމަށް އޭނާ ހާޒިރުނުވިތާ ގަޑިއިރުތަކެއް ފަހުންނެވެ.

ރައީސްގެ ގެކޮޅުގައި ހިންގުނު ހައްޔަރުކުރުމުގެ އޮޕަރޭޝަންގައި އަންދާޒާކުރެވޭ ގޮތުގައި 1,000 ފުލުހުން ބައިވެރިވެފައިވާ ކަމަށް ރިޕޯޓްތައް ބުނެއެވެ.

ރިޕޯޓުތައް ބުނާ ގޮތުގައި ކޮރަޕްޝަން ތަޙުޤީޤު އޮފީހަށް އޭނާ ގިނަވެގެން 48 ގަޑިއިރަށް ބަންދުގައި ބެހެއްޓިދާނެއެވެ. އޭގެ ފަހުން، ރައީސް ބަންދުގައި ބެހެއްޓުމަށް ވޮރަންޓަކަށް އެދުމާމެދު ގޮތެއް ނިންމަން ޖެހޭނެއެވެ.

އަންގާރަ ދުވަހު އޭނާގެ އިމްޕީޗްމަންޓް ޝަރީޢަތް ފެށުނު އިރު ޔޫން ހާޒިރުވެ ވަޑައިނުގަންނަވައެވެ. އަދި ދެކުނު ކޮރެއާގެ ކޮންސްޓިޓިއުޝަނަލް ކޯޓުން ބުނެފައިވަނީ އޭނާ އަޑުއެހުންތަކަށް ހާޒިރުވުން ކޯޓުން ބޭނުންވާ ކަމަށެވެ.