ގިނަ ދުވަސްތަކަށް ފަހު ބޮޑު މޮޅެއް ލިބުމުން ގާޑިއޯލާ ހަމަޖެހިފައި

ގިނަ ދުވަސްތަކަކަށްފަހު މެންޗެސްޓަރ ސިޓީ އަށް ބޮޑު މޮޅެއް ލިބުމުން، އެކަމާ ހިތްހަމަ ޖެހި އަދި އުފާވެފައި ހުރި ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ އިނގިރޭސި އެފްއޭ ކަޕްގެ ތިން ވަނަ ބުރުގައި ސަފޯލްޑް ސިޓީއާ ދެކޮޅަށް ކުޅުނު މެޗުން މޮޅުވެ، މުބާރާތުގެ އަނެއް ބުރުން ސިޓީ ޖާގަ ހޯދި މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގައި ސިޓީން އަށް ލަނޑުގެ މޮޅެއް ހޯދިއިރު، މިދޭތެރެއިން ސިޓީގެ ނަތީޖާތައް ވަރަށް ބޮޑަށް ދަށްވި އެވެ. ނަމަވެސް މި ފަހުން އަނެއްކާ ވެސް ސިޓީން އަންނަނީ އެ ޓީމުގެ ނަތީޖާތައް ރަނގަޅު ކުރަމުންނެވެ.

ގާޑިއޯލާ ބުނީ، ގިނަ ދުވަސްތަކަކަށްފަހު ސިޓީ އަށް ބޮޑު ތަފާތަކުން މޮޅެއް ލިބިއްޖެ ކަމަށެވެ. ސަލްފޯޑް ސިޓީގެ ކުޅުންތެރިންނަށް އޮތީ އޭނާގެ އިޙުތިރާމްކަން ފާހަގަ ކުރަމުން ގާޑިއޯލާ ބުނީ، އެ ޓީމާ ދެކޮޅަށް ކުޅުމުގައި ވެސް އެންމެ ފަސޭހަ ނޫން ކަމަށެވެ. އެހެން ނަމަވެސް މެޗުގައި ސިޓީގެ ކުރީގައި ތިބި ކުޅުންތެރިންގެ ފަރާތުން ވަރަށް ރަނގަޅު ކުޅުމެއް ފެނުނު ކަމަށާއި، މުޅި ޓީމުގެ ކުޅުމާ މެދު ހިތްހަމަ ޖެހޭ ކަމަށް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ވަނީ ސިޓީ އަށް ކުޅެމުން އަންނަ ޖެކް ގްރީލީޝްގެ ވާހަކަ ފާހަގަކޮށްފަ އެވެ. އޭނާ ބުނީ މެޗުގައި ގްރީލީޝް ލަނޑެއް ޖަހާފައިވާއިރު، އިތުރު ލަނޑެއް ޖަހަން އޭނާ ފުރުސަތު ތަނަވަސްކޮށްދީފައިވާ ކަމަށެވެ. ގްރީލީޝް އަކީ ޚާއްސަ ކުޅުންތެރިޔެއްކަން ފާހަގަ ކުރަމުން ގާޑިއޯލާ ބުނީ، އޭނާ ގިނަ ލަނޑުތަކެއް ނުޖެހި ނަމަވެސް ލަނޑު ޖެހުމުގައި އޭނާގެ ދައުރު ބޮޑު ކަމަށް ގާޑިއޯލާ ބުންޏެވެ.

މަޑުމަޑުން ސިޓީ އަންނަނީ މިހާރު ވެސް ކުރިއެރުންތަކެއް ހޯދަމުން ކަމަށާއި، ޙާލަތު މަޑުމަޑުން ބަދަލުވާ ކަމުގެ އިޙުސާސް ކުރެވޭ ކަމަށް ވެސް ގާޑިއޯލާ ބުންޏެވެ. އޭނާގެ އިރުޝާދުގެ ދަށުން މިހާތަނަށް ސިޓީން 500 އަށް ވުރެ ގިނަ މެޗު ކުޅެފައިވާއިރު، އެއިން ކޮންމެ މެޗަކީ ވެސް ވަރަށް އަގުހުރި ހަނދާންތަކެއް ކަމަށް ވެސް ގާޑިއޯލާ ވަނީ ބުނެފަ އެވެ.

މި ސީޒަންގެ އިނގިރޭސި ޕްރިމިއާ ލީގުގައި ވެސް ސިޓީގެ ނަތީޖާތައް ދަށްވެފައިވާއިރު، އެ ޓީމު އޮތީ ވެސް ހަ ވަނައިގަ އެވެ.