މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގެ ސެމީ ފައިނަލްގައި ސްޕޯޓްސް ކުލަބު ސިޓީ އާއި، ދިވެހި ސިފައިންގެ ކުލަބު ބައްދަލު ކުރަން ޖެހިއްޖެ އެވެ.

ހަތަރު ޓީމު ވާދަކުރާ މުބާރާތުގެ ފައިނަލްގެ ސީދާ ޖާގަ އެއް ވަަނައިގައި ހޯދީ އެޗްޑީސީ ކުލަބެވެ. ފައިނަލްގެ ދެ ވަނަ ޖާގަ ހޯދަން ކުޅޭ ސެމީ ފައިނަލްގައި ބައްދަލު ކުރަން ޖެހެނީ ދެ ވަނަ ޓީމާއި، ތިން ވަނަ ޓީމެވެ. މުބާރާތުގެ ލީގު ބުރުގެ ކުޅުން ނިމުނުއިރު، ސިޓީ އަށް ލިބެނީ ދެ ވަނަ އެވެ. ސިފައިންގެ ކުލަބަށް ލިބެނީ ތިން ވަނަ އެވެ.

ލީގު ބުރުގެ ފަހު މެޗުގައި ސިޓީން ވަނީ އަންގާރަ ދުވަހުގެ ހަވީރު ބްލޫސް ފޯ ވޮލީބޯލްގެ މައްޗަށް ތިން ސެޓު އެއް ސެޓުން ކުރި ހޯދައިފަ އެވެ. މެޗުގެ ފުރަތަމަ ސެޓު ބްލޫސް އިން 25-21 އިން ކާމިޔާބުކޮށްފައި ވަނިކޮށް، ސިޓީން ވަނީ ފަހަތުން އަރައި ތިން ސެޓު ކާމިޔާބު ކޮށްފަ އެވެ. މެޗުގެ ސެޓުތައް ސިޓީން ކާމިޔާބު ކުރީ 22-25، 16-25 އަދި 24-26 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިޓީގެ ބިދޭސީ ކުޅުންތެރިޔާ ޔަނަގިސަވާ ކޮހެއި އެވެ.

މުބާރާތުގެ ލީގު ބުރުގައި ސިޓީ އާއި ސިފައިން ވަނީ ބައްދަލު ކޮށްފަ އެވެ. އެ މެޗު ސީދާ ތިން ސެޓުން ކާމިޔާބު ކުރީ ސިޓީ އެވެ. ސިޓީ އާއި ސިފައިން ބައްދަލު ކުރާ ސެމީ ފައިނަލް މެޗު އޮންނާނީ ބުރާސްފަތި ދުވަހުގެ ރޭ އެވެ.