އެމްޑީޕީ އާއި ގުޅެނީ ސިޔާސީ ގޮތުން ކުރިއަށް ދާން ބޭނުންވާތީ - އާޒިމް
އެމްޑީޕީ ގޯސްވެގެން އެއްވެސް އިރެއްގައި ނޫޅުއްވާ ކަަމަށާ ގޯސްވީ އެމްޑީޕީގެ ބައެއް ކަންކަން ހިންގަމުން ދިޔަ ގޮތް ކަމަށްވެސް އާޒިމް ވަނީ ވިދާޅުވެފަ
މަޖިލީހުގެ ކުރީގެ މެމްބަރު އަލީ އާޒިމް
އެމްޑީޕީ އާއި ގުޅިވަޑައިގަންނަވަން ނިންމެވީ ސިޔާސީ ގޮތުން ކުރިއަށް ދާން ބޭނުންވެވަޑައިގަންނަވާތީ ކަމަށް މަޖިލީހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް ވިދާޅުވެއްޖެއެވެ.
އާޒިމް އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
އާޒިމް އެމްޑީޕީން ވަކިކޮށްފައި ވަނީ 2023 ވަނަ އަހަރު އެމްޑީޕީގައި އުފެދުނު އެތެރޭގެ ޚިޔާލުތަފާތުވުންތަކަށް ފަހުގައެވެ. އޭނާ އޭގެ ފަހުން ހުންނެވީ ދަ ޑިމޮކްރެޓްސްގައެވެ. އެއީ އެމްޑީޕީއިން ވަކިވި ބޭފުޅުން އެކުގައި އުފެއްދެވި ސިޔާސީ ޕާޓީއެކެވެ. ދަ ޑިމޮކްރަޓްސް އިން އިސްތިއުފާ ދެއްވާ އެމްޑީޕީ އާއި ގުޅިވަޑައިގަތުމަށް އާޒިމް ވަނީ ނިންމަވާފައެވެ.
އަލުން އެމްޑީޕީ އާއި ގުޅިވަޑައިގަންނަވާ ސަބަބާއި މެދު ވާހަކަދައްކަވަމުން، ސިޔާސީ މަސައްކަތް ރަނގަޅަށް ކުރެވޭނީ އެމްޑީޕީގެ ތެރޭގައި ހުރެގެން ކަމަށް ޤަބޫލުކުރައްވާ ކަމަށް އާޒިމް ވިދާޅުވިއެވެ. އެގޮތުން، ސިޔާސީ ކަންކަމުގައި އުޅުއްވާތާ 16 ވަރަކަށް އަހަރުވީ އިރު ރާއްޖޭގައި އައި ސިޔާސީ ބަދަލުތަކުގެ ތެރޭގައި ވަރަށް ކައިރިން އުޅެވިފައިވާ ކަމަށް އާޒިމް ވަނީ ވިދާޅުވެފައެވެ. އަދި ސިޔާސީ ކަންކަމުގައި ހޭދަކުރެއްވި މުއްދަތުގައި، ކަމެއް ގޯސްކޮށް ދާ ކޮންމެ ފަހަރަކު އެކަން ހައްލުކުރަން މަސައްކަތްކުރައްވާފައިވާނެ ކަމަށް އާޒިމް ވިދާޅުވިއެވެ. އެމްޑީޕީގައި ކުރިން ހުންނެވި އިރު ވެސް މަސައްކަތްކުރައްވާފައިވާނީ އެ މޭރުމުން ކަމަށް އާޒިމް ވިދާޅުވިއެވެ.
އާޒިމް ވަނީ އެމްޑީޕީ އަކީ އަބަދުވެސް އޭނާ އެތަނެއް ދެކެ ލޯބިވާ ތަނެއްކަމަށާއި އަބަދުވެސް ހުންނަވަން ބޭނުންވީ ވެސް އެ ޕާޓީގައި ކަމަށް ވިދާޅުވެފައެވެ. ކުރިން އެ ޕާޓީން ވަކިވީ ހާލަތު ނިޔާކުރިގޮތުން ކަމަށް ވެސް އޭނާ ވަނީ ވިދާޅުވެފައެވެ. އަދި އެމްޑީޕީއަކީ އެންމެ ބޮޑު އެއް ސިޔާސީ އިންސްޓިޓިއުޝަންކަމަށް ފާހަގަކުރައްވާ އާޒިމް ވަނީ އެމްޑީޕީގެ ސިޔާސީ މަސައްކަތަށް ތައުރީފްކުރައްވާފައެވެ. މި މޭރުމުން ވާހަކަދައްކަވަމުން އާޒިމް ވަނީ އެމްޑީޕީ އަކީ އަބަދުވެސް އެ ޕާޓީން ޤަބޫލުކުރާ ވަކި ހަމަތަކަކާއި އުސޫލުތަކެއްގެ މަތީގައި އޮންނަ ޕާޓީއެއް ކަމަށް ވިދާޅުވެފައެވެ. މީގެ އިތުރުން އެމްޑީޕީ ގޯސްވެގެން އެއްވެސް އިރެއްގައި ނޫޅުއްވާ ކަަމަށާ ގޯސްވީ އެމްޑީޕީގެ ބައެއް ކަންކަން ހިންގަމުން ދިޔަ ގޮތް ކަމަށްވެސް އާޒިމް ވަނީ ވިދާޅުވެފައެވެ. އެކަމުގެ މިސާލު އާޒިމް ޖެއްސެވީ ފުޓްބޯޅައިގެ ބައެއް މިސާލުތަކާއި އެކުގައެވެ.
އެ ޕްރޮގްރާމްގައި ވާހަކަދައްކަވަމުން އާޒިމް ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން އާޒިމް ވިދާޅުވީ އެއް ވެރިކަމެއް ތިން ހަތަރު ދައުރު އޮންނަ ގޮތަށް ކަންކަން ހިނގާ ކަމަށް ވާނަމަ އެއީ ބަދަލުކުރަން ޖެހޭ ކަމެއް ކަމަށެވެ. އެއީ ރައްޔިތުންނަށް ނިކަމެތިވާ ހާލަަތަށް ކަންކަން ހިނގައިދާނެ ކަމެއް ކަމަށް އާޒިމް ވަނީ ސިފަކުރައްވާފައެވެ.
ރާއްޖޭގެ މިހާރުގެ ހާލަތު އޮތީ ވަރަށް ދަށް ހާލަތުގައި ކަމަށް އާޒިމް ވިދާޅުވިއެވެ. މުޅި ރީޖަނަށް ބަލާ އިރު ރާއްޖެއަކީ ޖީޑީޕީގެ ނިސްބަތުން އެންމެ ގިނައިން ބޮލަކަށް ފައިސާ ޖެހޭ ޤައުމުކަމަށް ވުމާއި އެކު ރާއްޖެ އަކީ ހާލުގައި އުޅެން ޖެހޭ ތަނެއްކަަމަށް ޤަބޫލު ނުކުރެވޭ ކަމަށް އާޒިމް ވިދާޅުވިއެވެ. ރާއްޖޭގައި ޓެކްސް ޕޭޔަރުން އަހަރެއްގެ މައްޗަށް 36، 40 މިލިއަން ރުފިޔާ ދައްކަމުންދާ ކަމަށް ވެސް އާޒިމް ވަނީ ވިދާޅުވެފައެވެ. އިތުރަށް ވާހަކަދައްކަވަމުން އާޒިމް ވިދާޅުވީ ސަރުކާރު ހިންގުމުގެ އިސްރާފު އިންތިހާއަށް މިހާރު އިތުރުވެފައިވާ ކަމަށެވެ.
