ސިހުރު ހަދާ ކަމުގެ ތުހުމަތުގައި ރ. އަލިފުއްޓާއި އެ އަތޮޅު މީދޫގައި ފުލުހުން އޮޕަރޭޝަނެއް ފަށައިފި އެވެ.
ފުލުހުން ބުނީ ސިހުރު ހަދާ ކަމަށް ރިޕޯޓުކޮށްފައިވާ މައްސަލައަކާ ގުޅިގެން އެ ދެ ރަށުގައި އޮޕަރޭޝަނެއް ހިނގަމުންދާ ކަމަށެވެ. އެކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ.
އެހެން ނަމަވެސް މައުލޫމާތު ލިބިފައިވާ ގޮތުގައި ކޯޓުއަމުރެއްގެ ދަށުން ފުލުހުން މީދުއަށް އަރައި އާދިއްތަ ދުވަހުގެ ހެނދުނު 9:00 އިން ފެށިގެން އެރަށުގައި ހިންގި އޮޕަރޭޝަނުގައި އެ ރަށުގެ ފަސް ގެއެއް ވަނީ ބަލައި ފާސްކޮށްފައެވެ.
އެ އޮޕަރޭޝަންގައި އަދި މިހާތަނަށް މީހަކު ހައްޔަރުކޮށްފައިވާ ކަމެއް އެނގިފައެއް ނުވެ އެވެ.
މީދޫ އާއި އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ގެތަކެއް ބަލައިފާސްކުރަން ފަށާފައިވާއިރު، މިދިޔަ އަހަރު ފަހުކޮޅު ކެލާގައި ފުލުހުންގެ އޮޕަރޭޝަނެއް ކުރިއަށްގެންގޮސްފައިވެ އެވެ. އެ މައްސަލައާ ގުޅިގެން ބަޔަކު ހައްޔަރު ވެސް ކުރި އެވެ.
ފުލުހުން މީގެކުރިން ވަނީ ށ. ކަނޑިތީމުގައި ސިހުރު ހަދާކަމަށް ތުހުމަތު ކުރެވޭ މައްސަލައަކާ ގުޅިގެން އެ ރަށުގައި ވެސް ބޮޑު އޮޕަރޭޝަނެއް ކުރިއަށް ގެންގޮސްފަ އެވެ.
އެ އޮޕަރޭޝަނުގައި ކޯޓު އަމުރެއްގެ ދަށުން އެ ރަށުގެ ބައެއް ގެތަށް ބަލައި ފާސްކޮށްފައިވެ އެވެ.
