އަމިއްލަ ޒާތީ ދިރިއުޅުމުގެ ހުރިހާ ކަމަކަށް މި ސަރުކާރުން އަތްބާނައި ޚަރާބުކޮށްފި: ޝާހިދު
މިހާރުގެ ހާލަތަށް ބަލައިފި ނަމަ، ގައުމު ފުރޮޅިގެން މިދަނީ މީގެ ކުރިން ރައްޔިތުން ތަހައްމަލް ކުރަމުން ގެންދިޔަ ދަތި، ހިތްދަތި ދިރިއުޅުމަށްކަމަށް
ކުރީގެ ފޮރިން މިނިސްޓަރު އަބްދުﷲ ޝާހިދު
ރައީސް ޑރ. މުޙައްމަދު މުއިއްޒުގެ މި ސަރުކާރުން ޤާނޫނަކީ ކުޅޭކުޅޭ އެއްޗަަކަށް ހަދައިފި ކަމަށާއި އެގޮތުން މިއަދު އަމިއްލަ ޒާތީ ދިރިއުޅުމުގެ ހުރިހާކަމަކަށް ވެސް މި ސަރުކާރުން ވަނީ އަތްބާނާފައި ކަަމަށް ކުރީގެ ފޮރިން މިނިސްޓަރ އަދި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިމަހުގެ 31 ވަނަ ދުވަހު ކުރިއަށް ގެންދިއުމަށް އެމްޑީޕީން ރާވާފައިވާ ހަރަކާތްތަކާއި ގުޅޭގޮތުން މައުލޫމާތު ދިނުމަށް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ މިހާރުގެ ހާލަތަށް ބަލައިފި ނަމަ، ގައުމު ފުރޮޅިގެން މިދަނީ މީގެ ކުރިން ރައްޔިތުން ތަހައްމަލް ކުރަމުން ގެންދިޔަ ދަތި، ހިތްދަތި ދިރިއުޅުމަށް ކަމަށާއި އެގޮތުން މި މަހުގެ 31 ވަނަ ދުވަހު އެމްޑީޕީން މަގުމައްޗަށް ނުކުންނަށް ނިންމީ އެ ސަބަބަށްޓަކައި ކަމަށެވެ.
ޝާހިދު ވިދާޅުވީ މިއަދު މި ތަޖުރިބާކުރަމުން ގެންދާ ހާލަތަށް ބަލާލައިފި ނަމަ މިއަދު މި ވަނީ ދިވެހިން ސަލާންޖަހަން މަޖުބޫރުކޮށް އަލުންބަލުން އަސާސީ ކަންކަން ހޯދަންޖެހިކަމަށެވެ. އަދި މިކަމުގެ ނަތީޖާ އަކީ ރައްޔިތުން ފުނޑިގެން ދިއުންކަމަށް ވެސް ޝާހިދު ވިދާޅުވިއެވެ. މިހާރު ރާއްޖެ ދަނީ މާޒީގައި ރައްޔިތުން ދެކެފައިވާ ފަދަ ހިތި ދުވަސްތަކަކާއި ދިމާއަށް ކަމަށް ވެސް ޝާހިދު ވިދާޅުވިއެވެ.
ޝާހިދު ވިދާޅުވީ 2008 ވަނަ އަހަރު ފާސްކުރި ޤާނޫނު އަސާސީގައި މަނާނުކުރާ ކަންކަމަކީ ހުއްދަކަންކަންކަމުގައި ވެފައިވާ ކަމަށާއި ނަމަވެސް މިއަދު އެ ހުރިހާ ކަމެއްވެސް މި ސަރުކާރުން މަނާކޮށް ނިމްމައިފިކަމަށެވެ.
ޝާހިދު ވިދާޅުވީ މިއަދު މި ސަރުކާރުން ޒާތީ ދިރިއުޅުމުގެ ހުރިހާ ކަމަކަށް އަތް ބާނާ އެ ހުރިހާކަމަކާއި ވެސް ބެހެމުން އަތްގަދަ ކުރަމުން ގެންދާ ކަމަށާއި އެގޮތުން ލާންވީ ގަމީހާއި، ބޮލުގެ އިސްތަށިގަނޑު ހުންނަންވީ ގޮތާއި ދުއްވަންވީ ސައިކަލާއި އެކުގައި ކޮފީއަށް އަރަންވީ ފަރާތްތައްވެސް ކަނޑައަލަނީ މިއަދު މި ސަރުކާރުން ކަމަށެވެ. އަދި އާންމުން ކިޔަންވީ ކޮންކަހަލަ ޚަބަރެއް ކަމާއި ބޯންވީ ކޮންކަހަލަ ސިނގިރެޓެއް ކަންވެސް މިއަދު ނިންމާފައި މިވަނީ ސަރުކާރުން ކަމަށް ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ ސިޔާސީ ފިކުރަށް ބެލުމެއް ނެތި ރާއްޖޭގެ ހުރިހާ ރައްޔިތުން އެ ހަރަކާތަށް އެއްވުމަށް ދައުވަތު ދެއްވާ ކަމަށެވެ. އެ ހިނގާލުމުގައި ބައިވެރިވެ އަޑު އުފުލުން މުހިންމުކަމަށާއި ކަންކަމާއި އަޑު ނުއުފުލާ ހިމޭނުން ތިބެއްޖެނަމަ ކަންކަން އަލުން ހަރުދަނާ ނުކުރެވޭ ވަރަށް ހަރާބުގެ މަގަށް ކަންކަން ހިނގައިދާނެ ކަމަށް ވެސް ޝާހިދު ވިދާޅުވިއެވެ.
އަދި ސަރުކާރުން ނުރަނގަޅުކޮށް ކުރާ ފަސް ކަމެއް ޝާހިދު ވަނީ ފާހަގަކުރައްވާފައެވެ. އެގޮތުން ސަބްސިޑީ ކަނޑާލުމާއި އިންތިހާ އަށް ޓެކްސް ބޮޑުވުން އެއީ ކަންބޮޑުވުމެއް ކަމަށް ޝާހިދު ވިދާޅުވިއެވެ. މަހުން މަހަށް ދިވެހިން ކުރާ ޚަރަދު އިތުރުވާނެކަން 2025 ގެ ބަޖެޓުން ވަރަށް ސާފުކޮށް އެނގެން އޮތް ކަމަށް ޝާހިދު ވިދާޅުވިއެވެ.
ގާނޫނު އަސާސީގެ ދިފާއުގައި އެމްޑީޕީން މަގުމައްޗަށް ނުކުންނަން އެ ޕާޓީގެ ގައުމީ މަޖިލީހުން ފާސްކުރީ 9 ޖެނުއަރީ 2025ގައެވެ.
